Read Kok Borok LAM RWMA 6 Bible Online

LAM RWMA 6 - Kok Borok bible

LAM RWMA 6

¹Hakhe Subraiyung Musino hai hwnwi sa kha, “Tabuk ang Pharaono tamo ma khlai nwng nuknai; bo bini phankrak yak bai khe bórokno bini hani tikhlaiwi rohornai.”

²Kaitor Musino hai hwnwi sa kha, “Ang se Subraiyung.

³Ang Abraham bai nukjak kha, Isak tei Jakobni thani Kwplaisa Kaitor wngwi nukjak kha, tamo khe ang bórokni thani Subraiyung[7] kwtharno bórokno saui man rw li ya.

⁴Ang Kanan hano bórokno rwna hwnwi swmai tangjak. Bórok a ha-o buini borok wngwi se tong lai-o.

⁵Aboni bere ang Israil bororokni kengai laimano khna kha, Ijipsong bórokno seleng snamwi khaui ton kha tei ang ani swmainobo muitu wng kha.

⁶Abo bai’-no Israilrokno hai hwnwi sa di, ‘Ang Subraiyung, norokno Ijiprokni yago seleng wngwi tongmani yakni phiyóknai tei yak kwrak bai khe norokno khengwi rwnai tei bórokno kwrak khe yagul sunai.

⁷Ang norokno ani borok snamnai tei ang norokni Kaitor wngwi Ijipni yago seleng wngwi tongmani yakni phiyóknai, ang norokni Subraiyung Kaitor hwnwi norok sininai.

⁸Ang Abrahamno, Isakno tei Jakobno rwna hwnmani ha-o tubunai. Ang a hano norokni’-no khlainai. Ang’-no Subraiyung.’ ”

⁹Musi o kókrokno Israil bororokno sa kha; hai phano bórok Musini kókno khunju kan li ya. Bórokni bwkha báimani bai tei belai khe khairokmasingcha khe sekhrupjakma bai se abo hai wngo.

¹⁰Subraiyung Musino hai hwnwi sa kha, “Ijipni bugra Pharaono thángwi saui di,

¹¹Israilni bororokno nini hani rwi rohor di.”

¹²Tamo khe Musi Subraiyungno hai hwnwi sa kha, “Nai di, Israil bororok se ani kókno khna gra ya, bahai khe Pharao ang tẃi khoteni kókno khnanai?”

¹³Subraiyung Musi bai Aronno hai hwnwi dagiui sa kha, “Israil bai Ijipni habugrano sa di, Israilrokno ha Ijipni tikhlai tubu di hwnwi ang sa-o.”

¹⁴Omorokno wng kha bórokni bokhorokrokni mungrok; Israilni bwsa Rubenni bwsarok wng kha, Hanok, Palu, Hesron tei Karmi. Omorokno Rubenni nokni bororok.

¹⁵Simionni bwsarok khe Jemuel, Jakimni, Ohad, Jakhin, Johar tei Sahul, Kananjwkni bwsarok; Omorokno Simionni bororok.

¹⁶Omorok wng kha, bosong mareui Lebini bwsarokni mungrok; Gersom, Kohat tei Merari, Lebi kwthang tong langma umor wng kha, bisi sarathamchisni;

¹⁷Gersomni bwsarok bórokni núkhungno rwgwi Libni tei Simei.

¹⁸Kohatni bwsarok; Amram, Ijar, Hebron tei Ujiel, Kohat thangwi tong langmani umor bisik sarathamchitham.

¹⁹Merarini bwsarok; Mahali tei Musi. Bosong rwgwi omorokno Lebini núkhungni bororok.

²⁰Amram buphani bukhuk Jokebedno káijak kha hakhe bo Musi bai Aronno bá kha, Amram nokha bisik sara tei thamchisni thangwi tong lang kha.

²¹Ijarni bwsarok khe, Kora, Nepheg tei Jikhri.

²²Ujielni bwsarok khe; Misael, Eljaphan tei Sithri.

²³Aron Eliseba bai káijago, Eliseba wng kha Aminadabni bwsajwk tei Nasonni bukhuk. Bo Nadab Abihu, Eliasar tei Ithamarno bá kha.

²⁴Korani bwsarok khe Asir, Elkana tei Abiasap; Omorokno Korani núkhungni bororok.

²⁵Aronni bwsla Eliasar Putielni bwsajwkno káijak kha. Bo Phinehasno bá kha. Omorokno Lebini bosong núkhungni bokhorokrok gwja.

²⁶Aron bai Musino’-no Subraiyung hai hwnwi sa-o; “Israil bororokno ha Ijipni tikhlai tubu-ui phai di.”

²⁷Bórokno Ijipni habugra Pharaono Israilni bororokno Ijip hani tikhlaina kókno sa-o, o Musi bai Aron’-no a sanairok.

²⁸Subraiyung Ijip ha-o Musino kók sa phuru

²⁹Subraiyung Musino hai hwnwi sa kha, “Ang se Subraiyung; Ijipni habugra Pharaono ang nono samarokno saui di.”

³⁰Tamo khe Musi Subraiyungno hai hwnwi sa kha, “Nwng saui mano ang kók rwng tha ya bahai khe habugra ani kókrokno khunju kainai?”