Read Kok Borok LAM RWMA 7 Bible Online

LAM RWMA 7 - Kok Borok bible

LAM RWMA 7

¹Hakhe Subraiyung Musino hai hwnwi sa kha, “Nai di, ang nono Pharaoni thani Kaitor hai snamnai. Nini takhuk Aron khe nini diyari wngnai.

²Ang dagima hai khe nwng kók sa di. Nini takhuk Aron khe Israil bororokno yakarwi rohor di hwnwi Pharaono sanai.

³Ang Pharaoni bwkhano rak rwnai, ha Ijibo kwbángma marirok kwmamsingcha samungrok phunuk phano Pharao nini kókno khna glak.

⁴Hakhe ang Ijipni saka-o ani yak beranai tei ani bororokno Ijipni tikhlai tubunai.

⁵Ang Ijipsarokni saka-o yak rw phuru tei bórokni bisingni Israilrokno tikhlai tubu phuru khe, ang’-no Subraiyung hwnwi Ijipsarok saui man anw.”

⁶Musi bai Aronbo abo haino khlai kha; bórok Subraiyung bó rokno dagima tẃi khlai lai kha.

⁷Pharaoni thani kók sa phuru Musini umor bisi charchi wng kha tei Aron khe bisi charchitham wng kha.

⁸Subraiyung Musi bai Aronno hai hwnwi sa kha,

⁹“Norok kwmamsingcha samung tangwi sóino hwnwi phunuk di, hwnwi Pharao norokno sa phuru khe, hakhe nwng Aronno, ‘Nini raidang naui chibuk kha rwna bagwi ha-o khiklai rw di’ hwnwi sa di.’ ”

¹⁰Hakhe Musi bai Aron Pharaoni thani thángwi Subraiyung sama tẃi’-no khlai kha; Aron bini raidangno Pharao bai bini bororokni bwskango ha-o khiklai rw kha tei abo chibuk khaui tháng kha.

¹¹Aphuru khe Pharao Ijipni bini siyan gwnangrokno tei swkal kwrwngrokno ring kha; bórokbo bórokni rwngmung bai abo hai’-no khlai kha.

¹²Bebak bororokno bórokni raidangno ha-o chibuk snam lai kha tei abórok chibuk khaui tháng kha. Tamo khe Aronni raidang khe bórokni raidangno monogwi khibi kha.

¹³Hai phano Pharaoni bwkha kwrak wngwi tong kha tei bo Musi bai Aronni kók khna li ya; abo Subraiyung sama haino wng kha.

¹⁴Hakhe Subraiyung Musino hai hwnwi sa kha, “Pharaoni bwkha kwrak khlai kha, bo bororokno thángna rw li ya.

¹⁵Pharao phung aidrobo twima-o tháng phuru bo bai thángwi malai di; twi rukungo khe bono naisingwi tong di tei chibuk khanai a raidangno yago tẃiwi tháng di.”

¹⁶Hakhe nwng bono hai hwnwi sa di, ‘Subraiyung, Hibrurokni Kaitor, ano hai hwnwi saui nini thani rohoro, ani bororok haphar bukcha-o thángwi ano suriui manna tẃi khe ani bororokno rwi rohor di; nai di nwng tabukbo khnana nai ya wngwi tongo.’ ”

¹⁷Subraiyung hai hwnwi sa-o, “Omo hai khe nwng ano Subraiyung hwnwi sinai; ‘Nai di, ang ani yago tongmani raidang bai Nil twima-o swpraknai, a twi thẃi khaui thángnai,

¹⁸árok thwinai, Nil twimani twi mwnamwi thángnai, Ijipni bororok oroni twino nungwi man glak.’ ”

¹⁹Subraiyung Musino hai hwnwi sa kha, “Aronno dagi di, ‘Nwng nini raidangno yago na di tei nwng nini yakno Ijipni twi phaising pholok di, twimarokni bwkhak, twisarokni tei pukhirirokni, twidurokni bwkhak thẃi kha rwna bagwi pholok di;’ Ijipni ha gwnangwi’-no thẃi máng wngnai, buphangni eba holongni twi tonma manwirokni twirokbo thẃi kha bainai.”

²⁰Musi bai Aron Subraiyung dagima haino khlai kha; Pharaoni mokol bwskango tei bini selengrokni mokol bwskango bo bini raidangno tisa kha tei Nil twima-o swprak kha tei Nil twimani bebak twirok thẃi khaui tháng kha.

²¹Nil twimani árok thwi kha, Nil twima mwnam kha, hakhe Ijipsarok Nil twimani twi nungwi man li ya tei Ijipni ha gwnangwi’-no thẃi máng wng kha.

²²Ijipni danda-baji kwrwngrokbo bórokni kókmung bai abo haino khlai lai kha; hakhe Pharaoni bwkha ragwino tong kha, bo bórokni kókrokno khna li ya; Subraiyung sama haino Musi bai Aronni kókrok khna li ya.

²³Pharao kiphilwi bini nogo thángwi pái kha. Bo omorokno kisa phano bwkha-o nangjak ya.

²⁴Nil twimani twi nungwi man ya wngwi Ijipsarok Nil twimani yang yang hakhor khur lai kha.

²⁵Subraiyung Nil twimano swprakma yagulo salsni lái kha.