Read Kok Borok LAM RWMA 27 Bible Online

LAM RWMA 27 - Kok Borok bible

LAM RWMA 27

¹“Akaia buphang bai háyá snam di. Abo khakbrwi wngnai, tamni hwn khe 2.2 mitar kolok tei 2.2 mitar kuar tei 1.3 mitar kuchuk wngnai.

²Aboni busup subrwio’-no nwng bokorong ma snamnai tei abo háyá bai thansa wngna nangnai, nwng abono pitol bai ma khobnai.

³Nwng thapla yachakna bagwi sorni twk snam di tei bini bagwi tharuk, dangai, sorni busu pwrak tham gwnang yakhep tei hórni bagwi kárai ma snamnai, abórok bebakno pitol bai ma snamnai.

⁴Pitolni bwlam bwlam khlaijak dangai ma snamnai a bwlam gwnang dangaini busup kaibrwini bagwi pitolni bukhunju ma snamnai.

⁵A bwlam gwnang dangaino a háyáni khama-o ton di tei abo háyáni kwchar jora kásukna tẃi khe ton di.

⁶Akaia buphangni balphung snam di, abono pitol bai ma khopnai,

⁷tei a háyáno balwi tẃi phuru khe hatrai-o khe balphungno ma soranai. Háyáno bal phuru khe babainwi-o’-no balphung ma tongnai.

⁸A háyáno buphang bwlap bai bugurung khe ma snamnai; hathái-o phunukma hai kheno bororok abono ma snamnai.

⁹“Nwng tabuk a rínokni phataro tei kaisa khotol ma snamnai, a khotolni yagra bwkhak 44 mitar rí kaham bai ma swngnai;

¹⁰tei abórokni nwichi pitolni thongla ma snamnai aboni logi nwichi pitolni uásúng ma snamnai, tamo khe thonglani biching bai bokong rukphaini ma taknai.

¹¹Tei abo hai kheno khotolni yaksi bwkhak muk sara kolok ríni bengki khachina nangnai, aboni bagwi kongnwichi thongla tei kongnwichi uásúng pitolni ma wngnai tamo khe thonglani biching bai bokong khe rukphaini ma wngnai.”

¹²Salthángbai, kebeng bwkhak khe khachijak 22 mitar kolok rísa aboni bagwi thongla kongchi tei uásúng kongchi ma snamnai.

¹³Salkabai bwkhak a khotol uarmani 22 mitar kuar.

¹⁴Duglam bwkhak khachima kaisa phaising 6.6 mitar rísa aboni logi thong kongtham tei uásúng kongtham ma tongnai.

¹⁵Abo hai kheno tei babaisabo muk chiba ríni bengki tei thongla kongtham tei uásúng kongtham wngnai.

¹⁶Duglamni bagwi kwkhrang, chaksru-sru bumulni tei kaham mera buikhumuni khutwng bai supjak 9 mitar kolok rísa ma tongnai abo bebakno khutwngni supjak wngna nangnai. Abo thongla kaibrwi tei aboni kongbrwi uásúng ma tongnai.

¹⁷Khotol kitingwi thongla tongmarok rukphaini bokong bai manjujak wngnai tei aboni bichingrok khe rukphaini tei uásúng khe pitolni wngna nangnai.

¹⁸Khotol 44 mitar kolok, 22 mitar kuar tei 2.2 mitar kuchuk ma wngnai. Khachima a rísarok khe kaham khutwng bai snamjak tei pitolni uásúng ma wngnai.

¹⁹Rínokni bebak manwirok tei rínokni khotolni bebak manwirok, khurirok pitolni ma snamnai

²⁰Nwng Israil bororokno chati mwchẃngna bagwi kaham kuk olibni thok tubuna bagwi dagi di. A chatino mwchẃng phlai máng tonna nangnai.

²¹Aron tei bini bwsarok rínokni swmai bokhokni bwskangni rí swngjakni phataro a chatino nai phlai máng ma tongnai. Aro ani bwskango a chatino sanjani simi phung jora mwchẃng phlaiwi ma tonnai. O dagimano Israil tei bini bosongrok kusung kusung ma tẃi phlainai.