Read Kok Borok JOB 13 Bible Online

JOB 13 - Kok Borok bible

JOB 13

¹“Nai di, ang omo bebakno nuk kha, ang khunju baithang khna kha tei abono buchi kha.

²Norok simano angbo saui man kha; angbo norokni slái teisa hamtha ya ahai ya.

³Tamo khe ang kwplaisano sanai, tei ani kókno Kaitor bai khe sa laina muchungo.

⁴Norok khe tatal bai khe kholop lai-o; norok bebakno chúk ya daktor máng.

⁵Tumung norok siring siring tong khe, abono norokni simung wngnai!

⁶Tabuk ani kók chama-cha yano khna di, ani khukni kobokmano khna di.

⁷Nwng Kaitorno tatal sanai hai de, tei bini mungwi bandiui kók sanai hai da?

⁸Norok chajak rere khe tongnai hai da, norok Kaitorno de buj thumna sanai?

⁹Bo norokno naichom khe norokni mungsa de kaham nukno? Eba norok khoroksa tei khoroksano bandi tẃi khe bono bandiui de manno?

¹⁰Tumung nwng yasa bwkhak baitokjak wng khe bo nono kulnai.

¹¹Bini phankrak norokno sikiri glak da, tei bini jolimung norokni saka-o klai glak da?

¹²Norokni phrwngmung kókrok thapla hai samung chúk ya se, norokni kók kasu-ui samarokbo harpek hai se.

¹³“Ano siring siring khe tong rw di, hakhe ang sa anw, tei ani saka-o tamo phainai phai si thung.

¹⁴Ang sakni bahanno se uárnai, tei sak sakni langmano phano naui páinai.

¹⁵Nai di bo ano butharnai; ani khatungna kwrwi kha tamo khe ang bini bwskangni sakno kati rwui tonnai.

¹⁶Omono ano mwthangnai wngnai, Kaitorno tẃi ya bororok bini bwskango bachaui man glak.

¹⁷Ani kókrokno khunju kaiwi khna di, tei ang sakhlaimano nini khunju-o kan di.

¹⁸Nai di ani sajaknai kók tiyar khlai kha; ang si-o ang sóino hwnjaknai.

¹⁹Sabo ani cha ya wng kha hwnwi bernai? Hakhe ang siring siring khe thwina se tiyar tongo.

²⁰Ano mungnwi simino rw di, hakhe ang nini thani huijak glak:

²¹ani sakani nini yakno nor si di, tei ano kirimasingcha khe tei ta sikiri si di.

²²Ano ring di hakhe ang khnanai; eba ano sẃngna rw di tei abono ano sakhlai di.

²³Ani cha ya tei sumsok bwswk báng lang? Ani cha ya tei sumsokrokno ano phunugui rw si di.

²⁴Nwng tamo ang bai huijak, tei ano nini kebengnai ari hai khe nuk?

²⁵Nwng bwlái kobonjakno tei gundakno riphriknai hai de?

²⁶Nwng ani bagwi belai kók sitrarok swi kha, tei sikla jorani samung cha yarokni bagwi manjak rw kha.

²⁷Nwng ano sorduk bai yakungo kha-o, tei ani yapri matheno naichomo; nwng ani yapha tolaroknobo rwgwi nai-o.

²⁸Khoroksa khoroksa sok tẃi khe kwmaui thángo, kuruma khuntijak rírok hai khe páiwi pái-o.