Read Kok Borok LAM RWMA 24 Bible Online

LAM RWMA 24 - Kok Borok bible

LAM RWMA 24

¹Hakhe bo Musino hai hwnwi sa kha, “Hathái saka-o nwng bai Aron, Nadab bai Abihu, tei khorok snichi Israilni tẃiphangrok ani thani phai di tei hakchalo tong twtwi’-no ano khulum di.

²Musi simino Subraiyungni samo phai di; tamo khe kubunrok samo ta phai di, bororokbo bo bai baksa hathái saka-o ta phai thung.”

³Musi phai kha, Hakhe bororokno Subraiyung samani bebak kókrokno tei dagimarokno saui khna rw kha; bebak bororok’-no khorang baksa khe hai hwnwi sa lai kha, “Subraiyung samani bebak kókrok sa tẃi’-no chwng khlainai.”

⁴Hakhe Musi Subraiyungni bebak kókrokno swiwi narwk kha. Bo aidrobo bachaui hatháini yaphango háyá kaisa snam kha tei chinwi thongla Israil bosongni chinwino rwgwi tisa kha.

⁵Tei bo Israilni chwla siklarokno rwui rohor khe bórok sógwi yaphar kha tei Subraiyungni thani khakchangni yapharmungni musuk chwla ratharwi yaphar kha.

⁶Musi kisa thẃirokni naui dangai-o khe ton kha tei baksa khe háyá-o sarwi rw kha.

⁷Ulo khe bo swmaini bijapno naui lukuno poriui khna rw kha; hakhe bórok hai hwnwi sa lai kha, “Subraiyung sama haino chwng bebakno khlainai tei chwng bebak kókno khnaui tongnai.”

⁸Tei Musi thẃi naui bororokni saka-o sarwi rwui hai hwnwi sa kha, “Nai di, Swmaini o thẃino, omono Subraiyung o kókno tẃiwi kók rw-o.”

⁹Hakhe, Musi, Aron, Nadab tei Abihu tei Israilni khoroksnichirok kasaui tháng lai kha,

¹⁰Bórok Israilni Kaitorno nuk kha; bini yakung yaphango holong kwkhrang saphir hai tei chuknoha chẃngma hai’-no kwchẃng.

¹¹Tei bo Israilni bokhorokrokni saka-o yak rw li ya; bórok Kaitorno nuk kha tei chá lai kha, nung lai kha.

¹²Subraiyung Musino hai hwnwi sa kha, “Nwng hathái saka jora kasaui ani thani phai di tei aro naisingwi tong di; ang nono Kerong tei dagimungrok swijak holong bwlap rwnai.” Abo ang bórokno phrwngna bagwi swimani.

¹³Hakhe bini seleng Josua bai bacha kha tei Musi Kaitorni hathái-o kasaui tháng kha.

¹⁴Musi okrarokno hai hwnwi sa kha, “Chwng norokni thani kiphilwi phai ya sak oro naisingwi tong di; ‘Nai di, Aron bai Hur norok bai tong rwk kha; norokni khoroksa swkni kók bángmarok tong khe a borok bórokni thani tháng thung.’ ”

¹⁵Hakhe Musi hathái-o kasaui tháng khe chumui hatháino kobol kha.

¹⁶Sinai hathái-o Subraiyungni chẃngsacha tong phai kha, abo nokha saldok jora chumui bai kobolwi tong kha; ulo nokha salsnini salo khe Kaitor chumui bisingni Musino ring kha.

¹⁷Tabuk Israilrok nuk kha hathái bokhorogo, Subraiyungni chẃngsacha, monoknai hór hai khe nukjak kha.

¹⁸Musi chumui bisingo habwi tháng kha tei hathái kuchugo kasaui kha. Musi aro nokha sal brwichi tei horbrwichi tongwi kha.