Read Kok Borok LAM RWMA 19 Bible Online

LAM RWMA 19 - Kok Borok bible

LAM RWMA 19

¹Israil bororok ha Ijipni ongkhorwi thángmani talthamni swkangni salo, bórok Sinai hasinglwng hapharo phaiwi sók phai kha.

²Bórok Rephidimni ongkhorwi Sinai hasinglwng hapharo sók phai lai kha, bórok a hasinglwng hapharo batham khlai lai kha; bórok hathái bwskango khe batham khlai lai kha.

³Hakhe Musi hathái-o Kaitor bai malaina tháng kha tei Subraiyung Musino hathái sakani ringhorwi hai hwnwi sa kha; “Nwng Jakobni núkhungno tei Israil bororoknobo hai hwnwi sa di;

⁴Ang Ijipsarokno tamo khlai kha norok nuk kha tei toling bwsano bwkrango tẃima hai khe angbo norokno ani thani tubu-ui phai kha.

⁵Aboni bagwino tabuk norok ani kókno khunju kan khe tei ani swmaino tẃi khe, bebak bororokni bisingo norok ani borok wngnai; tamni hwn khe o ha ani máng se,

⁶tei norok simi se ani ochai wngwi ano monnai tei kwthar dopha wngnai. O kókrokno nwng Israilni bwsarokno ma sanai.”

⁷Hakhe Musi phaiwi Israilni okrarokno ring kha tei Subraiyung bono dagimarokno bórokni bwskango sa kha.

⁸Hakhe bebak bororok baksa khe hai hwnwi sa lai kha, “Subraiyung samani bebak kókno’-no chwng khlainai” tei Musi bororokni kókno Subraiyungno saui khna rw kha.

⁹Tei Subraiyung Musino hai hwnwi sa kha, “Nai di, ang nwng bai kók sa lai phuru bororok khnana tẃi khe tei nono poito khlai phlai máng tongna tẃi khe ang chumui budulo khe phainai.” Hakhe Musi Subraiyungni thani bororokni kókno sa kha.

¹⁰Hakhe Subraiyung Musino hai hwnwi sa kha, “Bororokni thani tháng di tei tini bai khwna bórokno kwthar khlai di tei bórokni rírokno sú rw di,

¹¹tei salthamni salo khe tiyar tong di; tamni hwn khe, salthamni salo Subraiyung bebak bororokni mokol bwskango Sinai hathái-o ongkhorwi phainai.

¹²Bororokni bagwi hathái kitingwi’-no mari rwui hai hwnwi sa di, ‘Norok hatháini saka-o thángna ta nai di, eba aboni yaphango phano yapri ta bera di; hathái-o kainai borok bo butharjaknai;

¹³khoroksani yak phano bono ta tang thung, wng ya khe bo holong khitharjaknai eba kogwi butharjaknai, mal mata phano wng thung eba borok phano wng thung, bo kwthang ma tong glak.’ Totro khorang kotor khe pung khe, bórok hathái jora ma phainai.”

¹⁴Hakhe Musi hatháini ongkhorwi bororokni thani tháng lai kha tei bororokno kwthar khlai kha; tei bórok bórokni rírok sú lai kha.

¹⁵Hakhe bo bororokno hai hwnwi sa kha, “Salthamni salo khe tiyar tong si di; bwrwirokni samo ta tháng si di.”

¹⁶Saltham salni phung aisirisiri-o khe aro nokha gurum kha, phirang kok kha tei hathái saka-o chumui budul kosom kasa kha tei sotonwi totro pung kha, hakhe a bathamo tongnai bebak bororok kiriui kwlwi lai kha.

¹⁷Hakhe Musi bororokno Kaitor bai malaina bagwi bathamni tikhlai tubu kha; tei bórok hatháini yaphango khe bacha lai kha.

¹⁸Tei Sinai hathái hoku bai kholopjak kha, tamni hwn khe Subraiyung hór bai khe aro ongkhorwi phai kha; tei aboni hoku thapa chwlani hoku ka tẃi khe saka-o kasa kha, hakhe hathái gwnangwi’-no jangrijak kha.

¹⁹Tei totroni khorang torsa rwk torsa rwk wng kha, hakhe Musi kók sa khe Kaitor bono phirang kokma tẃi khe uphilwi sa phi kha.

²⁰Tei Subraiyung Sinai hatháini buchugo khe ongkhorwi phai kha; Subraiyung Musino hathái buchugo ringhor kha, hakhe Musi kasaui tháng kha.

²¹Subraiyung Musino hai hwnwi sa kha, “Nwng ongkhorwi thángwi bororokno ragdama khe rwi di, wng ya khe bororok láiwi naina bagwi sederwi phaiwi komor baina phano tongo.

²²Tei Subraiyungni samo phainai ochairokbo kwthar wng thung wng ya khe Subraiyung bórokno majra rwnai.”

²³Hakhe Musi Subraiyungno hai hwnwi sa kha, “Bororok Sinai hathái jora phai man glak; tamni hwn khe nwngno chwngno ragdama khlaiwi ‘hathái kitingwi’-no mari rigwi nini bagwi khagwi kwthar khe ton di’ hwnwi sa kha.”

²⁴Tei Subraiyung bono hai hwnwi sa kha “Yaphango thángwi Aronno nwng bai khe saka-o tubu-ui phai di; tamo khe ochairok tei bororok láiwi Subraiyungni thani ta phai thung, wng ya khe bo bórokno majra rwnai”.

²⁵Hakhe Musi hatháini ongkhorwi thángwi bórokno saui kha.