Read Kok Borok JOB 15 Bible Online

JOB 15 - Kok Borok bible

JOB 15

¹Hakhe Temansa Eliphas hai hwnwi sa kha:

²“Si kwrwng borok de kók nang ya sa thai tong ba, tei bórok sak sakno salkabaini nokbar bai kupulung da khlai ba?

³Samung chúk ya kókno tẃi de bórok kók báng lai ba, eba samung kaham wng ya kók sa de sano ba?

⁴Tamo khe nwng Kaitorno kiri yaui khlai khe, Kaitorno suri thani-o kebengo.

⁵Tamni hwn ba nini cha yarok se nono sanani phrwngo, tei nwng kók bandi sanano saiwi na-o.

⁶Nini kók se nono hamya sa-o, ang sa ya; nini kók se nono kebengwi sa-o.

⁷“Nwng de borok wngwi achai granai ba? Hatháirokni slái nwng de swkang wng gra ba?

⁸Kaitor chapmano nwng khw de khna kha ba? Nwng simi de siyan gwnang wng si?

⁹Chwng si yano nwng tamo si lang ba? Chini tamo si súk yano nwng si kha ba?

¹⁰Bwkhnai kuphur tei chakrarok chini babai-o se, bórok nwphani slái se okra gwja.

¹¹Kaitor khakchangma rwmano nwng wngjak ya hai da, tei bo nono kók kwchang samani tamo chúk ya diba?

¹²Nini bwkha tamo nono kobon rw, tei nwng tamo aswk thamchi kajak,

¹³abo tẃi khe nwng Kaitorno jolijago tei abo hai kókrok khukni ongkhorjak ya diba?

¹⁴Thwiblang borok kwthar de wngwi man ba? Eba bwrwini okni achainai srai-srai borok de wngwi man ba?

¹⁵Nai di Kaitor bini suarirokno suda bwkha bera ya, tei nokharokbo bini mokolo kwthar wng ya;

¹⁶hakhe borok twi nung tẃi se hamyano nungo hwn khe, aboni slái hamya borok le bwswk se selengmasingcha tei cha ya wng khna!

¹⁷“Ani kók khna di, ang nono phunuknai; ang nukmarokno ang sakhlainai

¹⁸siyan gwnangrok samani tei bórokni chuchusong hui yaui tonmano,

¹⁹bórokno se tongthai ha rwjago, tei kubun bororok aro habwi man li ya.

²⁰Borok hamya kwthang tong sak tong khochoro ma tongnai, bisi yaphangni simi bisi páithak jora bórokni sátokjakna chongjak tongo.

²¹Bórokni khunju-o kirimung khorang máng; tong kwchang phuruno bini saka-o sokomornaisa phaisanai.

²²Bórok mwnakni yakni yóknabo nai ya, hakhe seng bai tantharjakna bagwi se bórok chongjak.

²³Bórok ‘Ani chámung buro?’ hwnwi buini harogo naitugwi thángo; bórok bórokni sal mwnak samphaui phaimano si-o;

²⁴bwkha báimung tei uanamungrok bono sikiri-o; bórok abo hai khe bwkha thwijak khe habugra chobani bagwi tiyar wng tẃi khe tiyar wngwi ma tongo;

²⁵Tamni hwn ba bórok Kaitorno kebengwi yak tisa kha, tei kwplaisano hamya sa kha,

²⁶kung chugui bórok rwjama phuino harwi Kaitorno kebengsa kha;

²⁷tamni hwn ba bórokni bumkhango bupham khaui kuphung wng kha, tei bwchangobo bupham kha rw kha,

²⁸bórok kamiyung khibijago ma tongnai, a nokrogo khoroksa phano tong glak, tamni hwn ba a nokrok komorwi báikhrubwi thángnai;

²⁹bórok gwnang wng glak, tei bórokni rang-rírokbo páiwi thángnai, o ha-o bórok yarwng surkhlai man glak;

³⁰bo mwnakni yakni yók glak; bini bedekrok hór bai sókjaknai, tei bubar khe nokbar bai kobon rwui tlangjaknai.

³¹Bórokni bukcha-o bwkha ta bera si thung, abo sakno se bandi-o; tamni hwn ba bukchano se bórok sokat khe mannai.

³²Bórok bórokni jorani swkangno tanpháijaknai, tei abo khwrangsaui tong glak.

³³Bórok angur phang kwthwngo jangrijak tẃi khlaijaknai, olib bubar kwrai tẃi khe ma kwrainai.

³⁴Tamni hwn ba Kaitorno kiri ya bororok bwthái thái glak, tei rang-rí tugwi tangma nok khe hór bai khamwi páinai.

³⁵Bórok tongmung sitra tongwi bwthái hamya thái rw-o, bórok bandina bagwi phor-phor khe tongo.”