Read Kok Borok JOB 10 Bible Online

JOB 10 - Kok Borok bible

JOB 10

¹“Ang kwthang tongnano naisler kha; ang ani sajaknai tongmarokno ahaino sanai, ang ani bwkha hamya wngmarokno tẃiwi sanai.

²Ang Kaitorno ahai hwnwi sanai, ano hamya ta hwn di; ano tamni kók sanani tong sa di?

³Nwng aswk sekhrupma cha da cha, nwng snammano yakarwi rwmani cha da cha? hakhe borok hamyarokni chapmano nugwi tamo mwnwi ba?

⁴Nini bahan-bwthẃini mokol to de tong? Bororok nuk tẃi de nwng nuk?

⁵Nini langmarok le borokni langma hai diba, eba nini ayuk le borokni ayuk hai diba?

⁶Hakhe nwng tamo sumsokrokno tei ani samung cha yarokno ma naituk?

⁷Nwng ani majra kwrwi hwnwi saui man phano, ano khoroksa phano nini yakni phiyógwi man glak.

⁸Nini yak bai se ano tangwi sakduk rw-o; tei abo bai’-no ano sobo sokomoro.

⁹Muitu narwk di, nwng ano harpek bai se tago; hakhe nwng ano hadlwi khlai phinai hai de?

¹⁰Nwng ano abuktwi hai khe lu-ui abono bothon kha rw ya diba?

¹¹Nwng ani bwsakno bekreng bai pecha bai snam kha tei bekrengno bahan tei bukur bai bólsa kha.

¹²Nwng ano rangma rw kha tei kwrak khe hamjak kha, tei ani pholanobo nwng se narwgwi tono.

¹³Hai phano omorokno nwng nini bwkha-o hui tono; omo haino nwng nai-o hwnwi ang si-o.

¹⁴Tumung ang sumsok khlai khe nwng naichomwi tongo, tei ani a cha ya khlaima bagwi khorai yaui tong ya.

¹⁵Tumung ang cha ya khlai khe ma gaija thung! Tei kaham khlaiwi bo ang khorok tisaui man ya, tamni hwn ba ang cha ya-chúk ya bai se kupulung tei ani sátokjakmano se ma naisigo.

¹⁶Nwng ano singho choprok tẃi khe choprogo; tei ano dera rwna bagwi swprak swprago.

¹⁷Nwng ano kebengwi kwtal khe bachaui kók sa-o; nini jolima báng rw-o; kwtal khe swprakna bagwi sengkrakrok tubu-o.

¹⁸“Nwng ano tamni bagwi ma achai rw lang? Bui nuk ya sini’-no thwi khe se ham kha mun,

¹⁹Okni ongkhorwi mangkhoro ma tháng khe, tei ang kwrwi hwn khe se ham kha mun.

²⁰Ani o langma barasa ya da? Ano kisa swk phano lengla rw si di

²¹ang dakti’-no thángnai tei kiphil phi glak, ang thángma ha wng kha mwnak tei kosom.

²²O ha wng kha mwnaksajak tei ubrum-jabrum aro pohor kwrwi mwnakjak.”