Read Kok Borok LAM RWMA 23 Bible Online

LAM RWMA 23 - Kok Borok bible

LAM RWMA 23

¹“Nwng tatal kók auai ta khlai di, nwng borok cha yarok bai kwthaui tatal kók ta sachru di.”

²Samung hamya tangna bagwi norok borok kwbángmarokno ta rwkthar di, eba bujsóino cha ya khlaina bagwi borok kwbángmarok bai pal khe kók tatal ta sa chru di.

³Eba buj khlai thani bigrarokno phikung khe ta nuk di.

⁴“Nini arini musuk phano eba bini korai chirka phano yógwi thángma nuk khe nwng abono romwi bini thani kiphilwi rw phai di.”

⁵Nono naislernaini koraichirka poja hilik tẃiwi klai tongmani nuk khe, nwng muchung ya phano abono tisaui sochaui rw di; haino nugwi lái ta tháng di.

⁶Kwrwisa borok bujni bagwi tháng khe bono sói khe buj khlai ya ta wng di.

⁷Tatal khe majra bermarok bai hakchal khe tong di, borok sóino tei majra kwrwino haino ta buthar di, tamni hwn khe borok hamyano ang phiyók ya.

⁸Norok rang ta chá di, abo buj thumnairokno mokol nuk ya khlai-o tei abo borok sóirokno bujsói man thani dera rw-o.

⁹“Norok buini hani bororokno ta sátok di. Norok buini hani bororokni bwkhano saui mano tamni hwn khe norokbo salsa ha Ijibo buini hani borokno tongmani.”

¹⁰“Bisidok cho yaui norok norokni hapharo mai khul khlai di tei manma jora tẃi bebakno thumwi rúng di.

¹¹Tamo khe bisisnini bisi-o khe bathak di, aro karwi kabumano mungsano bo ta ra di. Norokni bisingni kwrwirok ma chána twi khe tei tong rwkma bárarokno bolongni mal-matarok chá thung. Nini angur bwlwngnobo abo haino khlai di tei Olib buphangroknobo haino khlai di.”

¹²“Nokha Salsni-o nokha saldok samung tang si di, abo hai khe nini samung tangnai selengrok, buini hani bororok lenglaui mannai. Nini musuk tei korai chirkarokbo lenglaui mannai.

¹³“Norok ang samani bebakno khna di. Tei kubun mwtairokni mung ta na di; bórokni mungrokno norokni khukni ta khna thung.”

¹⁴“Ani mungwi bisi-o uáitham chámung ter ma tẃinai.”

¹⁵Norok auang bánglani terno ma tẃinai. Ang norokno dagi-o Abib talni chongjak jora-o norok salsni jora auang bángla ma chánai, norok a talo’-no ha Ijipni yógwi phai-o. Khoroksa phano yak bukcha khe ani thani phai man glak.

¹⁶Norok ramani terno khlai di; norokni hapharo sarmani tháiskangni mai-khul kwtalni terno ma tẃinai. Norok thansa khe raui pái phuru khe abono khlai di; norok bwtháirok thumwi pái khebo khlai di.

¹⁷Bisi-o uáitham norokni chwla bwsarok Subraiyung Kaitorno khulumna bagwi ma phainai.

¹⁸“Norok mui ratharwi thẃi yaphar phuru khe chuan buljak auang ano ta yaphar di. O terni jora-o ani thani ratharwi yapharmani muini buphamrokno teini phung jora ma ton glak.

¹⁹“Norokni tháiskangni swkangni bwtháino norok Subraiyung Kaitorni thani ma tubunai.” “Abuk twi cháui tong kho omo hai mera eba punsarokno norok ta song di.”

²⁰“Nai di, ang norokni bagwi tiyar khlaima ha-o tubuna bagwi tei lama-o tháng phuru norokno mwrwkna bagwi norokni slái swkango khe khoroksa suarino rwui rohornai.”

²¹Bono mokol kai di, bini kókrokno khna di. Bono ta kebeng di, ang se bono rohoro bo norok cha ya khlaimano nakar glak.

²²Phiya norok bini kók khna khe tei ang dagima hai bebak samung khlai khe, ang norokni bebak arirokni ari tei kebengnairokno kebengnai wngnai.

²³Ani suari norokni slái swkang swkang thángwi norokno Amorsarokni ha-o tlangnai; Hitisarokno, Peressarokno tei Kanansarokno, Hibisarokno, Jebussarokno sokomornai.

²⁴Bórokni mwtairokni thani khorok ta bom di eba bórokno tabo ta mon di tei bórokni samung khlaima tẃi ta khlai di. Bórokni holong thonglarokno swbai khibi di.

²⁵Ang norokni Subraiyung Kaitorno mon di, ang norokno mai, twi rwui hamari rwnai tei norokni kulum kwsarokno naui páinai.

²⁶Norokni bwrwirok khoroksabo bwsa chokhrai glak tei banjibo tong glak; ang norokni umorno kasuk rwnai.

²⁷Norokni slái swkang ang bororokni thani kirimung rwi rohorwi sikirinai, norok choba khlaimani bebak bororokno ang kwmam rwnai, ang norokni arirokno uphil rwnai tei norokni bwskangni khár rwui rohornai.

²⁸Ang norokni arirokno tong kesebo khiklainai; ang norokni bwskango tháng khe Hibisarokno, Kanansarokno tei Hitisarokno khár rwui rohornai.

²⁹Bolongni mal-matarok akarnai se tei habo komor ya tẃi khe ang bórokno nokha bisani bisingo rwui rohor glak.

³⁰Norok erwi hano yago naui amanna wng ya sak, ang bórokno kisa kisa khe norokni bwskangni nornai.

³¹Ang norokni hano phuarnai. Twijlang kwchakni simi Philistiasarokni twijlang jora tei hasinglwngni simi Uphratis jora, ang norokni ha-o tongnairokno norokni yago rwnai tei norok bórokno norokni bwskangni riphrigwi rohornai.

³²Norok bórok bai tei bórokni mwtairok bai kók ta kha lai di.

³³Bórokno norokni ha-o ta tong rw di; wng ya khe bórok norokno ani thani sumsok khlai rwnai. Norok bórokni mwtairokno mon khe, abo norokni bagwi uarai se wngnai.