Read Kok Borok JOB 1 Bible Online

JOB 1 - Kok Borok bible

JOB 1

¹Ha Ujo[1] Job hwnwi borok khoroksa tongmani. Bo Kaitorno surinai borok tei bini thani sói khe tongo, bo borok kaham tei mungsa phano samung hamya tang ya.

²Bini khoroksni chwla bwsa tei khoroktham bwrwi bwsarok tongmani.

³Bini mak snisai merarok, mak thamsai mangingangrok, bojro jor ba-ra musuk chwla, ba-ra korai chirkarok tei kwbángma selengrok tongo; aboni bagwi salkabai-o bo’-no rang gwnang kuk tongmani.

⁴Bini bwslasong khoroksa tei khoroksani nogo kaisani ulo tei kaisa khe chámung panda khlai lai-o; aro bórok bórokni bukhuk khorokthamroknobo chámung panda-o bórok bai pal chá phaina-nung phaina bagwi kobok lai-o.

⁵Bórok matheni’-no panda pái khe bwsarokno na rw horwi kwthar khlai-o, Job phung aisirisiri bachaui bwsa khorokthamrokni bagwi ratharmung barogwi kwthar khlai-o; tamni hwn ba Job hai hwnwi sa-o, “Ani bwsarok sumsok khlaina phano tongo tei Kaitorno phano haino hamya sana tongo.” Aboni bagwi Job obo hai khlai-khlai-o.

⁶Salsa chuknoha-o tongnairok Subraiyung bai malaimani salo, Subraiyung bai malainani phai lai kha. Soitanbo aro bórok bai baksa tongo.

⁷Subraiyung soitanno hai hwnwi sẃng kha, “Nwng buroni phai sla?” Soitan[2] Subraiyungno hai hwnwi sa kha, “Ang ha saka-o obo hai kheno tháng-phai khlaiwi tongo tei aro kitingwi berai tongo.”

⁸Subraiyung Soitanno hai hwnwi sẃng kha, “Nwng ani seleng Jobno nu da nuk kha?” Bo hai khoroksa phano ha saka-o borok sói tei borok kaham kwrwi. Bo ano suriui tongo tei bo mungsa phano samung hamya tang ya.

⁹Hakhe Soitan Subraiyungno hai hwnwi sa kha, “Job haino mungsa man yaui’-no da nono suriui tongno?

¹⁰Nwng bono hamyani yakni kati rwui máng tongo, bini núkhungno tei bini bebak tong kwrwirokno nwng mwrwgwi tongo. Nwng bini bebak samungrogobo hamari rw kha tei ha saka-o bini mal-matarokbo er kha.

¹¹Tamo khe nwng bini tong kwrwi bebak naui pái khe hakhe le bo nono mwkhang naisigwino swrai anw!”

¹²Subraiyung Soitanno hai hwnwi sa kha, “Do akon, bini tong kwrwi bebakno nini yago rwjak kha; nwng bono simi yak rwui man glak!” Hakhe Soitan Subraiyungni aroni thángwi pái kha.

¹³Salsa Jobni bwsarok takhuk okrani nogo chá laiwi tei angur bwtwirok nung laiwi tong phuru;

¹⁴Jobni thani khoroksa tẃitun phaiwi hai hwnwi sa phai kha, “Chwng musuk chwlarok bai al chuai tongmani tei aboni gana-o khe korai chirkarok jabra chá laiwi tong báimani,

¹⁵achomsa Sabianrok[3] phaiwi sekproui bebakno tlangwi tháng bai kha, bórok ano karwi tei bebak nini selengrokno butharwi pái kha. Ang simi se nono o kókno sa phainani bagwi kwthang tong rwk si-o.”

¹⁶Bo a kók saui pái ya sini’-no tei khoroksa seleng phaiwi hai hwnwi sa phai u kha “Mera tei mera mwrwknairok bebak phirang kokjagwi thwi bai kha, ang simi se nono o kók sa phaina bagwi kwthang tong rwk si-o.”

¹⁷Bini khúk thák ya sini’-no tei khoroksa seleng phaiwi hai hwnwi sa phai kha, “Kolodiarok[4] bodol kaitham khe phaiwi mangingangrokno segwi tlang tháng bái kha tei selengrokno khe seng bai tanwi butharwi klang tháng bai kha; ang simi se nono o kók sana bagwi kwthang tong rwk si-o.”

¹⁸Bini khúk thák ya sini’-no tei khoroksa seleng phaiwi hai hwnwi sa phai kha, “Nini bwsarok nwsla okrani nogo chá lai nung lai khe tongmani,

¹⁹achomsa hasing panthorni babaibrwini nokbar kotor phaiwi nokrok swbaiwi bórokno butharwi klang bái kha. Ang simi se nono o kókno sana bagwi kwthang tong rwk si-o.”

²⁰Hakhe Job bachaui thángwi bwkha nangjagwi bini rírokno chir kha, bokhorok silwi ha-o botok khe klaiwi khulum kha.

²¹Tei bo hai hwnwi sa kha, “Ang amani oksingni yak bukcha phaimani, yak bukcha kheno tháng phinai; Subraiyung rwmani, Subraiyungno tlangwi tháng phi kha; Subraiyungni mung kuchuk wng thung.”

²²Obo hairok wngwibo Job sumsok khlai li ya tei Kaitorno bo mungsa ber li ya.