Read Kok Borok LAM RWMA 25 Bible Online

LAM RWMA 25 - Kok Borok bible

LAM RWMA 25

¹Subraiyung Musino hai hwnwi sa kha,

²“Israil bororokno sa di, bórok ani thani yapharmung tubu thung; bebak bororok bwkha-o muchungma tẃi yapharmano nwng ani bagwi yachak di.

³Tei omo hai yapharmarokno nwng bórokni aroni yachak di; rangchak, rukphai, pitol,

⁴lilon kaham, kwkhrang, kormo tei kochual; tei pun buikhumuni rí takjak,

⁵mera bukur kwchak khlaijak; pun bukur kaham; akaia buphang;

⁶Chatirokni bagwi thok, phuljaknai thokni bagwi mosla tei satrai sóknani bagwi motom manwi.

⁷Oniks holongrok, ephod tei pannani holongrok tei khaklapni bagwi rí thepajaknairok.

⁸Tei ang bórokni bisingo tongwi manna tẃi khe ani bagwi nokthar tang thung.

⁹Ang nono phunukma hai kheno nini rínok tei aroni manwi-khwnwirokno norok ma snamnai.”

¹⁰“Akaia buphangni bokhok kaisa ma tonnai; lokma khe 45 inches kolok, 27 inches kuar tei 27 inches kuchuk ma wngnai.

¹¹Bisingno rangchak kaham bai ma khobnai tei saka-obo rangchak bai ma khobnai tei buchugo gandar kitingwi’-no rangchak ma khobnai

¹²bwlamni bagwi aro rangchakni bukhunju kaibrwi ma thepanai tei yakungbo kongbrwi ma snamnai, babainwi-o bukhunju kainwi ma wngnai.

¹³Akaia buphangni balphung ma snamnai, abono bo rangchak bai ma khobnai,

¹⁴tei a balphungrokno a bokhokni babainwio’-no ma soranai,

¹⁵a balphungrokno a bukhunju’-ono ma tonnai; tei abono ma sokok glak.

¹⁶Aboni ulo khe a bokhokni bisingo ang rwna hwnmani a swmaini kóktháino ma tonnai.

¹⁷“Rangchak kahamni khairokma achukthayung snam di; abo sentimitar 110 kolok tei sentimitar 66 kuar ma wngnai.

¹⁸Hakhe nwng rangchakni maknwi cherub ma snamnai, abórokno rangchak tokhrubwi ma snamnai, abo khairokma achukthayungni yang yangni buchuk kwnwi-o ma tonnai.

¹⁹Babaisa-o cherub masa tei babaisa-o tei masa cherubno ma tonnai; a cherub masa tei masa yang babai tei ayang babai khairokma achukthayungo ma tongnai.

²⁰A cherubni bwkrangrok khe saka bwkhak pheheljak wngnai tei bórokni bwkrangrok bai khe a khairokma achukthayungno kholopnai. Bórokni mwkhang khe kaisa bai tei kaisa khe a khairokma achukthayungni bwkhak khe nahar laijak.

²¹Tei nwng a khairokma achukthayungno a bokhokni saka-o ma tonnai; tei aboni bisingo khe ang rwna hwnmani a swmaino ton di.

²²Ang nwng bai aro malainai tei a khairokma achukthayungni saka-o cherub maknwini kwcharo tongwi ang nono Israil bororokni bagwi ani bebak dagimungrokno rwnai.

²³“Tei nwng akaia buphangni songphang kaisa snam di abo sentimitar 88 kolok, sentimitar 44 kuar tei sentimitar 66 kuchuk ma wngnai.

²⁴Nwng abono rangchak kaham bai khop di tei kitingwibo rangchak bai khop di.

²⁵Tei nwng mili mitar 75 kuar khlai bokhong ma snamnai, a bokhongno rangchak bai ma khobnai,

²⁶tei aboni bagwi nwng baljaknai kaibrwi rangchakni bukhunju ma snamnai, yakung kongbrwi tongma a busup subrwi-o abórokno ton di.

²⁷A songphangno balnani balphungno sorana bukhunjurokno a bokhongni gandaro ma rwnai.

²⁸Nwng akaia buphangni balphungrokno ma snamnai tei abórokno rangchak bai ma khobnai. Songphangno abo bai ma balnai.

²⁹Angur bwtwi yapharna bagwi, mairangrok, khurirok, lotarok tei dangairok snam di.

³⁰Tei nwng a songphangni bwskango khe cho yaui auang ma yapharnai.

³¹“Rangchak kahamni thopna snam di. Tokjak rangchakni thopna snam di, abo khum bedek hai khe snamjak wngnai aro bubak tei bwkhrwi hai kaisa kaisa khe bedego tongnai.”

³²Tei aroni bedek dekdok ongkhornai, abo bedek dek tham khe babaisani tei babaisani bedek dek tham ongkhornai.

³³Bedek dek thamni snamjak khum bubak tei bwkhrwi gwnangrok almon khum hai wngnai tei bedek dek thambo khumbar tei bwkhrwi gwnangrok almon khum hai wngnai, a thopnani abo hai khe bedek dekdok ongkhornai.

³⁴Thopna bedego kaibrwi snamjak almon khum hai bubar bai bwkhrwi gwnang wngnai.

³⁵Bojro kwtham bedekni páithak buchugo kaisa khe bwkhrwi tongnai.

³⁶Thopna tei bini bedek bai bwkhrwirok kaisa khe tokjak rangchak kahamni ma wngnai.

³⁷Tei nwng kaisni thopna gwnang thopnaphang snam di; tei bwskango pohor pirna tẃi khe abo thepajaknai.

³⁸Aboni romjaknai tei tonjaknai manwibo rangchak kaham bai snam di.

³⁹Thopna tei mairang lota snamna bagwi 35 kilogram rangchak kahamno na di.

⁴⁰Hathái kuchugo ang nono phunukma hai kheno samung khlaina bagwi sakthar di.