Read Kok Borok LAM RWMA 26 Bible Online

LAM RWMA 26 - Kok Borok bible

LAM RWMA 26

¹“Nwng ani tongthai ríni nok kwthar snam di, abo kwkhrang, chaksru-sru tei kwchak khutwngni takjak rísa kangchi bai snamjaknai. Aro bwkrang gwnang malrokni mangtang naithok khe takjak tongnai.

²Rísa thwgwi mitar 12 kolok tei mitar 2 kuar wngnai bórokni uarma khe baksa.

³Rísa kangbano kwrẃngsa-o kangsa khe ma thepanai tei rísa kangba tei kwrẃngsa-o abo tẃi kheno supjaknai.

⁴Supjaknai swkangni páithak rísani buchugo rí kwkhrang bai bwlam snam di tei abo tẃi kheno tei kaisanobo abo haino ma khlainai.

⁵Kangsa rísa-o bwlam lambachi snam di tei kubun rí supjakni páithak rísa-obo bachi bwlam snam di, phiya bwlam snamjakrok nahar laijak wngnai.

⁶Rangchakni biching snam di, a biching bai rísa supjak khaknwino kangsa khe phnangwi rwjaknai.

⁷“Pun buikhumu bai snamjak kangchisa, rísa ríni nok saka-o phinna bagwi snam di.

⁸Bebakno baksa khlai snam di, abo muk thamchi kolok tei muk brwi kuar wngnai.

⁹Hakhe nwng a kangbano kangsa khe sup di tei kangdokno kwrẃngsa-o khe sup di. A kangdok bai snamjakno chabwi rínokni bwskangno kholop di.

¹⁰Tei nwng bwkhak kaisano khe buchugo bwlam lambachi snam di tei khaksaninobo buchugo bwlam lambachi snam di tei khaksaninobo buchugo bwlam lambachi snam di.

¹¹Tei nwng pitolni kongbachi biching snam di tei a khaknwini bwlamo kaisa kholopjaknai abo tẃi bwlam snam di.

¹²Tei khaksa bara bwkhakno khe rínokni uklogo khachi di.

¹³Hakhe sentimitar bara bachi kolok bwkhakni babainwino ríni nokni saka-o kholopjakna bagwi khachiui rw di.

¹⁴“Nwng kholopjaknai kangnwi snam di, kangsa khe pun bukur pherejakni tei kangsa khe naithok bukurni abo sakani kholopjaknai wngnai.

¹⁵“Ríni nokni núkhúngni bagwi akai ya buphangni bwklap snam di.

¹⁶A bwklap lapsa mitar kaibrwi kolok tei dokchi sentimitar kuar wngnai,

¹⁷bwlap kwnwinino baksa khe thepanani bagwi kwnwi, kwnwi khe yakung tongna nangnai.

¹⁸Nwng rínokni bagwi nwichi bwlap snam di, abo nwichi bwlap salgrabai bwkhak wngnai;

¹⁹tei a nwichi bwlapni yaphango brwichi rukphaini uásúng snamwi rw di, bwlap kaisani bagwi yakung kongnwini bagwi uásúng kwnwi tei kubun bwlapni bagwibo bórokni yakung kongnwi mareui’-no uásúng kwnwi kwnwi khe ma rwnai.

²⁰Tei rínokni tei kaisa-o salsibai bwkhakni bagwi bwlap lap nwichi;

²¹o borokni bagwi kong brwichi uásúng nangnai; kaisa kaisa bwklapni bagwi uásúng kongnwi tei kubunrokni bagwibo kongnwi kongnwi uásúng.

²²A rínokni salthángbaini uklokni bagwi lap dok bwklap ma khlainai.

²³Tei rínokni uklokni busup kwnwini bagwi kwnwi kwnwi bwklap snam di.

²⁴Busupni a bwklap khe khama bai saka bwkhak thepajak wngnai tei saka bai kwrwng laijak wngnai. A bwklap kwnwirok bai omo hai khe’-no busup kwnwi snamjaknai.

²⁵Aro lap char bwklap wngnai tei a bwklaprokni bagwi rukphaini uásúng kongchidok wngnai, bwklap lapsani kwnwi-o uásúng tei lapsa bwklapni uásúng kongnwi wngnai.

²⁶“Hakhe nwng rínokni bagwi kong ba akaia buphangni berepjaknai bokong ma snamnai, yasa bwkhakni bagwi bokong kong ba,

²⁷tei kaisa bwkhakni bagwi tei bokong kong ba, uklokni salthángbaini bagwi.

²⁸Kwcharni bokong khe abo yasani simi tei yasa jora kwrwngjak ma wngnai.

²⁹A bokhongrokno rangchak bai ma khobnai tei berepjaknaino kwcha rwnani bagwi rangchakni bokhong ma snamnai tei berepjaknairoknobo rangchak bai ma khobnai.”

³⁰“Hathái-o ang nono phunukma hai kheno nwng a rínokno ma songchanai.

³¹“Nwng kwkhrang, chaksru-sru tei kwchak bumulni mera buikhumuni khutwngni naithok khe takjak rísa snam di. Aro o cherubni mangtang ma snamnai.

³²Tei nwng abono rangchak khopjak akaia buphangni snamjak thong kaibrwi saka-o biching bai khachiui rw di tei rukphaini uásúngo abono achuk rwna nangnai.

³³Rínokni núkhúngni bichingo khe a ríno khachiui rw di tei rí swngjakni bisingo khe swmai bokhokno ton di, a rí swngjak abo kwcharo tongwi kwthar kuk bai kwtharno khaknai.

³⁴Swmai bokhokni saka-o khe a khairokmung achukthaino kwthar kugo ma tonnai.

³⁵Rí swngjakni phataro tei rínokni yaksi bwkhak a songphangno ton di tei yagra bwkhak khe a thopnano ton di.

³⁶“Hapma duglamni bagwi rí swngjaknai ma snamnai, abo kwkhrang, chaksru-sru tei kwchak mera buikhumuni khutwng bai tei suchi bai rapjak wngna nangnai.

³⁷A rí swngna bagwi akaia buphangni thong kongba nangnai tei a thongrokno rangchak bai khobna nangnai. Aboni bagwi biching ma snamna nangnai tei aboni bagwi pitolni uásúng kongba, ma khlainai.”