Read Kok Borok LAM RWMA 5 Bible Online

LAM RWMA 5 - Kok Borok bible

LAM RWMA 5

¹Aboni ulo khe Musi bai Aron Pharaoni thani thángwi hai hwnwi sa kha, “Israilni Subraiyung Kaitor hai hwnwi sa-o, ‘Ani bororokno rwi rohor di, bórok haphar bukcha-o thángwi ano bajuna bagwi chámung panda khlainai.’ ”

²Hakhe Pharao hai hwnwi sa kha, “Subraiyung sabo, ang bini kók khnana nangnai tei Israilrokno bo rwi rohorna nangnai? Ang Subraiyungno sini ya tei Israilrokno thángnani rw ya.”

³Musi bai Aron hai hwnwi sa kha, “Hibrurokni Kaitor chwng bai malai kha, chwng nono koi ja-o salthamni lama-o thángwi haphar bukcha-o khe chini Subraiyung Kaitorno ratharwi barokna bagwi tháng rw ja di, wng ya khe bo chwngno bemuk hamya bai eba choba bai khe butharnai.”

⁴Tamo khe Ijipni habugra bórokno hai hwnwi sa kha, “Musi bai Aron tamo norok bororokno bórokni samungni tlangna nai lai? Selengrokno samungo rwi bai di.”

⁵Pharao sa kha, nai di, norok tabuk báng lai kha, hakhe samungni yakarwi thángna nai lai-o.

⁶A salo Pharao bororokno mula tang rwnai bokhorokrokno tei haba sonairokno dagiui hai hwnwi sa kha:

⁷“Tabukni simi norok bórokno it takna bagwi chwkap ta rw si di; bórokno sak sak thángwi bórokni bagwi chwkap thum lai thung.

⁸Tamo khe bórok swkango takma swkno tabukbo ma taknai hwnwi saui rw di, nwng kisabo khái klaiwi man glak. Bórok seler gwja; aboni bagwino bórok ‘Chwngno chini Kaitorno ratharwi barokna thángna rw di’ hwnwi chirik lai-o.

⁹Bórokno teibo tang rwna bagwi samung kwrak boksinwi rw di tei bórok tatal samarokno khunju ta kái di.”

¹⁰Hakhe samung tang rwnai bokhorokrok tei haba sonairok thángwi bórokno hai hwnwi saui kha, “Pharao hai hwnwi sa-o, ‘Ang norokno chwkap rw glak.

¹¹Norokno buro mannai norokni nangma chwkaprok naituk lai tubu di, hai phano norokni samungrok le khái klaijak glak.’ ”

¹²Hakhe bororok chwkap thumna bagwi Ijip ha gwnangwi pírjagwi tháng lai kha.

¹³Samung tang rwnai bokhorokrok belai khe nangjagwi hai hwnwi dagiui sa kha, “Norok doui’-no samung ma páinai, salsani samung salsa’-ono; swkango chwkap tong phuru pái tẃi kheno ma páinai.”

¹⁴Tei Israilni haba sonai barja berjakrokno, Ijipni samungo samung tang rwnai bokhorokrok bórokno bú lai kha. “Tamo swkango it tak laima swk tabuk tak lai ya?” hwnwi kul lai kha.

¹⁵Hakhe Israilni haba sonairok Pharaoni thani phaiwi hai hwnwi sa lai kha, “Nwng tamo nini selengrok bai ahai samung khlai lang?

¹⁶Nini selengrokno chwkap se rwjak ya, hai phano bórok chwngno it tak lai di hwnwi sa-o. ‘Nai di, nini selengrok bujak bai kha; tamo khe cha ya le nini sakni bororok se cha ya.’ ”

¹⁷Tamo khe habugra hai hwnwi sa kha, “Norok seler gwja samung tangna nai lai ya; abo bai’-no norok, ‘Tho him di,’ Subraiyungni thani ratharwi barok lainai hwnwi sa lai-o.

¹⁸Tháng di samung tang lai di, norokno chwkap rwjak glak, hai phano swkango takma swkno it ma tak lainai.”

¹⁹Israilni haba daginairok nuk kha, bórok bejua-o klai laijak, tamni hwn khe, “Norok sal brúm it takmani slái kisabo khái klai man glak,” hwnwi sajak kha.

²⁰Bórok Pharaoni aroni ongkhorwi phai khe naising lai tongnai Musi bai Aronno hai hwnwi sa lai kha, “Subraiyung norok tamo samung khlai kha nuk kha.

²¹Habugra bai bini tẃiphangrokni thani chwngno naisler rwna bagwi Subraiyung nono majra rw thung. Chwngno butharna bagwi bórokni yago seng se yapharwi rw si-o.”

²²Musi Subraiyungni thani uphilwi hai hwnwi sa phi kha, “O Subraiyung nwng tamo bororokni hamya khlai lang? Nwng tamo wngwi ano rwi rohor?

²³Nini mungwi ang Pharaoni thani sana phai phuruni simi bo o bororokni hamya khlai kha tei nwng nini bororokno phi se phiyók ya.”