Read Kok Borok LAM RWMA 36 Bible Online

LAM RWMA 36 - Kok Borok bible

LAM RWMA 36

¹Besalel, Oholiab tei kubun samung kwrwngrokno bebak samung tangnani bagwi Subraiyung dagima tẃi khe bórok kwthar rínok tangthani nangmano saui man tẃi’-no Subraiyung bórokno tang kwrak tangnani tei uansugwi mannani bagwi phan rw kha.

²Subraiyung bai phan rwjaknai Besalel bai Oholiab tei kubun tang kwrak tangnairokno Musi ring kha tei Musi bórokno samung chengna bagwi dagi kha.

³Rínogo tubumani bebak manwirokno bini aroni na bai kha. Phiya Israil bororok phung thwgwino Musini thani manwirokno tubu-ui phlaiwi tong kha.

⁴Ulo tang kwrak tangnairok tháng bai kha,

⁵Tei Musino hai hwnwi sa kha, “Bororok Subraiyung samung tangna dagima tẃi khe nangmani slái teibo kwbáng manwirok tubu lai kha.”

⁶Musi bebak bathamo hai hwnwi sakhlai kha, “Kwthar rínok tangnani bagwi bwrwi eba chwla khoroksa phano mungsa manwi yapharna nang glak.” Aboni bagwi bororok mungsa swk phano ta tubu di hwnwi sajak kha;

⁷tamni hwn ba samung pái súgwi tangna bagwi nangmani slái teibo kwbáng manwirok tubujak kha

⁸Samung tangnairokni bisingni bebak tang kwrwngrok Subraiyung tongmani rínok tang lai kha. Bórok mera buikhumuni naithok khutwng kwkhrang, chaksru-sru tei kwchak bumulni khutwng bai snamjak rísa kangchi bai samung tang lai kha tei aro o bwkrang gwnang malni mangtang suchi bai supjak tongo.

⁹Rí bwkhak thwgwino uarma baksa, abo mitar chinwi kolok tei mitar kainwi kuar.

¹⁰Bórok swngjaknai rí bwkhak kaibano thansa khlai kha tei abo tẃi kheno kubun swngjaknai rí bwkhak kaibano thansa khlaiwi kaisa snam kha.

¹¹Bórok thepajak a somkhrang gapni rí thwgwi ríni saka drobo bwlam narwk lai kha.

¹²Bórok swkangni a rí bwkhak bwlam lambachi narwk kha tei ulni rí bwkhakbo lambachi narwk lai kha.

¹³Bórok rangchakni bachi thepajaknai biching snam kha abo a rí bwkhak kwnwino thansa khe kangsa snamnai.

¹⁴Bórok rínokni bagwi pun buikhumuni chisa rí bokochoni kholopjaknai snam kha.

¹⁵Bórok mitar chitham kolok tei mitar kwnwi kuarni baksa uarnai khlai snam kha.

¹⁶Bórok kangbano kaisa khe sup kha tei kubun kangdokno tei kaisa khe sup kha.

¹⁷Bórok rí kaisani páithago bwlam lambachi narwk kha tei kubunni baichingo bo bwlam lambachi narwk kha.

¹⁸Bórok kwnwi bwkangno thansa khe thepana bagwi pitolni kongbachi biching snam kha, abo kholopjaknai khe snamjak kha.

¹⁹Bórok tei kwnwi kholopjaknai snam kha, kaisa khe mera buikhumuni kwchak bumulni tei kaisa khe kaham naithok bukurni abo saka kholopna bagwi chúgo.

²⁰Bórok rínokni bagwi akaia buphangni bokhok snam kha.

²¹Bokhong thwgwi mitar kaibrwi kolok tei 66 sentimitar kebeng

²²tei kwnwi khe berajaknai yakung tongo. Abo bokhongrokno thansa khlai mano. Bebak bokhongono abo tẃi berjaknairok tong bai-o.

²³Yagra bwkhakni bagwi bokhong nwichi snam kha,

²⁴Tei rukphaini kaibrwichi uásúng snam kha abo bokhong thwgwini kwnwi khe yakungni bagwi kwnwi uásúng.

²⁵Bórok bokhong kaibrwichi rínokni yagra babaini bagwi bokhong snam lai kha,

²⁶tei rukphaini kongbrwichi uásúng abo bokhong thwgwi kwnwi khe snam kha.

²⁷Rínokni uklokni bagwi, salthángbai-o bórok kaidok bokhong snam kha;

²⁸tei busup thwgwini bagwi kwnwi bokhong snam kha.

²⁹A busupni bokhongrokno yaphango phnangwi rw kha tei buchuk phaisingo bo phnangwi rw kha. Bokhong kwnwi-o busup kwnwi wng kha.

³⁰Aro o bokhong kaichar tongo, aboni bagwi bokhong thwgwi kongnwi khe uásúng kongchidok tongo.

³¹Bórok akaia buphangni chiba dangdal bokong snam kha, rínokni babaisa-o bokhongni bagwi kongba,

³²rínokni tei babaisani bokhongni bagwi kongba tei salthángbaini uklok phaisingni bokhongni bagwi kongba khe snam kha.

³³Kwcharni dangdal bokongno bokhongni majar tẃi rínokni bwskang simi kubun khe páithak jora thepajak.

³⁴Bórok bokhongno rangchak bai khop kha tei abórokno rangchakni mathiya bai phnangwi rw kha, tamni hwn khe dangdal bokongo khebwi tonna bagwi tei bokhongroknobo rangchak bai khop kha.

³⁵Bórok kwkhrang, chaksru-sru tei kwchak mera buikhumuni khutwng bai takjak rísa snam kha tei aro o cherubni mangtangno suchi bai subui snam kha.

³⁶Bórok rísano khachina bagwi Akaia buphangni thong kongbrwi snam kha, abórokno rangchak bai khop kha. Tei aro rangchakni biching phnangwi rw kha. Ulo bórok rukphaini uásúng kongbrwi a thongrokno achuk rwna bagwi snam kha.

³⁷Rínokni duglamni bagwi rí-koton bórok kwkhrang, chaksru-sru, kwchak bumulni mera buikhumuni naithok khutwng bai takjak tei suchi bai bumul rísa supjak snam kha.

³⁸A rísani bagwi bórok biching thepajak thong kongba snam kha. Thongni buchuk tei bokongno rangchak bai khop kha tei thongrokni bagwi uásúng kongba, snam kha.