Read Kok Borok LAM RWMA 29 Bible Online

LAM RWMA 29 - Kok Borok bible

LAM RWMA 29

¹“Ochai wngwi bórok ani samung tangwi manna bagwi nwng omo hai khe bórokno kwthar ma khlainai. Nwng musuk chwla masa tei mera maknwi na di. Abórok mungsa khait kwrwi wngna nangnai.

²Tei aboni ulo khe moida kaham kwsap bai khe chuan kwrwi thok buljak auang tei thok phuljak chuan kwrwi moidani auang snam di.

³Abórokno kaisa topongo khe ma tonnai tei a musuk chwla bai mera maknwino bo ma tubunai.

⁴Nwng Aron bai bwsarokno kuthumma rínokni hapma duglamo ani bwskango tubu-ui phai di tei bórokno kwthar wngna bagwi twi bai sú di.

⁵Aboni ulo khe Aronno ochaini rí-chum kan rw di kamchwlwi, ephodni buduk tei ephodno tei khaklap kholopjaknai bwlapno kan rwi rw di tei tak kwrwng bai naithok khe takjak bwchang khajaknai ephodno khaui rw di.

⁶Tei aboni ulo khe khorogo rí sórwi rwi di tei aboni saka-o kwthar motok thubui rw di.

⁷Aboni ulo khe chongthar chongmani thok naui bokhorogo lu-ui rwi bono chongthar chong di.

⁸“Hakhe nwng bini bwsaroknobo tubu-ui bórokno kamchwlwi chum rw di;

⁹tei nwng bórokni bwchango changni rí khaui rw di, Aron tei bwsarokni khorogo khorok thupjaknai thubui rw di; tei ochaini samung bórokni’-no wngnai; tei nwng Aron bai bwsarokno kwthar khe khak di.

¹⁰“Hakhe nwng musuk chwlano ani thani kuthumma rínogo tubu di tei Aron bai bwsarokno sa di, bórok aboni khorogo bórokni yak ma beranai.

¹¹Tei nwng kuthumma rínogo hapma duglamo Subraiyungni bwskango a musuk chwlano ma ratharnai.

¹²Tei nwng musukni kisa thẃi naui yasi bai khe háyáni buchugo phulwi rw di tei bára thẃino khe háyáni yaphango lukhlai rw di.

¹³Aboni ulo khe bohok bisingni sakani bebak buphamno, bwkhani bahan kahamkukno tei kainwi pulino bupham sablu-ui háyá saka-o sógwi pái di.

¹⁴Tamo khe musuk chwlani bahan, bukur, bikhi, bubuk bebakno Israilrokni tongthaini hakchalo khe tlangwi sógwi rwi di. Omo wng kha sumsokni yapharmung.

¹⁵“Nwng ulo khe a mera maknwini bere masano tubu-ui phai di. Aron bai bini bwsarok a merani khorogo yak beranai.

¹⁶Aboni yagulo khe a merano ratharwi thẃi naui a háyáni babaibrwi-o ma sarnai.

¹⁷Ulo khe a merano bophon bophon khe ma kwraknai bini yakung tei bubukno su-ui naui tei kubun bophonrok bai kwrẃngsa-o khe bokhorogo ma beranai.

¹⁸Aboni ulo khe bebakno háyá saka-o khe sógwi pái di. Omo Subraiyungni bagwi sógwi yapharmung, aboni báhaino Subraiyung motomjago.

¹⁹“Aboni ulo tei mera masano na di tei Aron bai bini bwsarok aboni bokhorogo bórokni yak beranai.

²⁰Ulo khe merano ratharwi aboni kisa thẃi naui Aron bai bini bwsarokni yagrani khunju bubago ma phulnai tei yagra yak bai yakungni yasima bura-o ma phulwi rwnai. Abono karwibo bára thẃino khe naui háyáni babaibrwi-o sarwi rw di.”

²¹Aboni ulo kisa chongthar chongma thokrok bai háyáni kisa thẃi naui Aron bai bini bwsarokni sago sarwi rw di tei kanmung chummungobo sarwi rw di. Abo hai khlaima bai bo tei bini bwsarokno kwthar khlaima klai anw.

²²“Aboni ulo nwng a merani buphamno, bupham kupulung khituma, bohok bisingni bupham, bwkhani bahan kaham, bupham gwnang puli kwnwi tei yagrani biyano na di.

²³Aboni ulo Subraiyungni bwskango tonma chuan buljak ya auangni topongni kaisa, thok bai bului serjak lepsa tei moidani auang lepsa na di.

²⁴Tei o chámungrokno bebak Aron bai bini bwsarokni yago rw di tei bórok omo ano Subraiyungni bwskango sibwi yapharmung yaphar thung.

²⁵Aboni ulo khe abono bórokni yakni na di tei háyá saka-o khe sógwi pái di. Omo wng kha Subraiyungni thani sógwi yapharmung, omoni báhaino bo motomjago. Omo wng kha Subraiyungni thani sógwi yapharmani.

²⁶“Tei nwng Aronno chongthar chongmani merani khaklabno na di tei Subraiyungni bwskango sibwi yapharmung yaphar di tei o mui banta nini bagwi wngnai.”

²⁷Aron bai bini bwsarokno ochai chong phuruni sibwi yapharma merani khaklap bai biyani bahan Subraiyungni bagwi khagwi tonmani abo Aron tei bini bwsarokni se.

²⁸Omo hai khe Israilrok kwthama yapharmung yapharmani a bebak muino Aron bai bwsarokno rwjaknai. Omono wngnai Subraiyungni bagwi Israilrokni yapharma.

²⁹“Aronni a kwthar rí-chumrokno bini yagulo bwsarokno ma yapharnai, ochai chongjak phuru khe bórok omono ma chumnai.

³⁰Aronni yakchu-o ochai chongjaknai bini bwsa, kwthar rínogo ani bwskango monna thángnaisa o rírokno salsni jora chumwi’-no ma tongnai.

³¹“Nwng a chongthar chongmani a merani bahanno na di tei kwthar khotolo abono ruk di.

³²Aron tei bini bwsarok topongo tong rwkma auang bai bahanno a ríni nokni duglamo cháui ma páinai.

³³Bórok a kwthar khlai khalijak tongmarokno ma chánai tei phataro tongnairok abórokno ta chá thung. tamni hwn khe omo wng kha kwthar.

³⁴A chá bai ya tong rwkma bahan tei auangrok phung jora bára tong rwk khe abono hóro sógwi ma páinai, abono chá maya tamni hwn ba abo wng kha kwthar.

³⁵“Ang dagima hai khe’-no Aron bai bini bwsarokni chongtharni bagwi salsni jora chongtharni o samungno ma khlainai.

³⁶Nwng sumsok nakarjakna bagwi sal brúm musuk chwla masa khe ratharwi ma yapharnai, omo bai khe háyáno kwthar wng rwnai Aboni ulo khe abono kwthar khlaina bagwi thok phul di.”

³⁷Omo hai khe salsni jora súcha di tei abono kwthar khlai di tei abo kwthar kuk háyá wngnai; a háyáno tangnaibo kwthar wngna nangnai.

³⁸“Sal brúmno kusung kusung nokha bisa umorni mera bwsa maknwi háyá-o ma ratharnai.

³⁹Masano phungo tei masano sarigo háyá-o ma ratharnai.

⁴⁰Swkangni merani baksa khe moida kaham kilo kaisa bai khe tei olibni thok kaham bai khe yaphar di. Tei baksano khe litar kaisa angur bwtwi nungmung yapharmungni bagwi lukhlai rw di.

⁴¹Tei masano khe sarigo yaphar di. Abonobo phungo chámung tei nungmung yapharma hai kheno yaphar di. Omo wng kha Subraiyungni motomjakmani hóro sógwi yapharmung yapharma.

⁴²Tei o sógwi yapharmungno rínogo hapma duglamo ani bwskango kusung kusung ma yapharnai. Arono ang ani bororok bai malainai tei nwng bai khe kók sanai.

⁴³Aro ang Israil bororok bai malainai tei ani phaimani a chẃngsacha bai abono kwthar khlainai.

⁴⁴Ang a rínokno tei a háyáno kwthar khlainai tei Aron bai bini bwsarokno ochaini samung tangna bagwi chongthar chongnai.

⁴⁵Ang Israil bororokni bisingo tongnai tei ang bórokni Kaitor wngnai.

⁴⁶Tei bórok ang’-no bórokno ha Ijipni tikhlai tubunai Subraiyung Kaitor hwnwi saui mannai tei angbo bórok bai tongwi mannai; tamni hwn ba ang’-no bórokni Subraiyung Kaitor.