Read Kok Borok JOB 12 Bible Online

JOB 12 - Kok Borok bible

JOB 12

¹Hakhe Job hai hwnwi sa kha:

²“Norok bororok, obono mungsa bwkha urumuru wngna nang ya, simung norok bai baksano thwinai.

³Angbo norok swkno si-o; ang khe norokni slái teisa si tha ya. Sabo omorokno si ya wngnai?

⁴Ang ba kichingsongni thani mwnwijaknai se wng si-o; ang Kaitorno ringo, tei borok kahamsa hai khe angbo ani ringmano khna anw hwnwi khatungo, ang le mwnwijaknaisa se wng si-o.

⁵Norokni mungsa jwngjalrok kwrwi, hai phano norok ano mwnwi lai-o; káslena naijakno norok dagarwi khiklai lai-o.

⁶Sikhokrok tei borok hamyarokni núkhung se kwchang kwchang, Kaitorno joli rwnairok se kwchang kwchang khe tongo, aile bórokni mwtairok se bórokni phan.

⁷“Tamo khe, mal-matarokno sẃng di, bórok norokno phrwngnai; nokhani toksarokno sẃng di, bórokbo norokno sanai;

⁸eba ha sakani jabra-bobrarokno [8] sẃng di abórok norokno phrwngnai; tei twijlangni árokbo norokno sakhlainai.

⁹Omorokni bere bubo ba Subraiyungni yak se omorokno khlai-o hwnwi si ya tong?

¹⁰Hama gwnangrokni langma tei bororokni rangma le bini yago se.

¹¹Bwslai chámung thokjak tẃi norokni khunjubo kókrok khna thokjak ya diba?

¹²Chakra borokni khe simung tei sal Kwbángma tongma bai sima-rwngma báng ya diba?

¹³“Kaitor se simung bo gwnang tei phanbo gwnang; bo phrwngwibo mano tei rwngmungbo tongo.

¹⁴Bo swbai khe khoroksa phano tisa phirwi man ya; Bo kholop khe khoroksabo phiyogwi man ya.

¹⁵Tumung bo uatwi ua rw ya khlai ton khe ransa-o; bo ua rw khe ha lom saui phai-o.

¹⁶Bini thani phan tei simung tongo; bandinai bai bandijaknai kwnwi nwino bini se.

¹⁷Bo tẃiphangrokno lama koró rw-o; tei buj thumnairokno butua snamo.

¹⁸Bo khajak habugrarokno phiyógwi rw-o, hakhe alongo chobwi rw-o tei bwchango rí soroi kha rw-o.

¹⁹Bo ochairokni kanmungno khengwi khibi-o, tei suar gwnangrokno norwi khibi-o.

²⁰Bo bwkha berajaknai bororokni búkhúk muthubwi rw-o, tei chakrarokni simungno rosaui na-o.

²¹Bo suar gwnangrokno lachi rw-o, tei tẃiphangrokni phanrokno bel rw-o.

²²Bo mwnakma-o phobwi tongjakrokno khursaui rw-o, tei mwnak kosomno pohor kwchẃngo tubu-o.

²³Bo dopharokno kotor khlai-o, tei bórokno sokomoro, bo dopharokno er rw-o tei lama soui tlang phiro.

²⁴Bo ha sakani tẃiphangrokni simungrokno rosaui na-o, tei bórokno lama kwrwi-o him rwui lengpra rw-o.

²⁵Bórok pohor kwrwi mwnago koprom lai-o; tei bo bórokno chuak phekjak hai khe didak-midak khlai-o.