Read Kok Borok LAM RWMA 32 Bible Online

LAM RWMA 32 - Kok Borok bible

LAM RWMA 32

¹Lukurok Musino hatháini ongkhorwi phainani dwkmani nuk khe, bororok Aronni thani kuthum lai kha tei bono hai hwnwi sa lai kha, “Phai di chini bwskango himna bagwi chini banta mwtai tagwi rw di; chwngno ha Ijipni tikhlai tubunaisa Musini tamo wng kha chwng saui man ya.”

²Tei Aron bórokno hai hwnwi sa kha, “Norokni hiksongni, bwsarokni tei sajwkrokni khunju-o kanmani rangchakni manwirokno sokogwi ani thani tubu di.”

³Hakhe bebak lukurok bórokni khunjuni manwirokno sokogwi abórokno Aronni thani tubu lai kha.

⁴Hakhe bo bórokni yakni rangchakrokno na kha, a rangchakno hóro sógwi dulsa khe snam kha tei takjaknai manwirok bai khe rangchakni musuk chwla masa tak kha; aphuru khe bórok hai hwnwi sa kha, “Omorokno norokni mwtairok, o Israil omono norokno ha Ijipni tikhlai tubunai!”

⁵Aron abono nuk khe’-no aboni bwskango háyá kaisa snam kha, hakhe hai hwnwi sakhlai kha, “Khwna Subraiyungni bagwi chámung panda kaisa wngnai.”

⁶Teini phung aidrobo bórok sógwi yaphar lai kha tei kwthamungni yapharmungrok tubu lai kha tei lukurok khe chánani achuk lai kha tei nung lai kha tei mwsana bacha lai kha.

⁷Hakhe Subraiyung Musino hai hwnwi sa kha, “Nwng kiphilwi tháng si di; tamni hwn khe nwng ha Ijipni tikhlai tubuma bororok sak sakno dera rw kha;

⁸tei ang dagima lamani dakti’-no phérwi tháng lai kha; bórok sak sakni bagwi musuk bwsani mang khe mwtai tak lai kha tei abono khulum lai kha tei ratharwi yapharwi tong lai kha tei sa lai kha, o Israilrok o mwtaino norokno ha Ijipni tikhlai tubu-o!”

⁹Hakhe Subraiyung Musino hai hwnwi sa kha, “Ang o bororokno nuk kha tei nai di, o bororok kók khna ya bororok;

¹⁰ano saichung khe tong rw gra di, ani jolima kutung bai khe kham rwui páinai tei bórokno sokomorwi páinai; tamo khe ang nini bising tẃi khe dopha kotor snamnai.”

¹¹Hai phano Musi bini Kaitor, Subraiyungno koiwi hai hwnwi sa kha, “Kaitor aswk nini bororokno phankrak bai tei phankrak yak bai ha Ijipni tikhlai tubuma nini bororokno tamo aswk thamchi kaui joli lang?

¹²Tamni bagwi Ijipni lukurokno o kók sa rwnai, ‘Bo ba bwkha sitra tẃiwi da tikhlai tubu, hachuk saka-o butharna bagwi da tubu tei ha sakani sokomorna bagwi da tubu?’ Nini thamchi tungmano yakar ja di tei bwkha hamwi nini bororokno hamya ta khlai si di.

¹³Nini seleng Abraham, Isak, Jakobno nwng sak baithang bórokno kók rwmano muitu wng si di, ‘Ang nokhani athukiri hai khe norokni bosongno er rwnai tei ang norokno harok rwna hwnwi kók rwmani, nini bosongrokno rwnai tei bórok kusung kusungni bagwi mannai.’ ”

¹⁴Hakhe Subraiyung o bororokni hamya khlaina hwnwi chongmani bwkha kiphil kha.

¹⁵Hakhe Musi kiphilwi hathái yaphango dagimung swijak holongthai bwlap kwnwino yago tẃiwi tháng kha abo khaknwnwi’-ono swijak; holongni babainwi-o’-no swijak.

¹⁶Kaitor sak baithang’-no a holong tháinwi-o dagimungrokno swi-o tei Kaitor yak baithang’-no tankhurwi swi kha.

¹⁷Josua bororok chirikhógwi kók samani khorangrok khna kheno, hakhe Musino hai hwnwi sa kha, “Ang batham bisingo ur nang laimani khorang khna kha.”

¹⁸Tamo khe Musi hai hwnwi sa kha, “Abo kwplai wngmani khorang eba abo chenmani khorang buya, tamo khe abo rwchap laimani khorang se ang khna-o.”

¹⁹Hakhe Musi a bathamni samo phaiwi sók phai khe nuk kha, musuk bwsano tei bororok mwsa lai tongmani nugwi belai thamchi tungwi jolijak kha. Ulo hathái yaphango phaiwi bo tubu-ui phaimani a holong tháinwino khitarwi swbai rw kha.

²⁰Bórok snammani a musuk bwsano naui hóro sók kha, ulo hului kwsap khlai kha tei twi bai sabuluwi rw kha. Ulo khe Israil bororokno khan rw kha.

²¹Hakhe Musi Aronno hai hwnwi sa kha, “O bororok nono tamo khlai rwi ba, nwng bórokni saka-o aswk kotor sumsokno khiklai lang?”

²²Tei Aron yachagwi hai hwnwi sa kha, “O ani bugra, ano ta joli ja di; nwng o bororokno saui mano, bórok hamya-o se kubuljak.

²³Tamni hwn khe bórok ano omo hai sa lai kha, ‘Chwngno Ijip hani phiyógwi tubunai Musini tamo wng kha, hakhe chwngno tẃidulna bagwi chini bagwi mwtai tagwi rw di.’

²⁴Hakhe ang bórokno sa kha, bórokni rangchakni kanmungrokno sokogwi ani thani rw phai bai di tei bórok ano rw phai bai kha. Ang abórokno hóro khiklai rw kha tei a musuk bwsa ongkhorwi phai kha.”

²⁵Musi nuk kha, bororok sak bukcha lachimasingcha wngjak (tamni hwn khe Aron arirokni bwskango bórokno sak bukcha khlai rwi lachi rw kha).

²⁶Ulo khe bo bathamni hap-lamo bachaui chirikhógwi hai hwnwi sa kha, “Subraiyungni bwkhak tongnai bororok ani thani phai di?” Ulo bebak Lebini bwsarok bini thani kitingwi kuthumui phai lai kha.

²⁷Tei bo bórokno hai hwnwi sa kha, “Israilrokni Subraiyung Kaitor sa-o, norokni sak sakni sengrokno na bai di tei bathamni bisingo tei phataro ayang uyang tháng di tei bebakno bini takhuksongno tei kichingsongno tei nok arini bororokno butharwi pái di.”

²⁸Lebini bwsarok Musi dagima haino khlai kha tei a salo bórok khorok thamsai ká twtwi bororokno butharwi pái kha.

²⁹Hakhe Musi hai hwnwi sa kha, “Norok tini Subraiyungni samungni bagwi sak sakno kwthar khlai di,[23] sak sakni sajlani bagwi tei bini takhukni bagwi kwthar ma khlainai, tamni hwn khe bo tini norokni saka-o hamari rwui manna bagwi.”

³⁰Teini salo Musi bororokno hai hwnwi sa kha, “Norok belai sumsok kotor khlai kha. Phiya ang tabuk hathái saka-o kasaui Subraiyungni thani thángnai. Ang norokni sumsokni bagwi nakar sannai.”

³¹Hakhe Musi Subraiyungni thani thángwi hai hwnwi sa kha, “A bororok sumsok kotor tang kha. Bórok rangchakni mwtai snamwi abono khulum lai kha.

³²Hai phano bórokni sumsokno nakar ja di; phiya nwng lon ya hwn khe nwng bumung swimani bijapni ani bumungno hu-ui khibi di.”

³³Tamo khe Subraiyung Musino hai hwnwi sa kha, “Ang ani thani sumsok tangnairokno simi se ani bijapni bumung hu-ui khibinai.

³⁴Tabuk tháng si di, ang nono sama a ha-ono bororokno tlang di. Nai di, ani suari nini swkango thángnai. Phiya ang phaiwi bórokni sumsokno nuk phai khe, bórokno bórokni sumsokni bagwi majra rwnai.”

³⁵Ulo khe bórok Aronno phan khe rangchakni musuk bwsa snam rwma bagwi Subraiyung bórokno bok nang rw kha.