Read Kok Borok LAM RWMA 28 Bible Online

LAM RWMA 28 - Kok Borok bible

LAM RWMA 28

¹Nini takhuk Aron tei bini bwsarok Nadab, Abihu, Eliasar tei Ithamarsongno nini thani ringwi tubu di. Bórokno Israil bororokni bisingni swkagwi tubu di, tamni hwn khe bórok ochai wngwi ano ma monnai.

²Tei nwng nini takhuk Aronni bagwi kwthar kanmung chummung snam di, abo bini chẃngsacha tei naithokna bagwi se.

³Ang bai elem rwjak uansukna kwrwng bebak rí takna kwrwngrokno Aronno kwthar khlaina bagwi rí tak di hwnwi dagi di.

⁴Bórokno khaklap khajaknai rísa, chumjaknai kamchwlwi, khutwng kaham bai supjak kamchwlwi, motok tei chango khajaknai rísa snamna bagwi sa di. Bórok abo hai ochaini rí kanmung chummungno nwphayung Aron tei bini bwsarokni bagwi ma snamnai tamni hwn khe bórok ochai wngwi ani samung ma tangnai.

⁵Rí takna kwrwngrok kwkhrang, chaksru-sru tei kwchak mera buikhumuni kaham khutwng, rangchakni khutwng tei naithok khutwngrok bai kanmung chummung ma snamnai.

⁶Tei bórok kwkhrang, chaksru-sru tei kwchak mera buikhumuni kaham khutwngni ephod ma snamnai tei kaham khe khutwng bai supjak ma wngnai.

⁷Aboni buchuk kwnwi-o kwrwngjak bangorani bagwi kangnwi rísa tongnai. Abórok bebakno phnangjak wngnai.

⁸Naithok khe snamjak ephodni changduk aboni sakanibo abo haino ma wngnai; rangchak, kwkhrang tei kochual tei chaksru-sru tei kaham lilonni ma wngnai.

⁹Karnilian holong kwnwi na di tei aro Israil bwsarokni khorokchinwini bumung tankhurwi swi di;

¹⁰holong tháisa-o khorokdokni bumung tei tháisa-o tei khorokdokni bumung swi di, abórok bebakno bórokni achai phuruni bumung ma wngnai.

¹¹Nwng yasitemo bumul snamnairok khlaima hai khe holongo swinairokno a holong tháinwi-o Israil bwsarokni bumung swiwi rw di tei kaham khe rangchak bai khop di.

¹²Tei Israil bwsarokni muituni bagwi ephodni saka-o khe abórokno kha di. Aron Subraiyungni bwskango bini phairukung kwnwi-o khe muituni bagwi bumungrokno ma tẃinai.

¹³Rangchakni tángnwi snam di,

¹⁴rangchak kaham bai khe rabwi twngnwi sikol hai khe snamwi a bwtangno aro ma thepanai.

¹⁵Tei tang kwrwngni snamma bai khe bujni bagwi khaklap thepajaknai snam di; ephodni samung hai khe abono khlai di; tei abo rangchak, kwkhrang phantokbar, kwchak tei abo lilonni kaham khutwng bai khe snam di.

¹⁶Abo busup brwi tei thepnwi khe thepjak wngnai; abo 22 sentimitar kolok tei 22 sentimitar kebeng wngnai.

¹⁷Abono holong morok bai khe bwtang kaibrwi khe ma khobnai; aboni swkangni bwtangno khe rubi bai tei kaisa khe topas bai tei kaisa khe garnet bai ma khobnai;

¹⁸bwtang kwnwi-o khe emarlad saphir tei hira bai ma khopnai.

¹⁹Bwtang táng thamo khe tarkus tei aget tei ametis bai ma khopnai.

²⁰Tei bwtang tángbrwi-o khe beril, karnilian, jasparrokno khe rangchak bai ma thepanai.

²¹A bebak kainwichi holongthai-o Israilni kaisa kaisa bosongni mungno tankhurwi ma swinai.

²²Tei nwng rangchak kaham bai khe khaklap thepajaknai saka-o khe kotok táng hai khe tángnwi buduk ma snamnai.

²³Tei khaklap thepajaknai saka-o kainwi rangchakni hatrai snamwi rw di tei khaklap thepajaknaini buchuk kwnwi-o a hatraino khaui rw di.

²⁴Tei a khaklap thepajaknaini buchukni a hatrai kwnwi-o khe sókjak rangchakni a kwnwi budukno ton di.

²⁵Ephodni bwskang bwkhak phairkungni buduk saka-o rangchakni buduk tongma bai a rangchakni budukni tei kaisa buchuk bai kwcha rwui ma rwnai.

²⁶Abono karwi tei kainwi rangchakni hatrai snamwi khaklap thepajaknaini busu kwnwi-o ma thepanai.

²⁷A kwnwirok ephodni samo khaklap thepajaknaini bisingo tongnai. Tei abono karwibo tei kwnwi rangchakni hatrai snamwi ephodni phairkungni budukni botok bwkhakni ephodni bwchang khajaknaini saka-o supjak tongma-o abono thepaui rw di.

²⁸Aboni ulo khe khaklap thepajaknaini khamani a hatrai tongma bai khe bwchangni khajaknai hatraino kwkhrang buduk bai kha di. Abo hai hwn khe a khaklap thepajaknai ephodni sakani konorwi tháng glak.

²⁹A kwthar khotolo tháng phuru khe Aron ani dagimano saui manna hwn khe o khaklap thepajaknai saka-o Israil bwsarokni mung swijak a khaklap thepajaknaino tẃiwi ma hapnai. O khaklap thepajaknai Subraiyungni bwskango bórokno cho yaui muitu khe tonnai.

³⁰Khaklap thepajaknaini bethebo khe urim bai thumim[21] ma tonnai. Abo hai khe Aron Subraiyungni bwskango tháng phuru khe abórok bini khaklabo tongnai. Abo hai khe Aron Israilrokni bagwi ani dagimano Subraiyungni bwskango bwkha-o muitu wngwi ma tong phlainai.

³¹Ephodni bisingo kamchwlwi lolang tongmani abo bebakno khutwng kwkhrang bai ma snamnai.

³²Abo gwdna phiyokjak tei kichik ya wngna bagwi abono kitingwi gana kwrak khe ma supnai.

³³Kwkhrang, chaksru-sru tei kwchak khutwng bai khe dalim bwthái snamwi a kamchwlwini buchuk kitingwi’-no abono khachiui ma rwnai tei kwchar kwcharo khe rangchakni beleprok tongnai.

³⁴Abórokni kwchar kwcharo khe rangchakni belep ma rwnai buchukni bebak rapjago khe dalim tháisa khe tei belep kaisa khe tongnai

³⁵Subraiyungni samung tang phuru khe Aron o kanmungno ma kannai. Bo a kwthar khotolo Subraiyungni bwskango tháng phuru tei aroni ongkhorwi phai phuru khe a belepni khorang khnanai tei abo bai’-no bo thwi glak.

³⁶“Rangchak kahamni kaisa bwlap snamwi abono yasitem saka-o swima hai khe; ‘Omo Subraiyungni bagwi kwthar khlaijak’ hwnwi aro ma swinai.”

³⁷Abono kwkhrang buduk bai khe khaui khorok sorjaknai bai khe ma thepanai; abo khorok sórjaknaini bwskango ma wngnai.

³⁸Omo Aronni talikha saka-o ma tongnai. Israilrok bebak kwthar manwi yapharna hwnwi tubumarok aboni bebak majrarok Aronno ma rujunai. Subraiyung bórokno yachakna tẃi khe Aronni talikha saka-o a bwlap khachijak khe máng ma tongnai.

³⁹“Ochaini a bisingni ríno lilon kaham bai ma taknai tei khorok sórjaknaibo lilon kahamni ma wngnai. Tei bwchang khajaknai khe suchi bai rapjak wngna nangnai

⁴⁰“Aronni bwsarokni bórom tei mwchangna bagwi kamchwlwi, bwchang khajaknai tei khorokni thupjaknai snam di.”

⁴¹Nini takhuk Aronno tei bwsarokno a rí-chum kan rwui nwng bórokno thok bai khe ochaini bagwi chong di. Subraiyungni samungni bagwi nwng bórokno khagwi ton di omo hai khe bórok ochai wngwi ochaini samung tangwi mannai.

⁴²Nwng Lilonni bisingo kanjaknai snam di, abo bwchangni simi yaphung kwrwngjak ma wngnai.

⁴³Aron tei bini bwsarok kuthumma rínogo eba kwthar háyá bwskango samungni bagwi hap phuru khe bórok a bisingo kanjaknaino ma kannai. Omo bai khe bórok majra kwrwi wngwi tei thwina nang ya wngnai, omo Aron tei bini bwsarokni bagwi tong phlainai raida wngnai.