Read Kok Borok JOB 11 Bible Online

JOB 11 - Kok Borok bible

JOB 11

¹Hakhe Namatsa Jophar sa kha:

²“Aswk kók kwbángma sẃngjakmani abo uphilwi sajak ya de tongnai, tei kók kwbángma sama bai borok kaham khoroksa hwnwi de romjakno?

³Nini kók bai buino siring siring de tonwi manno, tei nwng lachimasingcha wng phuru nono khoroksa phano lachimung rw glak da?

⁴Nwng hai hwnwi sa-o, ‘Ani kók le katswi kaham, tei ang Kaitorni mokolo kwthar.’

⁵Tamo khe Kaitor nono sa khe tei nini thani bini khúk kiyok khe se,

⁶bo nono huijak elemno sa thung! Tamni hwn khe simungni kwbángma bedek tongo. Hakhe se Kaitor nono nwng majra manna tongmani khaksa phano se rw ya kho hwnwi nwng saui mannai.

⁷“Nwng Kaitorni kuthuk manwirokno tikhlai de manno ba? Kwplaisa aswk jorano khlai mano hwnwi nwng saui da man ba?

⁸Abo nokhani slái se kuchuk, nwng tamo khlai mannai? Nwng morkeni thukmungno chongmani slái abo kuthuk ya de?

⁹Abo o haktorni slái kotor tei twijlangni slái’-bo kuar.

¹⁰Tumungno bo phaiwi alongo chop phai khe, tei buj thumna bagwi kuthum rw khe, sabo bono kebengnai?

¹¹Tamni hwn ba bo samung chúk ya bororokno sini-o; samung hamya tangnairokno bo naiwi nai khe nuk glak diba?

¹²Butuasarok siyan wng anw, sicha anw. Borokbo ahaino korai chirkani bwsa hai kheno achai-o.

¹³“Tumungno nwng nini bwkhano sói khe buchi rw khe, nwng Kaitorni phaising yak pholok sa anw.

¹⁴Tumung nini yak sumsok bai kupulung wng khe, abono hakchal khlai di, tei nini nokrogo cha yarok ta tong thung.

¹⁵Kubui’-no nwng srai-srai khe nini bumkhang tisaui mannai; nwng kwrak khe kirina kwrwi khe tongwi mannai.

¹⁶Nwng aswk birmanrokno poknai; abórokno twi kotor kochogwi thángwi páijak hai khe se nwng pogwi thángnai.

¹⁷Nini langma sajra jorani sal chẃngmani slái chẃngnai; aboni mwnakma se aidrop swk kipir wngnai.

¹⁸Aro khatungma tongma bai nwng bwkha beraui mannai; nwng mwrwkjagwi kwchang kwchang khe lenglaui mannai.

¹⁹Nwng thu phuru khoroksabo nono sikirinai tong glak; borok kwbángma’-no nini bwkhak phainai.

²⁰Tamo khe borok hamyani naisikma le chúk glak; bebak yóknani lamarok kwmanai, tei bórokni páithak khatungmarokni rangma chonai.”