Read Kok Borok LAM RWMA 40 Bible Online

LAM RWMA 40 - Kok Borok bible

LAM RWMA 40

¹Subraiyung Musino hai hwnwi sa kha,

²“Bwskang talni bwskang salo Subraiyung tongma rínok swng di.

³Aro o dagima kaichini swmai bokhokno ton di tei rísano bini bwskango swng di.

⁴Songphang tubu di tei bebak manwirok a saka-o phehelwi ton di. Thopnaphangbo tubu di tei aro o thopna thepa di.

⁵Swmai bokhok bwskango satrai motom sókna bagwi rangchakni háyá ton di tei rínokni hap-lammo rísa swng di.

⁶Sógwi yapharna bagwi rínokni bwskango háyá ton di.

⁷Rínokni bai háyáni kwcharo yak sújaknai dangai bera di tei abono twi supung di.

⁸Phataro kitingwi swngjaknai rínokno swng di tei hap-lam thwgwi-o rísa swng di.

⁹“Ulo rínokno yapharwi tei bini bebak manwirokno kwthar thok phulwi yaphar di tei abo belai kwthar wngnai.

¹⁰Aboni ulo háyá tei bini bebak manwirokno thok phulwi yaphar di tei abo belai kwthar wngnai.

¹¹Abo tẃi kheno yak súmani kasla tei bini hatraino yaphar kha.

¹²“Rínok hap-lamo Aron bai bini bwsarokno tubu di tei bórokno tong kwthar tukuna bagwi sa di.

¹³Aronno ochaini rí-chum kan rw di, thok phul di tei bono bórom rwi chong di, tamni hwn ba bo ochai hai khe samung tangwi mannai.

¹⁴Nwng bini bwsarokno tubu-ui bórokno kamchwlwi chum rw di,

¹⁵tei bórokni buphasongno thok phul tẃi khe bóroknobo phul di, hakhe bórok ochai hai khe ani samung tangwi mannai. Bosongni kusung thwgwi bórokno thok phuljakma bising tẃi khe ochai snamjaknai.”

¹⁶Musi bebakno bono Subraiyung dagima tẃi khe tang kha.

¹⁷Bórok Ijip yakarwi phaimani bisik nwini bwskang talni bwskang salo Subraiyung tongmani rínok tisa lai kha.

¹⁸Musi aro o uásúng thepa kha, núkhúng tisa kha, dangdalrok phnang kha tei aboni thong tisa kha.

¹⁹Bo rínokni núkhúngni rí bai phin súgwi rw kha tei phatarni swngjaknai rí swng kha, abo Subraiyung dagima haino wng kha.

²⁰Aboni ulo swijak holongthái tháinwino naui swmai bokhogo tonwi rw kha. Bo a bokhokni hatrai bising balphungrokno sora kha tei aboni saka-o bwklap boksaui rw kha.

²¹Aboni ulo bo rínogo bokhokno ton kha tei bwskango phinjaknai rí swngwi rw kha. Abo tẃi kheno bo swmai bokhokno bisingo ton rw kha abo Subraiyung dagima haino wng kha.

²²Bo rínok bisingo songphang ton rw kha, abo rísani phatarni yaksi bwkhak,

²³tei Subraiyung dagima hai kheno songphango auang beraui Kaitorno yaphar kha.

²⁴Bo rínok bisingo thopnaphang ton rw kha, abo songphangni baiching tei yagra bwkhak tongo,

²⁵Subraiyung Musino dagima tẃi khe bo Subraiyungni bwskango a chatirokno ton kha.

²⁶Bo rínok bisingo rangchakni háyá ton rw kha, abo rísani bwskango.

²⁷tei satrai motom tẃilwlwk sók kha abo Subraiyung dagima haino wng kha.

²⁸Bo rínokni hap-lamo rísa khachiui rw kha,

²⁹tei a rísani bwskangobo sógwi yapharna bagwi háyá berai rw kha. Subraiyung dagima haino bo aboni saka-o sókmung sógwi yaphar kha tei mairung-maikha yaphar kha.

³⁰Bo yak sújaknai dangaino rínok bai háyáni kwcharo ton rw kha tei aro-o twi supungwi rw kha.

³¹Musi, Aron tei bini bwsarok bórokni yakung yak sú lai kha.

³²Subraiyung Musino dagima hai kheno bórok rínok eba háyá tong thani-o tháng lai-o.

³³Musi rínok tei háyá kitingwi swngjaknai rí swng kha tei rísarokno hap-lam thwgwi sẃngwi rw kha.

³⁴Ulo rínokno chumui kobol kha tei Subraiyung tongmani kwchẃng hórjlai abono kolop kha.

³⁵Aboni bagwino Musi rínogo thángwi man li ya.

³⁶Rínok sakani chumui tisajak tháng khe Israil bororok bórokni bathamno yakarwi kubun phaising lam rw lai-o.

³⁷Chumui kobolwi tong sak bórok batham yakarwi tháng ya.

³⁸Bórok lam rw brúm’-no Subraiyung tongmani rínok saka-o salo khe chumui rínokrokno kobolwi tongo tei horo khe rínokrokni saka-o hór hai chẃngwi tongmani nugo.