Read Kok Borok LAM RWMA 33 Bible Online

LAM RWMA 33 - Kok Borok bible

LAM RWMA 33

¹Subraiyung Musino hai hwnwi sa kha, “O hatháini tháng si di, nwng tei nini bororok Ijip hani tubu-ui phaimani tei ang Abraham, Isak, Jakob tei bórokni bosongrokno ha rwna hwnwi kók rwmani abono rwnai.

²Ang nono chubana bagwi suari khoroksano norokni swkang swkang rohornai tei ang Kanansa, Amorsa, Hitisa, Peressa, Hibisa tei Jebussarokno rwkhlainai.

³Norok tos gwnang ha dut tei piya bwtwi gwnang kaham ha-o se tháng di. Phiya ang baithang norok bai tháng glak. Tamni hwn khe, norok kók khna ya bosong aboni bagwi lama kwcharo nono sokomorwi phano mano.”

⁴Bororok abo hai kók hamya khna kheno bórok khá khamjagwi kap lai kha. Tei mungsa gwina-ganthi kan lai li ya.

⁵Subraiyung Musino hai hwnwi sa kha, Israil bororokno o kókno sa di, “Norok kók khna ya bororok,” mokol muphlik kaisani bisingo’-no ang phaiwi norokno sokomor phainai; aboni bagwi norokni gwina-ganthirok sokok bai di, hakhe ang norokno tamo khlainai khlai ya saui mannai.

⁶Bórok Horeb hatháini simi khe Israilni bororok gwina-ganthi kan lai li ya.

⁷Hakhe Musi a rínokno naui bathamni phataro khe tangwi kha, khungsa bathamni phataro kisa hakchalo. Abono lukurokni kuthumma rínok hwnjago. Tei Subraiyung bai malaina muchungnai borok bo a bathamni phataro lukurok kuthumma a rínogo tháng lai-o.

⁸Musi ongkhorwi rínogo tháng phuru bebak borokrok bacha bacha lai-o tei bórokni rí sak sakni nokni duglamo bachaui tong lai kha tei Musi rínogo hap ya sak naharwi tongo.

⁹Musi rínogo hap kheno thongla hai khe chumui ongkhorwi rínokni duglamo khe tong phai-o tei Subraiyung Musi bai khe kók sa-o.

¹⁰Bororok rínokni duglamo chumuini thongla nuk kheno bórok bachaui sak sakni rínok duglamo tongwi khulum lai kha.

¹¹Borok kiching bai kók sa laima hai khe Musi Subraiyung bai dadak-didik khe kók sa lai-o. Musi bathamo haino hai kiphil khe, sikla khoroksa, Nunni bwsla Josua simi a rínokni kutul li ya.

¹²Musi Subraiyungno hai hwnwi sa kha, “Nai di nwng ahai hwnwi le sa-o ‘Nwng o bororokno a ha-o tlang di;’ tamo khe sabono ani logi rohornai abo tabukbo ano sajak ya kho. Phiya nwng ahai hwnwibo sa-o, ‘Ang nono kaham khe sini-o tei ang nono kaham hwnwibo yachak kha.’

¹³Aboni bagwi tumungno nwng ano hamjak khe, ang nono ma koi ja-o, ano nini khá chongmarokno ano si rw di, hakhe ang nini muchungmano sinai tei nwng bai kaham hwnwi yachakjaknai. O dopharokno nini borok hwnwi yabo yachak kha.”

¹⁴Subraiyung hai hwnwi sa kha, “Ang nwng bai khe tongnai tei lenglamung rwnai.”

¹⁵Hakhe bo bono hai hwnwi sa kha, “Tumungno nwng baithang chwng bai tháng ya khe, chwngno oroni tlangwi ta tháng di.

¹⁶Hakhe khoroksa swk bahai khe ano nwng bai kaham hwnwi yachakjak tei ang tei ani bororokno abo hai khe yachakjak hwnwi bahai khe saui mannai? Nwng’-no chwng bai khe thángwi tongma ya diba, aboni bagwino chwng khe bui bai kosol ya, ang tei ani bororok o ha saka-o juda ya diba?”

¹⁷Subraiyung Musino hai hwnwi sa kha, “Nwng o samano’-no ang khlainai; tamni hwn ba ang nono kaham khe sini-o tei kaham hwnwi yachak kha.”

¹⁸Musi hai hwnwi sa kha, “Ang nono koi ja-o, ano Nini chẃngsachano phunuk ja di.”

¹⁹Hakhe bo hai hwnwi sa kha, “Ang nono ani bebak kahamrokno phunugui tlangnai tei ani mungno Subraiyung hwnwi sakhlainai; ang khairokmano ang khairoknai, ang khásukna hwnmano khe ang khásuknai.”

²⁰Tamo khe bo hai hwnwi sa kha, “Nwng ani mwkhang le nuk glak; tamni hwn ba borok ano nugwi kwthang tongwi man glak.”

²¹Hakhe Subraiyung ahai hwnwi sa kha, “Nai di ani gana-o a holong tong thani-o bacha di;

²²tei ani chẃngsacha láiwi tháng phuru-o khe, ang nono holong besero khe tonnai tei ang láiwi tháng ya sak nono ani yak bai kholobwi tonnai;

²³ulo khe ang ani yak norwi rwnai tei nwng ani mwkhang nuk yaui ani uklok simi nuk rwknai.”