Read Kok Borok JOB 14 Bible Online

JOB 14 - Kok Borok bible

JOB 14

¹“Thwiblangsa, bwrwini ogo achainai, salrok le báng tha ya se tong kesep se báng kugo,

²khum bar tẃi khe barwi hoichaui thángo, sampili kwma tẃi khe páiwi thángo.

³Abo tẃirokno da nwng kaichomwi naiwi tongnai? Nwng bai baksa de anobo bujo bacha rwnai?

⁴Manwi hamyani sabo manwi kwchẃng kuphurno tikhlai mannai? Khoroksa phano ya.

⁵Bini langmani salrok swkangno chongjak, tei bo nokha tal bwswk jora thangnaibo chongjak, tei nwng chongwi tonma hai kheno abórok wngnai,

⁶hakhe bono ta naisik si di, bono yakarwi rw si di, hakhe bórok bórokni a salrokno munirok tong tẃi khe tongwi man anw.

⁷“Tamni hwn khe buphangni khatungmung tongo, tumung abo tanjak khe rotomsaui phai phiro, aboni bosokrok cho phlai tháng glak.

⁸Ha-o bini yarwng chakra wng phano ha-o bothoma thwi phano,

⁹abo twi mansa khe berdum rwui rotom sanai tei buphang bwsa hai khe bedek buprarok rwsanai.

¹⁰Borok thwi-o, hai kheno pái thángo; rangma cho khe bo buro thángwi tongwi?

¹¹Twidurok twi ranwi thángo, tei twimarokni twibo ransaui thángo,

¹²bororok thwi khe bacha phi ya; nokharok kwmaui tháng ya sak, bórok bacha glak eba thumani sicha glak.

¹³“Nwng ano kwthwirokni ha-o hui khe se ang chajak si-o, hakhe ano muitu khlaiwi nini chongjak jora láiwi jolima hamyasak ano huiwi ton si di.

¹⁴Borok thwi khe, thang phirwi de man? Ani samungni sal pái ya sak, ani yóknani sal phai ya sak ang naisingwi tongnai.

¹⁵Nwng ano ring khe ang kók yachaknai; nwng nini samungrokno khlaina khatungnai.

¹⁶Hakhe aphuru nwng ani yaprirok lekha glak, tei ani sumsoknobo naichom glak;

¹⁷ani cha yarok kholjango chujagwi tongnai, tei ani sumsokrokno kholopnai.

¹⁸“Hatháirok klai báinai tei kwlwibranai, holongthairok tongma jidoloni norjaknai;

¹⁹twi holongrokno kochok rwnai; tei twi tur khe kochokma bai harokno kochok rw-o, hakhe nwng bororokni khatungmarokno kwma rwnai.

²⁰Nwng bórokno mechen phlai tongo, tei bórok abo haino wngwi ma thángo; nwng bórokno mwkhang sógwi rwi rohoro.

²¹Bini bwsarok bórijago, hai phano bórok abono saui man ya; bórok lachimasingcha khlaijaknai tamo khe bórok abono romwi man glak.

²²Bórok sakni bwsak sajakma simi si-o, tei sakni bagwi simi se kabo.”