Read Kok Borok LAM RWMA 35 Bible Online

LAM RWMA 35 - Kok Borok bible

LAM RWMA 35

¹Israil bororokni bebak dopharokno ringwi Musi hai hwnwi sa kha, “Norok tamo khlaithai tong omono Subraiyung khlai di hwnwi dagimani.

²Nokha saldok norok samung tangwi mano, phiya salsnini sal belai kwthar wngnai, abo ang Subraiyungni thani yapharjak kwthar sal. Khoroksa swk a salo mungsa swk samung tang khe bo butharjaknai.

³Norok sabatni salo nokrogo hór ta mwchẃng di.”

⁴Musi Israilni bebak bororokno hai hwnwi sa kha, “Omo wng kha Subraiyung dagi langmani.

⁵Subraiyungno yaphar di; yapharna muchungnai khorok thwgwi rangchak, rukphai, eba pitolni yapharmung tubu-ui phai di;

⁶naithok khutwng, kwkhrangni chaksru-sru tei kwchak mera buikhumu; pun buikhumuni rí;

⁷kwchak bumulni mera bukur; naithok bukur, akaia buphangni berechek;

⁸thopnani bagwi thok phuljaknai thok tei satrai motom;

⁹karnilian tei kubun holongrokno ochai kotorni kwthar ephod tei khaklabo khajaknai rísa-o thepaui phnangna nangnai.”

¹⁰Norokni bisingni tang kwrwngrok bebakno oro phai thung tei Subraiyung dagima hai kheno bebak samungno tang thung;

¹¹rínok tei bini saka-o bisingo swngjaknai, bini biching bai bokongrok, phaklai, thong tei uásúngrok;

¹²swmai bokhok tei bini balphungrok, khairokma achukthayung tei khopmani rísa;

¹³songphang bai balphungrok tei kwbáng manwirok; Kaitorno yapharjaknai auang;

¹⁴chatini bagwi thopnaphang tei bini manwirok; thopna bai thok;

¹⁵satrai sókna bagwi háyá; tei bini bal phungrok; phuljaknai thok motom tẃilwlwk satrai; rínokni duglamni bagwi rísa;

¹⁶sógwi yapharna bagwi háyá, pitolni thepajak keseng, aboni balphungrok tei bebak manwirok; yak sújaknai dangai bai bini

¹⁷thuklupjaknai rírok, aboni thong tei uásúng, thuklupjaknaini hap-lamni bagwi rísa;

¹⁸thong bai buduk wng kha rínok tei swngjaknai ríni bagwi;

¹⁹kwthar thai-o bórok ochaini samung tang phuru ochai sup kwrwng yak bai supjak rí-chum ma chumnai, tamni hwn khe ochai Aron tei bini bwsarokni bagwi se a kwthar rírok.

²⁰Ulo bebak Israil bororok Musini aroni tháng bai kha,

²¹lonnai khorok thwgwi Subraiyung tongma nok snamna bagwi Subraiyungni thani yapharmung yapharnani tubu lai kha. Bórok panda kotoro nangmani tei ochaini rí-chum snamnani bagwi thwgwino manwi tubu lai kha.

²²Chwla bwrwi khorok thwgwino kháni muchung tẃi khe khili, lolai, mathiya, kotok tang tei rangchakni snamjak bebak manwirok tubu lai kha tei Subraiyungno yaphar kha.

²³Khorok thwgwino naithok mera buikhumuni khutwng yago tẃi laijak; kwkhrang, chaksru-sru, eba kwchak mera buikhumu; pun buikhumuni rí, kwchak bumulni mera bukur, eba kaham bukur aro tubu lai kha.

²⁴Rukphai eba pitolni yapharmung rwi mannai bebakno Subraiyungni thani bórokni yapharmungno tubu lai kha tei baksa akaia buphang gwnangrok kubun samungni bagwi tubu lai kha.

²⁵Tak kwrwng bwrwirok bebakno bórokni yak bai snamjak naithok buikhumuni khutwng tei kwkhrang, chaksru-sru, kwchak bumulni khutwng tubu lai kha.

²⁶Bórok pun buikhumuni khutwngbo snam lai kha.

²⁷Dophani okrarok khe kwthar ephod tei khaklabo phanjaknai-o thepana bagwi karnilini tei kubun holongthairokno tubu lai kha.

²⁸Tei motom manwirok tei thopnani thok, phuljaknai thok tei motom tẃilwlwk satrai.

²⁹Israilni bebak bororok Musi bebak samungni bagwi dagijakma hai kheno bórokni yapharmungno Subraiyungni thani tubu lai kha.

³⁰Musi Israilrokno hai hwnwi sa kha, “Subraiyung Juda bosongni Urini bwsla tei Hurni busuk Besalelno saiwi na kha,

³¹Kaitor bono bini pholani phan bai bebak samung tangnani bagwi phankrak phan, rwng kwrwng phan, kwthar uansukna phan rw kha,

³²bebak bwthái tisana samung tangmani tei rangchak, rukphai, pitolni samung tangnani,

³³holongthairokno rasu-ui thepana bagwi, buphang tansunani tei kubun bebak snammungni samung tangna bagwi.

³⁴Subraiyung bono tei Dan bosongni Ahisamakni bwsla Oholiabno bórokni uamungrokno buino phrwngna bagwi phan rw kha.”

³⁵Bo bórokno supmung, bwthái tisamung tei naithok khutwng, kwkhrang, chaksru-sru, kwchak mera bai buikhumuni khutwng tei kubun ríni takmung kwrwngni phan rwjak kha. Bórok bebak samung tei bwthái tisanani kwrwngni samung tangmani phan man kha.