Read Kok Borok LAM RWMA 37 Bible Online

LAM RWMA 37 - Kok Borok bible

LAM RWMA 37

¹Besalel akaia buphangni swmai bokhok snam kha; abo 110 sentimitar kolok, 66 sentimitar kebeng tei 66 sentimitar kuchuk.

²Bo kubui rangchak bai abono bising saka khop kha tei abono kitingwi rangchak bai khop kha.

³Bo balwi tẃina bagwi aboni yakung kongbrwi-o rangchakni hatrai thepa kha, tamni hwn khe babainwi-o kwnwi khe hatrai thepa kha.

⁴Phiya bo akaia buphangni balphung snam kha tei abono rangchak bai khop kha,

⁵tei abono bokhokni babainwi phaisingni hatrai-o sora kha.

⁶Hakhe bo rangchak kaham bai khairokma achukthayung snam kha abo 110 sentimitar kosong tei 66 sentimitar kebeng.

⁷Bo rangchak tokjakni cherubni mangtang snam kha; khairokma achukthayungni yang buchuk bai ayang buchugo khe abono tonjago,

⁸kaisa cherub babaisa-o tei kaisa khe tei babaisa-o khe khairokma achukthayungni babainwi-o khe tonjak kha.

⁹Cherubrok khairokma achukthayungni saka-o bwkrang phehelwi phinklaiwi masa tei masa bai nahar laijak.

¹⁰Bo Akaia buphangni inches 36 kosong, 18 inches kebeng tei inches 27 kuchukni songphang snam kha.

¹¹Bo abono rangchak kaham bai khop kha tei gana kitingwi rangchakni ari snam kha,

¹²tei bo inches 3 kuarni bokhong snam kha tei bokhong kitingwi rangchak bai khop kha.

¹³Bo rangchakni hatrai kaibrwi snam kha tei abono yakung tongma phaising busup subrwi-o thepa kha.

¹⁴Songphangno balphung bai balwi tẃina bagwi a hatraino bokhong gana-o thepaui rw kha.

¹⁵Bo akaia buphangni balphung snam kha tei abono rangchak bai khop kha.

¹⁶A songphango berana bagwi rangchakni mairangrok snam kha tei angur bwtwi barokna bagwi mairang bwsa, khuri, lota, dangairok snam kha.

¹⁷Bo rangchak kahamni thopnaphang snam kha. A thopnaphangno khum naithokrok hai khe togwi rangchakni snamo; abo kaisa rangchak kahamni togwi snamjak.

¹⁸Thopnani babainwi-o babaisa babaisa-o dek tham dek tham khe dekdok thopna khuri snamjak kha;

¹⁹aro bedek dekdok thwgwi khum hai bartham almon khum hai khe bubar bwkhrwi gwnang tongo,

²⁰tei thopnaphangni bokongo almon khum hai bubar barbrwi, aro bubar bwkhrwi tongo.

²¹Aroni khe bojro kaitham bedekni tola-o thwgwi bwkhrwi tongo.

²²Aroni bwkhrwirok, bedekrok tei thopnaphang bebago tokjak kaisa rangchakni snamjak.

²³Bo chati kaisnirok, aboni yakheprokno tei berajaknaino kaisa rangchak kahamni snam kha.

²⁴Bo abórokno Kilo 35 rangchak kaham bai thopnaphang tei bini bebak nangmani manwi snam kha.

²⁵Bo satrai motom sókna bagwi akaia buphangni háyá kaisa snam kha; abo kebeng kosong baksa, kebeng 45 sentimitar, kosongo 45 sentimitar tei abo busup brwi, abo chukma khe 90 sentimitar; bini bokorongrok thansa khe phnangjak.

²⁶Bo aboni buchuk babaibrwi-o tei bokorongrokno rangchak kaham bai khop kha tei rangchak bai gana kitingwi khop kha.

²⁷Bo rangchakni baljaknai hatrai kwnwi snam kha tei abono balphungrok bai balwi tlangna bagwi babai brwi busup phaisingo thepa kha.

²⁸Bo akaia buphangni balphung snam kha tei abono rangchak bai khop kha.

²⁹Bo teibo kwthar chongthar chongjaknai thok tei motom tei kaham satrai bai sabuljak thok motom hai snam kha.