Read Kok Borok LAM RWMA 34 Bible Online

LAM RWMA 34 - Kok Borok bible

LAM RWMA 34

¹Subraiyung Musino ahai hwnwi sa kha, “Nwng swkangni hai holong bwlap lapnwi na di; hakhe ang aro swkango nwng swbai páimani a swkangni hai khe swi phinai.

²Phung-aini bagwi tiyar tong di tei nwng Sinai hathái buchugo ang bai malaina bagwi tiyar wngwi phai di.

³Nini logi o khoroksa phano ta phai thung; tei khoroksa phano a hathái-o ta nukjak thung tei hathái o mera eba musuk ta mwrwkjak thung.”

⁴Hakhe Subraiyung dagima haino Musi holong lapnwi tan kha. Teini phung aidrobo khe Musi bachaui Sinai hathái-o Subraiyung dagima tẃi kasa lang kha, bo a holong lapnwino bo tlang kha.

⁵Subraiyung chumui-o khe aro bini samo bacha phai kha tei bo Subraiyung[24] hwnwi sa kha.

⁶Subraiyung bini bwskang tẃi lái phuru-o hai hwnwi sakhlai kha, “Ang Subraiyung hamjaknai tei khairoknai Kaitor tei jolina keler, hamjakmung bai kupulung tei kók narwknai,

⁷kusungsai pirirokno kók narwgwi hamjaknaisa, hamya tei sumsokno nakarnaisa, tamo khe cha yarokno soiwi tongnai ya, bórokni búchusongni sumsokni bagwi kusungtham kusungbrwi jorani bora-rachirokno majra rwnai.”

⁸Musi dodro dodro bomsonwi khulum kha,

⁹tei bo hai hwnwi sa kha “Subraiyung tumungno nwng ano kubui’-no hamjak khe, ang nono koi ja-o, chwng bai him si di. A borokrok le belai kók khna ya gwja, phiya chini cha ya sumsokrokno nakar di tei chwngno nini bwsa hwnwi’-no yachak si di.”

¹⁰Tei Subraiyung hai hwnwi sa kha, “Nai di, ang swmai kaisa tango; nini bororokni thani o uanamasingcha samungrok tangnai, abo hai o hani kaisa bosongobo uanamasingcha samung tangjak ya kho abo tẃi samungno bórokni bwskango tangjaknai. Bebak bororok a uanamasingcha samungno nuknai tei ang’-no Subraiyung abo hai uanamasingcha khlainai hwnwi bórok Sinai.”

¹¹Tini ang nono dagimarokno khlai di. Nai di ang nini bwskangni Amorsarokno, Kanansarokno, Hitisa, Peressa, Hibisa tei Jebussarokno rwkhlainai.

¹²Nwng thángwi tongwimani a hani bororok bai ta gwdal di, tamni hwn khe bórok norokni birman se tubunai.

¹³Bórokni háyárokno swbai di, bórokni kwthar thongrokno sukhrup di; bórokni Asera mwtaino tanwi khitarwi rohor di.

¹⁴(Nwng kubun mwtaino ta khulum di, ani mung khe risi tẃinaisa, Risi gwnang Kaitor.)

¹⁵A hani bororok bai gwdal súgwi ta tong di tamni hwn ba bórok takjak mwtairokno khulum phuru tei barok phuru bórok norokno koboknai tei norokno takjak mwtai-o barokjak chámung chá rwui beloknai.

¹⁶Norokni bwsarok buini bwsarok bai nok na laiwi mano, aboni bagwi bórokni poito rak ya wngnai tei takjak mwtaino khulum rwjaknai.

¹⁷“Nwng manwi gele rwui mwtai ta tak di.”

¹⁸Nwng chuan buljakya auang chá lai panda khlai di. Ang nono dagima tẃi’-no Abib talni nokha salsni romwi chuan kwrwi auang chá lai di, tamni hwn ba a jora wng kha norokno Ijip hani ongkhorwi phaimani tal.

¹⁹Swkang achainai chwla bwsa thwgwi tei núkhungni mal-matarokni swkang achaijak chwla bwsa abo ani máng se.

²⁰Swkang achainai koraichirka bwsani sak slái-o mera bwsa yaphar di, tumungno nwng abo hai khlai ya hwn khe abórokni bokotok swbaiwi khibi di. Nini swkang achainai bwsa chwlarokno abo hai kheno narwk di. Ani thani khoroksa phano yapharmung tubu yaui ta phai thung.

²¹“Norok saldok sal jora samung tang di, phiya salsnini salo khe samung ta tang di, al chuaima eba mai rama jora-o phano samung tangwi man glak.

²²“Norokni gom kwtal tisama swkango thái kwtal panda khlai di tei norok páithago norokni thái kwtalni bagwi kuthum laiwi tisa phuru panda kaisa khlai di.”

²³Ang Subraiyung, Israilrokni Kaitor, nini chwlarok ano bisi-o uáitham khulumna bagwi ma phainai.

²⁴Nini bwskangni buini bosongrokno ang rwkhlainai tei nini hano phuarnai. Nwng bisi-o uáitham Subraiyungno khulumma jora-o panda khlai phuru khoroksa phano nini hano kebeng glak.

²⁵Ano thẃi yaphar phuru chuan buljak auang ta yaphar di; Subraiyungni panda-o mal-mata ratharjakno phung jora narwgwi man glak.

²⁶Thái kwtalrokno nini Kaitor Subraiyungni nok kwtharo tubu di. Phiya abuktwi chánai mera eba pun bwsano bumani abuktwi bai khe ta sóng di.

²⁷Hakhe Subraiyung Musino hai hwnwi sa kha, “Nwng o kókrokno swi di; tamni hwn ba omo nwng bai tei Israilrok bai swmai narwk laimani.”

²⁸Musi mungsa chá ya-nung yaui Subraiyung bai nokha sal brwichi tei horbrwichi tongwi kha; hakhe bo a swmaini kókno a holongthai-o a dagimung kaichirokno swi kha.

²⁹Musi dagimung kaichi swijak holong tháinwino tẃiwi Sinai hatháini ongkhorwi phai khe Kaitor bai kók samani bagwi bini mwkhang chẃngsamano Musi saui man li ya.

³⁰Aron tei bebak bororok Musini mwkhang kwchẃngma nuk khe bórok bini samo thángnani kirijak kha.

³¹Tamo khe Musi bórokno ring kha; hakhe Aron tei dophani okrarok bini thani phai lai kha tei Musi bórok bai kók sa kha.

³²Aboni ulo Israil bororok bini samo phaiwi kuthum lai kha, hakhe bo Sinai hathái-o Subraiyung bono dagimani raidarokno lukurokno saui khna rw kha.

³³Musi bórok bai kók sa bai pái kheno rí bai bini mwkhang kholop kha;

³⁴Musi Subraiyung tongma nogo Subraiyung bai kók sana tháng brúm brúm mwkhang phiyogo. Hakhe ongkhorwi phaiwi Subraiyung bai dagijakma bebakno Israil bororokno sa phai-o,

³⁵tei bórok aphuru bini mwkhangno kwchẃng khe nugo; tei bo Subraiyung bai kók sana tháng phi ya sak bini mwkhangno kholobwi tono.