Read Kok Borok JOB 17 Bible Online

JOB 17 - Kok Borok bible

JOB 17

¹“Ani khá bái súkjak, ani salrokbo pái laha, ani mangkhorbo tiyar wngjak.

²Ano lachi rwnairok ano kiting laijak, bórok mwnwi laimano ang naisigwi ma tongo.

³“Nwng baithang ani bagwi kók rw di; sabo se ani wngwi bachanai tongnai?

⁴Nwng bórokno buchi ya khlai kha ba, aboni bagwi nwng bórokno kwplai wng rw glak.

⁵Bikichingsongno sokatni bagwi khibinai borokni bwsarok mokol phula wngnai.

⁶“Bo ano lukurokni thani mwnwimung khlai kha, tei ang bororok bai khuktwi musujaknai wng kha.

⁷Bwkha nang te nang te ani mokol nuktha li ya tei sak ramwi chemai súk kha.

⁸Borok kahamrok abo bai bwkha báijak kha, tei borok kahamrok borok hamyarokno kebengwi bachanai.

⁹Tamo khe borok sóirok le bórok tongma tẃi kheno tongnai, hakhe bórok tongmung srai-srai khe tongmani bagwi rakma saka raksanai.

¹⁰Tamo khe norok tabuk kiphil di tei ang norokni bisingo khoroksano phano siyan gwnang nuk li ya.

¹¹Ani salrok lái laha, ani chapmarok, kháni muchungmarok kwma bái kha.

¹²Bórok horno khe sal hwnwi chong lai-o; ‘Pohorno’ se bórok ‘Mwnakma sampha kha,’ hwnwi sa lai-o.

¹³Tumungno ang mangkhorno ani nok hwnwi naisik khe eba mwnago thuyam bo khe,

¹⁴Tumung ang hakhorno ‘Nwng se ani apha,’ tei kenjuano ‘Ani ama,’ eba ‘Bukhuk’ hwnwi sa khe,

¹⁵hakhe ani khatungma buro? Sabo ba ani khatungma nuknai?

¹⁶Khatungmung thwilam jora thá de thángno? Chwng pal khe da hadlwi-o thángnai?”