Read Kok Borok LAM RWMA 17 Bible Online

LAM RWMA 17 - Kok Borok bible

LAM RWMA 17

¹Israilni bebak bororok hasing haphar Sinni ongkhorwi tháng kha, Subraiyungni dagima haino bórok aro-uro khe kutulwi tháng lai-o tei Rephidimo batham khlai lai kha, tamo khe aro bórokni bagwi nungnani twi kwrwi.

²Hakhe bororok Musino cha ya nuk lai kha tei hai hwnwi hwn lai kha, “Chwngno nungna bagwi twi rw di.” Hakhe Musi bórokno hai hwnwi sa kha, norok ani tamo cha ya nuk lai kha ba? Norok tamo Subraiyungno amjokna nai lai?

³Tamo khe bororok aro belai khe twi kangjak lai kha tei Musino hai hwnwi hamya sa lai kha, “Nwng tamo chwngno, chini bwsarokno, mal-matarokno twi kang rwui butharna bagwi ha Ijipni tikhlai ma tubu lang?”

⁴Hakhe Musi Subraiyungni thani hai hwnwi suri san kha, “Ang o bororok bai tamo khlainai? Bórok ano holong khitarwi butharna bagwi tiyar wng laijak.”

⁵Subraiyung Musino hai hwnwi sa kha, “Israilni kisa bokhorokrokno tẃiwi nwng bororokni bwskang bwkhak lái tháng di. Nwng Nil twima-o swprakma a raidangno yago naui tháng di.

⁶Nai di, ang Horebo nini bwskango holong saka-o bachainai, hakhe bororok twi nungwi manna tẃi khe nwng a holongo bu di, hakhe aroni twi ongkhorwi phainai.” Hakhe Musi Israilni bokhorokrokni bwskango abo hai’-no khlai kha.

⁷Hakhe bo abono Masa tei Meriba[15] hwnwi mung phar kha, tamni hwn ba Israilni bwsarok Subraiyungno, “Subraiyung chini bisingo to de tong kwrwi?” hwnwi amjogwi nai lai kha tei kók báng lai kha.

⁸Ulo khe Amelekrok phaiwi Israilrok bai Rephidimo choba nang lai kha.

⁹Hakhe Musi Josuano hai hwnwi sa kha, “Chini bagwi bororokno saiwi na di, ongkhorwi thángwi Amelekrok bai choba nangwi di, khwna-o ang thángwi Kaitorni raidang tẃiwi hathái bokhorogo bachauinai.”

¹⁰Hakhe Josua Musi bai sajakma haino khlai kha. Amelekrok bai choba nangwi kha; phiya Musi, Aron tei Hur hatháini bokhorogo tháng kha.

¹¹Musi yak tisaui tong phuru khe Israilrok kwplai wngo, phiya bini yak tikhlai khe Amelekrok kwplai wngo.

¹²Tamo khe Musini yak ruaijak kha, hakhe bórok holong tháisa naui bini yaphango ton lai kha hakhe bo aro achuk kha tei Aron bai Hur bini yakno tisaui ton lai kha, khoroksa yasa bwkhak tei khoroksa tei yasa bwkhak; hakhe sal tháng yasak’-no bini yak ragwi tong kha.

¹³Hakhe Josua Amelek tei bini bororokno seng bai mechenwi rw kha.

¹⁴Hakhe Subraiyung Musino hai hwnwi sa kha, “Omono muituni bagwi bijap kangsa-o swi di tei abono Josuano saui khwna rw di, ang Amelekrokni mungno o hani swkwma súgwi páinai.”

¹⁵Musi háyá kaisa snam kha tei bo abono “Subraiyung ani bana”[16] wng kha hwnwi mung phar kha,

¹⁶tei bo hai hwnwi sa kha; “Subraiyungni[17] bana saka-o yak kongsa tongo! Subraiyung Amelekrok bai kusung kusung choba khlainai.”