Read Kok Borok LAM RWMA 39 Bible Online

LAM RWMA 39 - Kok Borok bible

LAM RWMA 39

¹Bórok kwkhrang, chaksru-sru tei mera buikhumuni khutwng kwchak bai subwi kan-chum snam kha abórokno ochairok kwthar ha-o samung kwthar tang phuru-o chum kha. Musino Subraiyung dagima tẃi’-no bórok ochai Aronni bagwi kanmung-chummung snam kha.

²Bórok kaham khutwng, kwkhrang chaksru-sru tei mera buikhumuni khutwng kwchak tei rangchakni khutwng bai ephod snam kha.

³Bórok rangchakno togwi belep snam kha tei abono ste ste khe tansu-ui khutwng snam kha tamni hwn ba abono kaham khutwng bai kwkhrang, chaksru-sru tei mera buikhumuni khutwngni bisingo subna bagwi,

⁴bórok ephodni bagwi khaklap phanjaknai kangnwi snam kha tei babainwi-o phnang kha tamni hwn khe abo kwrak khe khaui mano.

⁵Abo tẃi manwi bai kaham khe takjak phanjaknai snam kha abono thansa baksa khe ephodo thepa kha, abo Musino Subraiyung dagima haino wng kha.

⁶Bórok karnilian holong snam kha tei abono rangchak bai khop kha; bórok aro-o naithok khe Jakobni bwsa khoroknwichini bumungrokno rigwi swi kha.

⁷Hakhe bo a balphungno swmai bokhokni babainwi-o tongma bukhunju tẃi khe sora kha, phiya bo abono tẃina bagwi bwklapno bugurung khe snam kha

⁸Bórok ephodo nangmani manwirokno naui khaklap phánma rísa snam kha tei abo suchi bai supjak haino.

⁹Abo kebeng kosong baksa tei thepnwi khe thepjak, abo 22 sentimitar kolok tei 22 sentimitar kuar.

¹⁰Bórok rem brwi-o kaham kuk holongthaino boksa kha. Swkang beremo rubi, topas tei garnet boksa kha;

¹¹remnwi-o khe emarlad, saphir tei hira,

¹²tham remo khe tarkus, agate tei ametis;

¹³kaibrwini beremo khe beril, karnilian tei jaspar. Abórok bebakno rangchak bai khop kha.

¹⁴A chinwi holongo Jakobni bwsarokni bumungno rigwi swi kha twma hwn khe abo Israil dopha chinwino phunukna bagwi se.

¹⁵Khaklap phanjaknaini bagwi bórok kaham rangchakni buduk snam kha, abo mwsakjak buduk hai se.

¹⁶Bórok rangchakni rang bwtang kwnwi tei rangchakni hatrai kwnwi snamwi khaklap phanjaknaini busup saka-o a hatraino phnang kha.

¹⁷Bórok rangchakni buduk kwnwino hatrai kwnwi bai thepa kha.

¹⁸Tei a budukni kubun phaisingni páithago rang bwtang tángnwi bai khachiui rw kha tei abo tẃi khlaino ephodni bangora khajaknaini bwskango phnangwi rw kha.

¹⁹Bórok rangchakni hatrai kwnwi snam kha tei ephodni baiching phaisingni khamanobo khaklap khajaknani bising phaising thepaui rw kha.

²⁰Bórok tei kwnwi hatrai snam kha tei abono thepajakmani gana tei khajaknai budukni saka drobo ephodni bangora khajaknai kwnwini bwskang buchuk phaisingo phnangwi rw kha.

²¹Subraiyung Musino dagima tẃi’-no khaklap phanjaknai khatonma saka-o tongnai tei abo luthur li ya wngna tẃi khe bórok khaklap phanjaknani ephodni hatrai kwnwino buduk kwkhrang bai khaui rw kha.

²²Ephodni bagwi kwkhrang mera buikhumuni khutwng bai kamchwlwi snam kha.

²³Aboni bokhorok phaisingo bwlam tongo aro o buikhumu bai rí takjak manwi bai snamjak abo kichigwi man ya twini bagwi snamjak kha.

²⁴A kamchwlwi-o bórok kaham khutwngni kwkhrang, chaksru-sru tei mera buikhumuni kwchak khutwng bai dalim bwthái hai snam kha.

²⁵Abo Musino Subraiyung sama hai kheno dalim bwtháini kwnwi kwcharo khe rangchakni bel thepaui rw kha.

²⁶Ochaini samung tang phuru chummani a kamchwlwini tola-o kitingwi’-no kaisa kaisa khe snamjak dalim bwthái tei bel thepajak, abo Subraiyung Musino khlaina bagwi tholjakma tẃi’-no khlaijak kha

²⁷Bórok Aron bai bini bwsarokni bagwi lilonni kamchwlwirok snam kha

²⁸tei khorokni rí sórma, bokhorogo thupjaknai tei bisingo kanjaknairok

²⁹tei Musino Subraiyung dagima haino kaham khutwng tei kwkhrang, chaksru-sru, mera buikhumuni kwchak khutwng bai kaham khe suchi bai supjak naithok chango phanjaknai rí tuku snam kha.

³⁰Bórok rangchakni kanmungrok snam kha, abo yapharmani kwthar mari tei bórok aro Subraiyungni thani yapharjak hwnwi kóktháino rigwi swi kha.

³¹Bórok khorok sórma ríni bwskango buduk kwkhrang bai khatonwi rw kha. Abo Musino Subraiyung dagima haino wng kha.

³²Subraiyung tongma rínokni bebak samungrok pái súk kha. Israilrok Subraiyung Musino dagima hai kheno bebak samung tang lai kha.

³³Bórok Musini thani rínokni rí tei bini rírok biching, bokorong, dangdal, thong tei uásúngrokno tubu kha;

³⁴mera buikhumuni kholopjaknai, bumul kwchak rwjak bukur; kaham buikhumuni kholopjaknai; swngjaknai rísa;

³⁵swmai bokhok tei holong bwlaprok, balphungrok tei bwklap;

³⁶songphang tei bini nangmani manwirok tei Kaitorno yapharjaknai auang;

³⁷rangchak kahamni thopnaphang, aboni thopnarok, aboni bebak manwirok tei thopnarokni bagwi thok;

³⁸rangchakni háyá, sago phuljaknai thok motom tẃilwlwkni satrai, rínokni hap-lamni bagwi rísa;

³⁹pitolni háyá, pitolni tharuk, balphung tei bini bebak manwirok, kasla bai hatrai;

⁴⁰kholopjaknaini rísarok tei bini nangmani manwirok; hap-lamni rísa bai swngjaknai budukrok; rínokni bagwi thongrok; rínok swng thani nangmani bebak manwirok;

⁴¹háyá kwtharo ochairok chumna bagwi naithok kanmung-chummung tei Aron bai bini bwsarokni bagwi rí kwtharrok tubu lai kha.

⁴²Musino Subraiyung dagima haino Israil bororok bebak samung tang bai kha.

⁴³Musi bórok samung tangmanirokno naichom kha tei amjogwi nai kha abo bebakno Subraiyung dagima hai wng kha. Aboni bagwi Musi bórokno hamari rw kha.