Read Kok Borok LAM RWMA 21 Bible Online

LAM RWMA 21 - Kok Borok bible

LAM RWMA 21

¹“Tabuk nwng bórokno o raidarokno rw di.

²Nwng Hibru seleng pai khe, bo nokha bisidok jora nono monwi tongnai tei nokha bisisni-o khe bo mungsa rw yaui’-no yógwi thángnai.

³Bo saichung phai khe saichungno kiphilwi thángnai tei bo káijak hwn khe bini bihikbo bo bai baksano ongkhorwi thángnai.

⁴Tumungno bini nokphang bono káiwi bwrwi rw khe, hakhe a bwrwi chwla bwsarok phano eba bwrwi bwsarok phano man khe, hakhe a bihik bai bwsarok abo nokphangni wngnai, a seleng sak saichung kheno ma ongkhorwi thángnai.

⁵Tamo khe a seleng srai-srai khe ang ani nokphangno hamjago tei ani hikno, ani bwsarokno hamjago hwnwi sa khe; ang yógwi tháng ya hwnwi sa khe,

⁶hakhe bini nokphang bono Kaitorni thani tubu-ui phainai tei bo bono duglamo eba duglamni thongla-o tubunai; hakhe bini nokphang bini khunjuno sor bai phugwi rwnai. Abo hai khe a seleng thwi yasakni bagwi bini seleng wng phlai sinai.

⁷“Khoroksa swk borok bini bwsajwkno selengjwk wngna bagwi phal khe bo chwla selengrok yók tẃi khe yógwi man ya.

⁸Tumungno hik songjakna bagwi chongwi phaljak khe, phiya ba nokphang bono khá phurjak ya khe bo bono phiyógwi rw thung; bini nokphang bono buini borokni thani phalwi man glak, tamni hwn khe a nokphang bono bandi kha.

⁹Khoroksa swk borok bo bwslani bagwi bwrwi seleng pai khe bo a bwrwino sajwk hai khe ma tonnai.

¹⁰Tumungno bo tei khoroksano hik na phi khe, bo a swkangni bihikno swkango chá rw tẃi tei kan rw tẃi kheno chámung rwui kanmung rwui ma tonnai tei swkango hikni manthai tong tẃi kheno ma rwnai.

¹¹Tumungno bo bono a mungthamrokno rw ya hwn khe, bihik bono mungsa rwyaui’-no yóknai.

¹²“Tumung khoroksa swk khoroksa swkno bu khe tei a bujaknai borok thwi khe hakhe a bunai borok bo ma butharjakna nangnai.

¹³Tamo khe bo bono butharna hwnwi butharma ya deraui se hwn khe, Kaitor bini yapha-o se bono khiklai thung, hakhe ang nono, bo buro khárnai saui rwnai tei bo aro’-no khárwi yóknai.

¹⁴Tamo khe khoroksa tei khoroksano jolima bai butharna hwnwi buthar khe, bo butharjaknai, yóknani bagwi ani háyá-o phano khár thung bono aroni tikhlai buthar di.”

¹⁵“Khoroksa swk bo bini buma eba buphano buthar khe a borok ma butharjaknai.

¹⁶“Khoroksa swk bini nogo seleng khe tonnani eba phalnani bagwi borok khok khe a khoknai borok ma butharjaknai.

¹⁷“Khoroksa swk bini bumano eba buphano swrai khe bo ma butharjaknai.

¹⁸“Bororok uálai laiwi khoroksa tei khoroksano holong bai khitar khe eba bini yak bai phano bu-ui hai phano a borok thwi li ya, tamo khe thongaro klaiwi ma tong khe,

¹⁹hakhe tumungno omo hai khe a borok hamwi bacha khe tei raidang sungwi himwi man khe, hakhe a swpraknai borok yóknai; tamo khe a borokni samung tangna jora keplemano bo su-ui ma rwnai; tei ham rwui rw suknani sak ma tharnai.

²⁰“Khoroksa swk bini selengno sorni raidang bai bu khe tei bini yago thwi khe bo majra ma chánai.”

²¹Tamo khe a seleng salsa eba salnwi jora thangwi tong khe bo majra ma chána nang glak; tamni hwn khe bini seleng wng kha bo bai paijak.

²²“Bororok bú lai tok lai wng phuru sak kupulung bwrwi khoroksa bujagwi bini okni bwsa chokhrai kha, phiya aswk sago dera li ya hwn khe, a bwrwini bwsai bono sanmani swk tei buj thumnairok chongma swkno suwi ma rwnai.”

²³Tumungno mungsa swk dera khe hakhe langmani bagwi langma,

²⁴mokolni bagwi mokol, buani bagwi bua, yakni bagwi yak, yakungni bagwi yakung,

²⁵sókmani khe sókjaknai, kwsani bagwi kwsa tei swprakma bagwi swprakjakna nangnai.

²⁶“Khoroksa swk bo bini selengsa eba selengjwkno mokolo bu khe tei bumani bagwi a mokol dera khe, bo mokolni bagwi a selengno ahai’-no phiyógwi ma rwnai.”

²⁷Tumungno bo bini selengni bua swkrai rw khe, seleng eba selengjwk phano wng thung bo a selengno bini bua swkraimani bai haino phiyógwi ma rwnai.

²⁸“Musuk chwla masa khoroksa chwla eba bwrwino phano khaiwi buthar khe, a musukno holong khitarwi ma butharnai tei bini bahanno ma chá glak; phiya ba a musukni nokphang khe yóknai.”

²⁹Tamo khe a musuk chwla swkangrogobo abo haino khai khai-o hwn khe, phiya nokphangno swkango’-no sajak, hai phano bo abono khaui ton ya hwn khe tei abo borok khoroksa swk chwla eba bwrwino phano khaiwi buthar khe a musukno holong khitarwi ma butharnai tei bini a nokphangbo ma butharjaknai.

³⁰Phiya rang rwui butharjaknani yókna bagwi lama rwjak khe, bo rang tẃina nangma swk’-no ma rwnai.

³¹Tumungno musuk masa swk khoroksa swk chwla bwsa eba bwrwi bwsano buthar khe omobo abo haino wngnai.

³²A musuk mála, seleng eba selengjwkno buthar khe, a musukni nokphang selengni nokphangno, rukphai budul dulthamchi ma rwnai tei a musuk khe holong khitarwi butharjakna nangnai.

³³“Borok khoroksa swk hakhor kholop yaui ton khe eba hakhor khurwi abono kholop yaui haino ton khe aro musuk chwla masa phano eba koraichirka phano a hakhoro klai khe,

³⁴A hakhorni nokphang bo a malni nokphangno rang ma rwnai; bo aboni nokphangno rang ma su-ui rwnai tei kwthwi mal khe bini wngnai.”

³⁵“Khoroksani musuk mála tei khoroksanino khaiwi buthar khe, a khoroknwirok butharnai musukno kwthangno phalwi rang banta khe ma na lainai; tei a kwthwini bahanbo banta khe ma na lainai.”

³⁶Tamo khe a musuk mála omo hai’-no khai khai laiwi butharma tong khe nokphang hui tonma kwrwi hwn khe, bo bini musuk mála kwthang masa rwui bórokno su-ui ma rwnai, tamo khe musuk kwthwi khe bini wngnai.