Read Kok Borok LAM RWMA 3 Bible Online

LAM RWMA 3 - Kok Borok bible

LAM RWMA 3

¹Musi, bwkra Jethroni merarokno mwrwgwi tongo. Jethro wng kha Midian hani ochai. Bo merarokno salsibaini haphar bukcha tẃi khe tubu-ui Horebo sók phai kha, abo Kaitorni hathái.

²Subraiyungni suari hórni bising tẃi khe satasuta-o bo bai nukjak kha, bo a satasuta-o hórjlai le nugo phiya abo kha se kham ya.

³Hakhe Musi hai hwnwi sa kha, “Ang samo thángwi kwmamsingchano nai anw tamo a satasutarok kham ya wng.”

⁴Subraiyung Musino nainani bagwi samo sederwi phainani nai tongmano nuk kheno Kaitor a satasuta-o tongwi “Musi, Musi!” hwnwi ring kha. Hakhe Musi, “Tamo, ang oro se,” hwnwi sa kha.

⁵Hakhe Kaitor hai hwnwi sa kha “Samo ta phai di; nini yakungni yaklap sokok di, nwng bachaui tongma a ha wng kha kwthar.”

⁶Bo hai hwnwi sa kha, “Ang nwphani Kaitor, Abrahamni Kaitor, Isakni Kaitor tei Jakobni Kaitor.” Hakhe Musi Kaitorno naisikna kiriui mwkhang kholop kha.

⁷Hakhe Subraiyung hai hwnwi sa kha, “Ang ha Ijibo tongnai ani bororok sátokjakmano nuk kha, bórokni samung tang rwnairok bai sátokjagwi kap laimano khna kha. Ang bórokni tektono si-o.

⁸Ang bórokno ha Ijipni bororokni yakni phiyókna bagwi ongkhorwi phai kha. Tei a hani tikhlaiwi kaham tei kuaro, dut tei piya bwtwi kochokjak ha-o tlangnai. Kanansarok, Hitisarok, Amorsarok Peressarok, Hibisarok tei Jebussarokni ha-o tlangnai.

⁹Nai di, tabuk Israil bororok kap laimani ani khunju-o sók phai kha tei Ijipsarok bórokno bahai khe sátok-pitok khlai ang nuk kha.

¹⁰Phai di, ang nono Pharaoni thani rwi rohornai, nwng ani borok, Israilrokno ha Ijipni tikhlai ma tubunai.”

¹¹Tamo khe Musi Kaitorno hai hwnwi sa kha, “Ang le sabo ba, Pharaoni thani thángwi Israil bororokno Ijipni tikhlai tubunai?”

¹²Kaitor hai hwnwi sa kha, “Nwng bororokno Ijipni tikhlai tubu phuru khe ang nwng bai tongnai; tei nwng ano o hathái-o ma surinai, omono ang nono rohormani mari wngnai.”

¹³Hakhe Musi Kaitorno sẃng kha, Israilrokni aro sógwiwi sa phuru khe, norokni chuchusongni Kaitor se ano rohoro hwnwi sa khe tei bórok ano bini bumung tamo hwnwi sẃng khe, bórokno ang tamo hwnwi sanai?

¹⁴Kaitor Musino hai hwnwi sa kha, “Ang ang’-no”[6] bo Musino sa kha, “Ang ang’-no nono rohoro hwnwi Israilrokno saui di.”

¹⁵Kaitor Musino hai hwnwibo sa kha, “Israilrokno hai hwnwi saui di, ‘Nini chuchusongni Subraiyung Kaitor, Abraham tei Isakni Kaitor, Jakobni Kaitor se norokni thani rwui rohoro, mol brúm brúm ani mung omo hai’-no. Tei omo hai khe bosong mathe bai muitu khlaijak máng tongnai.’ ”

¹⁶Israilni tẃiphangrokno thángwi hai hwnwi saui di. “Norokni chuchusongni Subraiyung Kaitor, Abraham, Isak tei Jakobni Kaitor ang bai nukjagwi sa kha tei ang naikhlai nuk kha, Ijiprok norokno tamo khlaiwi tong kha;

¹⁷tei ang kók rw kha, ‘Ang norokno Ijiprokni aro sátokjakmani yakni phiyógwi Kanansarokni, Hitisarokni, Amorsarokni, Peressarokni, Hibisarokni tei Jebussarokni ha-o tlangwi thángnai, a ha dut tei piya bwtwi bai kupulung.’ ”

¹⁸“Ani bororok nini samarokno khnanai, hakhe nwng Israilni tẃiphangrok bai Ijipni habugrani thani thángwi hai hwnwi saui di, ‘Hibrurokni Subraiyung Kaitor baithang chwng bai nukjak kha. Tabuk salthamni lama thángwi hasing panthoro chini Subraiyung Kaitorno ratharwi yapharna bagwi chwngno rohor di.’

¹⁹Ang saui mano, Ijipni habugra yak kwrak bai khlai rwjak ya khe rohor glak.

²⁰Hakhe ang ani yak phologwi Ijipno uanamasingcha bai khe swpraknai. Abo hai ang aro khlainai. Aboni ulo bo norokno yakarwi rohornai.

²¹Ang o borokno Ijiprokni thani khá phur rwnai, norok tháng phuru khe bukcha tháng glak.

²²Tamo khe bebak bwrwirokno bórokni nok arini bwrwirokni thani rangchak, rukphai, uakhum, toyarok tei rí-chumrok sanwi na di tei norok sajwk-sajlasongrokno abono kan rwui tẃi di, abo hai khe norok Ijipni borokni rang rírokno tlangwi tháng di.”