Read Kok Borok LAM RWMA 22 Bible Online

LAM RWMA 22 - Kok Borok bible

LAM RWMA 22

¹“Tumungno khoroksa swk borok bo musuk masa swk eba mera phano masa swk khok khe tei bo abono buthar khe eba phal khe bo musuk masani bagwi musuk mak ba tei mera masani bagwi mera mak brwi kiphilwi ma rwnai, a khokmano su-ui rwna bagwi bini mungsa kwrwi hwn khe hakhe bo sakno phalwi rang ma rwnai.”

²Tumungno sikhok nok khurwi hap phuru manjagwi bujak khe tei bujakma bai thwi khe bo thwima bai mungsa majra man glak.

³Tumungno salo hwn khe hakhe borok butharma swk majra wngnai; tei khokmano su-ui ma rwnai; bini sunani mungsa kwrwi hwn khe, hakhe khokmani bagwi bo ma phaljaknai.

⁴Musuk, korai chirka eba mera khokmarok mungsa swk kwthang manjak khe, bo aboni kusungnwi ma su-ui rwnai.

⁵Khoroksa swk borok buini mai bwlwngo eba angur bwlwngo musuk mera chá rw khe eba phiyógwi rw khe bo bini mai bwlwngni tei angur bwlwngni kaham kuk bwthái rwui su-ui ma rwnai.

⁶“Hór bachaui busulwngo hór nang khe, khoroksa swkni mai burung eba mai bwlwng kham khe, hakhe a sóknai borok bo bebak’-no su-ui ma rwnai.”

⁷“Khoroksa swk borok bo bini nok arini borok khoroksa swkni thani bini rangrok eba manwirok tisa rwi ton khe, hakhe abo a borokni nokni khokjak khe tei a khoknai sikhok manjak khe, bo aboni kusungnwi su-ui ma rwnai.”

⁸Phiya a sikhok manjak ya hwn khe a nokni nokphang bo Kaitorni bwskango phaiwi bo a nok arini borokni manwirokno bo da yak rw kha, eba rw ya ma phunuknai.

⁹“Su-ui rwna khe omo hai wngnai, musuk chwla phano wng thung, korai chirkani bagwi phano wng thung, merani bagwi phano, rí-chumrokni bagwi phano eba mungsa swk manwi kwmamarokni bagwi phano wng thung, omono a kwmama manwi hwnwi sa khe, manjaknai bai nokphang bórok kwnwnwi’-no Kaitorni bwskango ma phainai; Kaitor bai majra berjaknai borok bo’-no bini nok arini borokno kusungnwi bára khe su-ui ma ranai.”

¹⁰“Tumungno khoroksa swk borok bini nok arini borokno korai chirka phano eba musuk chwla phano eba mera phano mungsa swk mal-mata tonna bagwi rw khe tei abo nuk ya sini’-no thwi khe eba bujak khe, eba swkwma kha hwn khe,

¹¹hakhe bo bini nokphangni manwi yak da rw rw ya sijakna bagwi a khoroknwirokni bisingo swmai ma tang lainai, a nokphangni thani swmai ma tangnai hakhe bo su-ui rwna nang glak.”

¹²Tamo khe abo bini aroni khokjak khe, bo aboni nokphangno su-ui ma rwnai.

¹³Tumungno abo bolongni manwirok bai uátharjak khe, bo abono tubu-ui ma phunuk phainai, bo a uátharjakmano su-ui rwna nang glak.

¹⁴“Khoroksa swk bo bini nok arini borokni aroni musuk-toknokrok solok na khe tei abo bujak khe eba thwi khe, nokphang aboni-o mungsa majra kwrwi, bo bebakno su-ui ma rwnai.”

¹⁵Tumungno nokphang arono tong khe su-ui rwna nang ya; abo keria nama hwn khe abo keriani a rangno suma hai wngnai.

¹⁶“Tumungno khoroksa swk kók sẃngjak ya bwrwi siklano belogwi a bwrwini sak tang trwng khe, bo bono káijakmungni hili ma rwnai tei bono’-no hik ma songnai.”

¹⁷Bwrwini bupha bono rwna soi súk ya khe, bo bwrwi siklano káijakmungni hili ma rwna nangma tẃi’-no ma rwnai.

¹⁸“Norok swkal kókmung kwrwngrokno kwthang ta ton di.”

¹⁹“Khoroksa swk borok mal-matarok bai sak gwdalnairok ma butharjaknai.”

²⁰“Subraiyungno karwi tei kubun mwtairokni thani ratharwi yapharnairok sokomorjak suknai.”

²¹“Norok buini hani bororokni hamya ta khlai di eba bono ta kusup di, tamni hwn khe norokbo salsa ha Ijibo buini borok tongmani.”

²²Norok khoroksa randijwkmarokno phano eba ma pha kwrwirokno ta sátok di.

²³Norok bórokno sátok khe tei ani thani kap khe ang bórokni kapmano khnanai;

²⁴hakhe ang joliui tung phlainai tei ang norokno seng bai butharnai hakhe nihiksong randi wngnai tei nwsarok bupha kwrwi wngnai.

²⁵Nwng norokni bisingni, ani bororokni khoroksa swk bigrano rang solok rw khe, norok lakai rwnairok hai ta wng di, bini thani rangni yagulo rangni bwsa ta na di.

²⁶Tumungno nwng norokni bisingni khoroksa swkni rírokno mungsa swkni kók khaui na khe abono sal tháng ya sini’-no kiphilwi rw di;

²⁷tamni hwn khe, bini sago kannani bagwi a rí kangsa susuk ja se, bo tamo bai thu janai? Bo ani thani kap khe, ang khnanai tamni hwn khe ang wng kha khairokma gwnang.

²⁸“Nwng Kaitorno ta kebeng di eba norokni, bororokni tẃiphangrokno ta swrai di.

²⁹“Norokni maichlamni tei mai rwbamni mairokni, angur pheremani bwtwirokni rwnani ta ler di. “Nini swkang sakrano ano ma rwnai.”

³⁰Norokni mal-matarokno tei meraroknobo abo hai’-no khlai di. Bumasong bai khe bórokno nokha salsni jora ton di, salcharni salo khe ani thani rw di.

³¹“Norok ani bagwi khalwi borok kwthar ma wngnai; abo bai’-no norok bolongni manwirok bai hapharo uátharjak muihanrokno ta chá di; abórokno sẃino chá rw di.”