Read Kok Borok LAM RWMA 38 Bible Online

LAM RWMA 38 - Kok Borok bible

LAM RWMA 38

¹Sógwi yapharna bagwi bo Akaia buphangni háyá snam kha. Abo kebeng kosong baksa 2.2 mitar kolok tei 2.2 mitar kuar tei abo 1.3 mitar kuchuk tongmani.

²Bo háyáni busup subrwini buchugo bokorong snam kha, abórok baksa kheno ongkhorjak. Bo abórok bebaknono pitol bai khop kha.

³Bo háyáni bagwi bebak manwi snam kha twma hwn khe turum, tharuk, dangai, tharuk busu gwnang, hór twk. A bebak manwirokno pitol bai khop kha.

⁴Bo pitolni dangdal snam kha, abono háyáni kwchar majaro thepa kha, tamo khe abo háyáni sakani kwcharo kásuknai.

⁵Bo balwi tẃina bagwi kaibrwi hatrai snam kha tei abórokno busup subrwi phaisingo thepa kha.

⁶Bo akaia buphangni balphung snam kha, abono pitol bai khop kha.

⁷Tei háyáni babainwini hatrai-o abórokno sora kha. Háyá bukcha khlai buphang belepni snamjak kha.

⁸Bo pitolni kasla snam kha tei Subraiyung tongmani rínokni hap-lamo samung tangnai bwrwirokni pitolni aina bai pitolni hatrai snam kha.

⁹Subraiyung tongmani nokni bagwi bo mera buikhumuni kaham khutwngni rísani hap-lam sojaknai snam kha yagra phaisingni rísarok 44 mitar kolok.

¹⁰Abo rukphaini snamjak biching bai sor bokocho gwnang nwichi pitolni thong tei aboni bagwi kongnwichi uásúng gwnang bai tisajak tongo.

¹¹Yaksi phaisingni a sojaknairokbo abo haino.

¹²Salthángbai’-obo 22 mitar kolok rísa tongo, aro o rukphaini snamjak biching tei sor bokocho gwnang kai nwichi pitolni thong tongo tei abo bai baksa kongnwichi uásúngbo tongo.

¹³Salkabaini hap-lam phaisingni sojaknaibo 22 mitar kuar.

¹⁴Hap-lamni babaisa-o thong kongtham tei uásúng kongtham gwnang 6.6 mitarni rísa tongo,

¹⁵tei babaisa-obo thong kongtham tei uásúng kongtham gwnang 6.6 mitarni rísa tongo.

¹⁶Sojaknaini kitingwi tongmani bebak rísarok kaham mera buikhumuni snamjak.

¹⁷Thongrokni bagwi bebak uásúngrok pitolni snamjak tei bichingrok, bokongrok thong buchukrokno kholopmarok bebakno rukphai bai snamjak. Bebak sojaknaini thongrok rukphaini bokongrok bai phnangjak.

¹⁸Sojaknaini hap-lamni bebak kwkhrang, chaksru-sru, tei kwchak mera buikhumuni khutwngni supjak tei aro naithok khe suchi bai supjak. Abo sojaknaini rísabo haino 9 mitar kolok tei 2 mitar kuchuk.

¹⁹Abo pitolni kongbrwi uásúng gwnang thong kongbrwi bai sungjak. Bórokni tei bokongrok bebakno rukphaini snamjak.

²⁰Tei rínok bai sojaknaini thongrok bebak pitolni snamjak

²¹Subraiyung tongmani nokni samungo phnangjakmani manwirok wng kha omorok aro dagimung kaichi swijak holong tháinwi tongo Musi dagima tẃi’-no abo lekhajago tei abórokno ochai Aronni bwsla Ithamarni muchung tẃi Lebirok bai samung tangjak kha.

²²Juda bosongni Hurni busuk tei Urni bwsla Besalel Subraiyung Musino dagima tẃi bebak samung tang kha.

²³Bini samungo chubanai wng kha, Dan bosongni Ahisamakni bwsla Oholiabbo rikthani, kan-chum snam thani, naithok khutwngni tei kwkhrang, chaksru-sru, mera buikhumu kwchak khutwngni takmungo belai kwrwng.

²⁴Kwthar rínok tangna bagwi khe sujakma bising sasai kilogram rangchak tongmani bebakno’-no Subraiyungni thani yapharjak kha.

²⁵Aro lekhajak dopharokni kubui sujakma bai kilogram 3,430 rukphai nang kha.

²⁶Lekhajak bororok bebakno kubui sujakma bai nangmani swk khe rw bai kha tei abo naima swkno wng kha. Aro lekhajak bororokni bisi chinwi eba chakra umorni bising 603,550 borok wng kha.

²⁷Kilogram Rukphai 3,000 ríni nok snam thani tei rí kebeng swngjaknaini banta uásúngrok snamjak kha. Kongsa kongsa uásúngni bagwi kilogram 30 rukphai bai bebagwi kongsara uásúng snamjak kha.

²⁸Tei tong rwkma 30 kilogram rukphai bai besalel bokongrok, thongni bagwi biching tei abórokni buchugo kholopjaknairokno snam kha.

²⁹Subraiyungno yapharjakmani pitol wng kha 2,452 kilogram.

³⁰Subraiyung tongma rínokni hap-lamni bagwibo uásúng snam kha, pitol bai khopjak háyá tei háyáni bagwi bebak manwi,

³¹Phataro swngjakni bagwi uásúngrok, swngjaknaini hap-lam tei rínok bai phataro swngjakni bagwi thongrok.