Read Kok Borok LAM RWMA 2 Bible Online

LAM RWMA 2 - Kok Borok bible

LAM RWMA 2

¹Lebi bosongni chwla khoroksa, Lebi bosongni’-no bwrwi khoroksano káijak kha.

²A bwrwi sakderiya wngwi chwla bwsa khoroksa bá kha; tei bwrwima a chwraino naithok nukma bai taltham huiwi ton kha.

³A chwraino tei huiwi tonwi man li ya wngwi bo papirani[3] japa kaisa naui Nil tei alkatra phul kha hakhe a chwraino aro daui Nil twimani twi rukungo tonma papira bwlwngo khe tonwi rwi kha.

⁴Hakhe bibijwk hakchalo bachaui tongwi a chwraino tamo khlai abono naichomwi tong kha.

⁵Aphuru Pharaoni bwsajwk twima-o tukuna bagwi phai kha tei bini selengjwk a twi rukung tẃi himwi tháng khe bo a japano papira bwlwngo nuk kheno bini selengjwkno a japano khochaui tubu di hwnwi dagi kha.

⁶Bo a japano phiyok khe aro chwrai bwsa chwla nuk kha: A chwrai kabwi tongo. Bo bono khairokjagwi hai hwnwi sa kha, “Omo khoroksa swk Hibruni bwsano wngnai.”

⁷Hakhe bini bukhuk Pharaoni bwsajwkno hai hwnwi sẃng kha, “Ang chwraino chá rwna khan rwna bagwi Hibru bwrwima khoroksa swkno nini thani ringwi rw phaina da?”

⁸Pharaoni bwsajwk bono hai hwnwi sa kha, “Tháng di.” Hakhe a bwrwi thángwi a chwraini bumano ringwi tubu-ui phai kha.

⁹Tei Pharaoni bwsajwk bono hai hwnwi sa kha, “Nwng thángwi o chwraino chá rwui di, khan rwui di, ang aboni bagwi nono rang rw anw.” Hakhe a bwrwima a chwraino tlangwi thángwi chá rwui kha, khan rwui kha.

¹⁰Hakhe a chwrai tor rwk lok rwk wng kha, hakhe bo ulo Pharaoni bwsajwkni thani tubu-ui phai kha, hakhe bini sajla snam kha, bo a chwraino “Ang twini se tisaui tubu-o tei bono Musi[4] hwnwi mung phar kha.”

¹¹Musi torwi salsa bini bororokno thángwi naiwi bórok bwswk khe samung kwrak kwrak tang rwjagwi tong abono nuk kha tei khoroksa Ijipsa bini Hibru khoroksano bumani nuk kha.

¹²Bo abono nuk kheno aro borok khoroksa phano kwrwi nugwi a Ijipsano butharwi hasingkhongo phobwi rw kha.

¹³Teini salo bo tháng phi kha, hakhe Hibrusa khoroknwiokno bú laiwi tong laimani nuk kha; hakhe bo cha ya khlainaino hwnwi sa kha “Tamni nwng sakni boroknoba ma bu?”

¹⁴Bo uphilwi Musino hai hwnwi sa kha, “Sabo nono chini bagwi bugra tei nokphang buj thumnai snam kha ba? Nwng ba tamo a Ijipsano butharma hai da ano bo butharna nai?” Hakhe Musi kirijak kha tei uansuk kha, “Sói omo saui man bai khna’-no,” hwnwi chong kha.

¹⁵Pharao a kókno khna kheno, bo Musino butharna chong kha. Tamo khe Musi Pharaoni nokni khár kha tei Midian ha-o tongwi kha. Twikhor samo khe thángwi achugwi kha.

¹⁶Midianni ochaini bwsajwksong khoroksni tongo. Bórok phaiwi twi khók phai kha tei buphani merarokno twi khan phai kha.

¹⁷Mera mwrwknairok phaiwi a bwrwirokno riphrigwi rohor kha.

¹⁸Bórok bupha Reulni thani phai khe bo hai hwnwi sa kha, “Norok bahai aswk dakti phai laiwi man kha?”

¹⁹Bórok hai hwnwi sa kha, “Ijipsa khoroksa chwngno mera mwrwknairokni yakni phiyók kha, bo chini bagwi twi khógwi merarokno twi khansru kha.”

²⁰Bo bwsajwksongno hai hwnwi sẃng kha, “Buko a borok buro? Bono ringhor di, bo oro mai chá phai thung.”

²¹Musi a borok bai tongnani lon kha, hakhe bo Musino bwsajwk Jipora bai káiwi rw kha.

²²A bwrwi bwsa chwla khoroksa bá kha tei Musi bono Gersom[5] hwnwi mung phar kha, tamni hwn khe buini ha-o haino buini borok wngwi tongmani se.

²³Sal kwbángma lái thángma ulo khe Ijipni habugra thwi kha. Tei Israilni bororok bórokni yago klaiwi kengai lai kha tei chubachuni bagwi kap lai kha tei seleng wngwi kap laimano Kaitor khna kha.

²⁴Kaitor bórokni kengaimano khna kha tei bo Abraham, Isak tei Jakob bai swmai tangmano muitu wng kha.

²⁵Kaitor Israilni bororokno nuk kha tei bórok bahai wngwi tong lai kha abono Kaitor nuk kha.