Read Kok Borok JOB 16 Bible Online

JOB 16 - Kok Borok bible

JOB 16

¹Hakhe Job hai hwnwi sa kha:

²“Ang omo hai kwbángma kókrok khna kha; norok bebakno bwkha srang rwna hwnwi bwkha butharnairok máng se.

³Kók nokbarni páithak to de tong? eba tamono joliui nwng khúk thak ya khe kók saui tongnai?

⁴Tumung nwng ani sak slái-o wngma te angbo nwng sa tẃi kheno saui man kha mun; angbo pal khe kók manju-ui nono kebengwi saui man kha mun tei nono naisigwi bokhorok suku-suku khlai man kha mun.

⁵Ani khúk bai nono bwkha rak rwui man kha mun, tei nini kwsa samarokno kók kwchang saui kwchang rwui man kha mun.

⁶“Tumung ang kók sa phano ani sak sama le hamya, tei siring siring tongwibo abo hamwi tha de tháng ba?

⁷Kubui’-no Kaitor ano tabuk rí soroi hai khlai laha; ani núkhungni bebak tong kwrwi bukcha khlaiwi rw kha.

⁸Bo ano khairok susuk khlai kha, abo ano kebengwi kók sachru-o; ang rammani abo ang bahai wng kha abono se phunugo.

⁹Bo joliui swpragwi chiki-chakai khlai kha; bo ano naisigwi ua hul kha; ano kebengnai arirok ano mokol kotor kotor khe naisik kha.

¹⁰Bórok ano naisigwi uachrik-muchrik wng lai-o; ani khangaro swprago; bórok pal khe ano kebengna kuthum lai-o.

¹¹Kaitor ano borok hamyarokni yago yapharwi rw kha, tei borok cha yarokni yago khiklai kha.

¹²Ang kwchang kwchang khe tongmani se, bo ano swbaiwi khaknwi khlai kha; chopa sórwi ano swpragwi phondrik-phandrak khlai kha; bo ano se mokol kai si-o;

¹³bini chakhlarok ano gerepsa kha. Bo khairokma kwrwi khe ani oklebo yophla kha; bo ani bokhlono ha-o khi klai rw kha.

¹⁴Bo ano swprak ma saka swprak kha; sengkrak hai khe khachigwi phai tẃi khe ani thani phai-o.

¹⁵Ang sago rí soroino se chum si-o, tei hadlwi-o ani bokhorok súkpái kha.

¹⁶Kapmani bagwi ani mwkhang chaksa kha, tei ani múkur somcha kha,

¹⁷ani yak bai samung sitra tangjak ya phano, ani surima khe kwthar.

¹⁸“O ha, nwng ani thẃino ta ból di; ani kapma lenglathai ta man thung.

¹⁹Tabukbo chuknoha-o ani bagwi kók sachru-ui tongo, tei ani bagwi sa chrunaisa khe chuknoha-o se tongo.

²⁰Ani kichingsong ano thesra kari lai-o; Kaitorni thani ani muktwi yor khlai kha,

²¹bo borokni wngwi Kaitorni thani bikiching hai khe koiwi tongo.

²²Bisiknwi bisikthamni ulo ang thángwi páinai, ang aroni tei kiphil phi glak.