Read Kok Borok LAM RWMA 31 Bible Online

LAM RWMA 31 - Kok Borok bible

LAM RWMA 31

¹Subraiyung Musino hai hwnwi sa kha,

²“Ang Juda dophani Hurni busuk, Urini bwsla Bejalelno saiwi na kha,

³Tei ang bono Kaitorni phola bai kupulung khlai kha, simung bai tei rwngmung bai tei bebakni-o tang kwrwng khlai kha,

⁴tei naithok bumul khe samung tangna bagwi tei abórokno rangchak, rukphai, pitol bai samung tangna bagwi,

⁵holongthairokno khrop khrop khe phnangna bagwi tannani; buphangni samung tangnani tei bebak naithok bumulni samung tangna bagwi phan rwjak kha.

⁶Dan bosongni Ahisamakni bwsla Oholiabno bo bai samung tangna bagwi ang bono rw kha. Tei ang dagimarok hai khe tangwi manna bagwi tang kwrwngroknobo bwkha-o rwngmung rw kha.

⁷Kuthum laima rínok tei swmaini bokhok tei bini khairokma achukthayung tei aro bebak samung tongmarok tei rínokni bebak manwirok,

⁸tei songphang tei aroni bebak manwirok, thopna kaham tei bini manwirok, satrai sókna bagwi háyá,

⁹sógwi yapharjaknaini háyá tei bini bebak manwirok, dangai tei bini hatrai.

¹⁰Ochaini samung tang phuru chumna bagwi Aron tei bini bwsarokni bagwi rí-chum kaham tei rí kwthar;

¹¹ang dagima hai khe, sago phuljaknai thok tei kwthar háyáni bagwi satrai motom naui bórok khlainai.”

¹²Subraiyung Musino hai hwnwi dagi kha,

¹³“Israilni bororokno o kókno sakhlai di, ‘Ani lenglama salno bórom khlai di, omo hai khe Ang se, norokno kwthar khlainaisa Subraiyung[22] hwnwi saui mannai.

¹⁴Nwng a lenglama salo ma lenglanai abo wng kha nini bagwi kwthar, khoroksa swk a salo lengla ya hwn khe bo butharjaknai. Khoroksa swk samung tang khebo bo bini bororok bai swkakjaknai.

¹⁵Saldok samung tangwi mannai tei salsnini sal wng kha lenglama sal, abo Subraiyungni thani kwthar; khoroksa swk a salo samung tang khe bo butharjaknai.

¹⁶Aboni bagwi Israil bororok a salno bóromni marini bagwi ma narwknai.

¹⁷Omo wng kha ang bai Israilrok bai tong phlainai mari, tamni hwn khe ang Subraiyung nokha bai hano a saldokni salo snam bai kha tei a salsnini salo ang samung tangma mwthak kha tei lengla kha.’ ”

¹⁸Sinai hathái saka-o Kaitor Musino kók sa phai phuru-o, bo bono holong tháinwi yaphar kha aro Kaitor baithang bini yasi bai khe swmaino swiwi rw kha.