Read Kok Borok LAM RWMA 4 Bible Online

LAM RWMA 4 - Kok Borok bible

LAM RWMA 4

¹Hakhe Musi Subraiyungno hai hwnwi sa kha, “Bórok ano poito khlai ya hwn khe eba ani kók khna ya wngwi ‘Subraiyung nwng bai nukjak ya hwnwi sa khe ang tamo khlainai?’ ”

²Subraiyung Musino hai hwnwi sẃng kha, “Nini yago tongma abo tamo?” “Omo raidang se” hwnwi bo sa kha.

³Subraiyung hai hwnwi sa kha, “Abono ha-o khiklai rw di” hakhe abo chibuk khaui tháng kha; bo aroni khár kha.

⁴Tamo khe Subraiyung Musino hai hwnwi sa kha, “Yak phologwi a chibukni khitung rom di” hakhe bo yak phologwi a chibukno rom kha tei a chibuk raidang wngwi tháng phi kha,

⁵“Bórokni chuchusongni Kaitor, Abrahamni Kaitor, Isakni Kaitor, Jakobni Kaitor nwng bai nukjakmano poito khlaina bagwi omono khlai di.”

⁶Subraiyung bono hai hwnwibo sa kha, “Nini yakno khaklabo ton di.” Hakhe bo bini yakno khaklabo ton kha; bo khaklapni yak nor kheno nuk kha yak biyadi chájak wngwi kothor kwsap phur tẃi khe phur kha.

⁷Hakhe Kaitor hai hwnwi sa phi kha, “Nini yakno khaklabo ton phi di.” Bo haino hai khaklabo yak ton phi khua, yak khaklapni nor kheno nuk kha, a yak haino hai hamwi tei kubun bahanrok haino wng phi kha.

⁸Hakhe Kaitor hai hwnwi sa kha “Bórok nono poito khlai ya hwn khe, swkangni marino sak nang ya hwn khe tei kaisano le poito phano wngwi mano.

⁹Bórok a samung kwnwino poito khlai ya hwno eba nini kókno sak nang ya hwn khe, nwng Nil twimani twi kisa naui hakungo khiklai rw di; nwng a Nil twimani twi naui hakungo khiklaima a twi thẃi khaui thángnai.”

¹⁰Tamo khe Musi Subraiyungno hai hwnwi sa kha “O ani Subraiyung ang man glak. Ang yaphangni simino kók kwrwngbo wng ya, nwng ano kók sa phuruni simi tabuk jorabo ang kókbo rwngsa ya kho, ang kók rwng ja ya. Douibo saui man ya, kókbo kwcha-o.”

¹¹Hakhe Subraiyung Musino hai hwnwi sa kha, “Sabo borokni búkhúkno snam? Sabo bono kók man ya khlai, nathong eba mokol nuknai eba mokol phula khlai? Abo ang ya diba?

¹²Tabuk tháng di, ang nini khugo tongnai tei tamo sana nang phrwngnai.”

¹³Tamo khe Musi hai hwnwi sa kha, “O Subraiyung, kubun tei khoroksa swkno phano rohor ja di.”

¹⁴Abo bai’-no Subraiyung Musino jolijagwi hai hwnwi sa kha, “Lebisa nini takhuk Aron ba nwng bai baksa kwrwi diba? Ang si-o bo kaham khe kók saui mano, ‘Nai di, bo nwng bai malaina bagwi ongkhorwi phai kha, bo nono nuk kheno khá srangjaknai.’

¹⁵Nwng bono saui khna rw di, bono kók phrwngwi rw di. Ang nini khugo tei bini khugo khe tongnai tei tamo khlaina nangnai ang norokno phrwngnai.

¹⁶Bo bororokno nini wngwi kók sanai. Bo nini bagwi khukphang wngnai, nwng bini thani Kaitor hai wngnai.

¹⁷Phiya nwng nini yago o raidangno na di, omo bai khe nwng uanamasingcha samung tangnai.”

¹⁸Musi bini bwkra Jethroni thani kiphilwi thángwi hai hwnwi saui kha, “Ano ani jaiti masarok tongma Ijibo kisa thángna bagwi rohor gra di, bórok kwthang da tong bai kho kisa naiwi phai grana.” Hakhe Jethro Musino “Kwchang kwchang khe tháng di hwnwi sa kha.”

¹⁹Midiano tháng phuru-o, Subraiyung Musino hai hwnwi sa kha, “Ijibo kiphilwi tháng di. Nono butharna nainai bororok bebakno thwi bai kha.”

²⁰Hakhe Musi, bihik tei bwsajlasongno korai chirka saka-o kasa rwui lam rw kha tei Ijibo kiphilwi tháng kha. Musi bini yago a Kaitorni raidangno tẃi kha.

²¹Haino hai Subraiyung Musino hai hwnwi sa kha, “Nwng Ijibo thángwi sógwi khe, ang nini thani rwmani a suarrok bai Pharaoni bwskango bebak a uanamasingcha samungrokno khlai di. Tamo khe bororokno yakarwi rohor ya khlaina bagwi ang Pharaoni bwkhano kwrak khlainai.

²²Hakhe nwng Pharaono saui di, Subraiyung hai hwnwi sa-o, ‘Israil wng kha ani swkang sakra,

²³ang nono sa-o, “Ano surina bagwi ani sajlano rwi rohor di;” Nwng bono rwi rohor ya khe, Ang nini sajla okrano butharnai.’ ”

²⁴Ijibo thángma lama-o kwrẃngsa-o bathak thani Musi Subraiyung bai malai khe Subraiyung bono butharna nai kha.

²⁵Hakhe Jipora holong kubuk kaisa naui bwsajlani sakur raui rw kha tei Musini yakungo tangwi hai hwnwi sa kha, “Nwng thẃini se ani bwsai!”

²⁶Hakhe bo bono saichung khe yakarwi klang kha: Hakhe bihik hai hwnwi sa kha, sakur ramani tẃi khe “Nwng thẃini se ani bwsai.”

²⁷Subraiyung Aronno hai hwnwi dagi kha, “Musi bai malaina bagwi haphar bukcha-o tháng di. ‘Hakhe bo thángwi Kaitorni hathái-o bo bai malaiwi bono motom su kha.’ ”

²⁸Hakhe Musi, Subraiyung tamni bagwi bono rohor kha bebakno sa kha tei bebak uanamasingcha samung khlai di hwnwi sajakmaroknobo sa kha.

²⁹Hakhe Musi bai Aron Israilni bebak chakrarokno kwrẃngsa khe thum kha.

³⁰Musi Subraiyung bai sajakma bebak kókrokno Aronno saui khna rw kha tei bororokni bwskango uanamasingcha samungrokno tangwi phunuk kha.

³¹Hakhe bororok poito khlai lai kha tei Israilrokno Subraiyung naikhlai phi kha tei sátokjakmarok nuk lang kha hwnwi khna kheno bórok khorok bomson lai khulum lai kha.