Read Kok Borok LAM RWMA 30 Bible Online

LAM RWMA 30 - Kok Borok bible

LAM RWMA 30

¹“Nwng Satrai sóknani bagwi akaia buphangni háyá kaisa snam di.

²Abo khakbrwi wngna nangnai, 45 sentimitar kolok tei 45 sentimitar kuar tei 90 sentimitar kuchuk wngna nangnai, bini busu khe abo bebakno baksa kheno snamjak wngnai.

³Háyáni saka bebak kitingwi tei busurok bebakno rangchak kaham bai khe ma khopnai tei aboni buchuk kaibrwi-o tongnai rangchakni bokhong bai khop di.

⁴A bokhongo khe rangchakni kainwi abono balna bagwi snam di tei aboni páithakni gana-o kainwi balphung bai balna bagwi abono thepa di.

⁵A balphungrokno akaia buphangni snam di tei abórokno rangchak bai khop di.

⁶“Háyáni swmai bokhok tongmani a rí swngjakni bwskango khe khairokma achukthayungni bwskango khe ton di. Ang arono nwng bai khe malainai.”

⁷“Phung brúm o Aron a chatino tiyar khlaina phai brúmno, bo aro satrai motomno ma sóknai.

⁸Tei Aron sarigobo omo hai khe’-no ma khlainai. O satrai sógwi yapharmano bo kusung kusungno Subraiyungni bwskango ma khlainai.

⁹Nwng o háyá-o mungsa sókma ya manwino ta sók di, mungsa sógwi yapharmungbo ya tei mungsa bwthái bwchlwi yapharmungbu ya tei mungsani nungjaknai oro yapharwi man glak.

¹⁰Tei Aron bisi brúmno uáisa o háyáno kwthar khlaina bagwi mui ratharwi aboni thẃino kaibrwi busubo khe phulwi ma rwnai, sumsok sújaknani bagwi omo hai kheno kusung kusung o samungno ma khlainai. Omo Subraiyungni bagwi kwthar kuk háyá.”

¹¹Subraiyung Musino hai hwnwi sa kha,

¹²“Nwng Israil bororokno lekha phuru khe, Israilrokni bokhorok matheno ano bórokni langmani bagwi dormai ma rwnai. Omo hai khlai khe lekha phuru bórokni saka-o mungsa phano digi-sigi nang glak.

¹³Lekhama-o khopjak bebakno rwna nangmani rangni khaksa háyá-o ma rwnai tei khaksa khe Subraiyungno ma rwnai.

¹⁴Lekha phuru-o khopjaknairok, bisiknwichi umorni tei aboni bárani umorrok abo swk rangno ma rwnai.

¹⁵Bórok langmani súchana bagwi rang rw phuru khe gwnangbo kwbáng ma rw ya tei bigrabo kisa ma rw ya.

¹⁶Hakhe nwng o súchamani rangno Israilrokni thani na di, omono ani rínokno snamwi tonna bagwi swbai di. O rang nama wng kha nini langma súchana bagwi tei bórok Subraiyungno muitu khlainai.”

¹⁷Subraiyung Musino hai hwnwi sa kha,

¹⁸“Nwng pitol bai khe dangai kaisa snam di, abo wng kha súnani bagwi, abono rínok bai háyáni kwcharo khe ma beranai, aro twi lukhlai ton di.

¹⁹Aron bai bini bwsarok a twi bai khe yak tei yakung ma súnai,

²⁰chámung yapharmung yapharna swkang rínogo hapna phuru khe tei háyá bwskango thángna phuru khe abo hai khe ma súnai. Omo hai khe bórok butharjak glak.

²¹Thwi ya tẃi khe bórok bórokni yakung yak ma súnai. O raidano bórok tei bórokni bosongrok kusung kusung ma tẃinai.”

²²Subraiyung Musino teibo hai hwnwi sa kha,

²³“Kaham kuk mosla bwtwi na di, kilogram kaidok mur belengtwi, kilo kaitham darchini motom tei kilo kaitham motom bokong,

²⁴tei kilo kaidok darchini bwkhrwi tei litar kaibrwi tháistwini thok bul di,

²⁵tei nwng kwthar chongtharni thok snam di, motom bwtwi khe bul di.

²⁶Tei nwng ani rínogo omono phul di, a swmaini bokhoknobo phul di,

²⁷tei songphango tei aroni bebak manwi-o, thopna-o tei aroni manwirogo tei satrai sókma háyá-o,

²⁸tei sógwi yapharma háyá-o tei abo bai baksa tongma bebak manwi-o tei súmani a dangai bai abono tonmanobo phul di.

²⁹Nwng o manwirokno omo hai khe yaphar di, hakhe abórok bebakno kwthar wng suknai tei khoroksa swk phano eba mungsa swk phano abono nangna khe kwthar wngna nangnai.

³⁰Hakhe Aron bai bini bwsarokno a thokno phul di tei ani samungni bagwi bórokno ochai chong di.

³¹Tei nwng Israilrokno o kókno sa di, ‘O chongthar chongmani thok kusung kusungno ma phnangnai.

³²Omono haino borok bánglani saka-o lu-ui man glak tei nwng omo hai gothok rwui tei mungsabo ma snam glak, tamni hwn khe, omo wng kha kwthar, omo nini bagwi kwthar.

³³Khoroksa swk phano omo hai mungsa swk snam khe tei ochai ya borok khoroksa swk phul khe a borok bo bini bororok bai swkakjaknai.’ ”

³⁴Tei Subraiyung Musino hai hwnwi sa kha, “O motomnai bebaknono baksa khe na di, gulgul, nataph, onicha, gulbanu tei sói satrai na di.

³⁵Omorokno motom manwi snam thani na di tei thok motom bul tẃi khe bul di. Abono sói khe tei kwthar khe tonna bagwi sóm bai khe bul di.

³⁶Aboni bisingni kisano kwsap khlai di tei kuthum laima ani rínogo abono tlang di tei abono swmai bokhokni bwskango sarwi rw di. Ang aro nwng bai malainai, omo wng kha nini bagwi kwthar kuk.

³⁷Tei norok norokni sakni bagwi omo hai mungsa satrai motom ta snam di. Omono norok Subraiyungni kwthar manwi hwnwi rom di.

³⁸Khoroksa swk phano sakni bagwi hwnwi omo hai khe sak motomna hwnwi snam khe, abórok bini bororok bai swkakjaknai.”