Read Kok Borok JOB 18 Bible Online

JOB 18 - Kok Borok bible

JOB 18

¹Hakhe Suhitni Bildad hai hwnwi sa kha:

²“Nwng tei bwswk kókno sa sinai? Nwng chong si di, hakhe chwng sa sinai.

³Chwngno tamo wngwi mal-matarok hai khe nuk? Tamni butua khe nuk?

⁴Joliui sakno kwsa cha rwnairok, norokni bagwi haktor ya da yakarjakno eba holongdaprok de norjak bai’-no?

⁵“Ao, borok hamyarokni chati le buthar jago, bini hórjlai chẃng ya.

⁶Bini nok chati chẃng yaui mwnagwi tongo, bórokni aroni chati thwiwi thángo.

⁷Bini yapri kwrak belwi thángo, tei bini chapmarok bono khiklaiwi rw-o.

⁸Bini yakungno bo’-no chei-o khiklai-o, tei bórok hakhoro himwi thángo.

⁹Bini yakorai-o bono khẃi-o kwcha rw-o.

¹⁰Bini bagwi ha-o dwkhwi huijak tei lama-o khe khẃi chakjak.

¹¹Ayang-uyang bórok sikirijago, tei abo bórokni yapri rwktharwi tongo.

¹²Bórok ok khuiwi belo, sokomormung bórokno thutai rwnani bagwi tiyar wngjak.

¹³Bórokni bukur bemuk bai kupulung, butharnaisani bwsa okra bini yaphungrok dera rwi páinai.

¹⁴Bórok bórokni tongma nokni aroni kariui tubujak kha, tei sikirinai bugrani thani tubujak kha.

¹⁵Bini nogo mungsa phano kwrwi kha; bini tongthai-o gwndwk sarjak.

¹⁶Bisingo bini yarwng khe ransajak tei sakani bedekrok khe mwranjak.

¹⁷Bini mung o ha sakani komorwi thángo, tei bórokni mungwi lamarokni mungbo pharjak ya.

¹⁸Bo pohorni tikhlaiwi mwnago rohor jago, tei ha sakani rwkhlaiwi rohorjago.

¹⁹Bini jaiti-masani bisingo bini bwsarokbo kwrwi tei bini nogo khoroksa phano kwthang kwrwi.

²⁰Salthángbaini bororok bini manjakmano nugwi sundruma chánai, tei a kirimasingcha wngmarokno nugwi kirijaknai.

²¹Ao, Kaitorno kiriyarokni tongthai abo haino, Kaitorno sini yarokni tongthai abo haino.”