Read Kok Borok JOB 19 Bible Online

JOB 19 - Kok Borok bible

JOB 19

¹Hakhe Job hai hwnwi sa kha,

²“Norok ano tei bwswk sátok sinai tei kókrok bai khe bwswk ano tei bwkha swbai sinai?

³Uáichi norok ano thesra kari lai kha; ano omo tẃi khe cha ya khlaimani norok lachi ya de?

⁴Tei tumungno ang cha ya khlaijak khe abo ani orono tongnai.

⁵Tumung norok sak sakno ani thani kung chuk phano, tei ani manjakma ani samungni bagwi se hwnwi uansugo,

⁶Kaitor se ano hamya-o khiklai-o, tei bini khẃi ano kitingwi ton kha hwnwi si di.

⁷Ang chirigwi ‘Ano man tẃi khlai kha,’ hwnwi chirik phano, ani kók khnajak li ya; ang khorang sotonwi sa phano buj sói khlaijak li ya.

⁸Ang láiwi ta man thung hwnwi bo ani lamano kebeng kha, tei ani lamarokno mwnak rw kha.

⁹Bo ani tong kwrwi tongma bebakno sokhlai na kha, tei ani khorokni motokno na kha.

¹⁰Bo ano bebak tẃi’-no swbai kha tei ani khatungmarokno buphang phuichama hai khe phuicha kha.

¹¹Bo thamchi kaui ano jolijak kha, tei ano bini ari hwnwi chong kha.

¹²Bini sengkrakrok kuthum lai phai kha; bórok ang bai nang laina bagwi tiyar wngwi ani nokno gerepsa kha.

¹³“Bo ani takhukrokno ang bai swkak kha, tei ano sininairokno ano sini li ya gwja.

¹⁴Ani sandairok tei kichingrok ano pok bái kha;

¹⁵ani nograirokbo ano sini li ya; ani selengjwkrokbo ano buino nuk tẃi khe nuk kha; bórokni mokolo ang phatarsa hai se wng si-o.

¹⁶Ang ani selengno ring kha, tamo khe bórok ani kók khna li ya; ang bórokno ring phano se bórok sak nangjak li ya.

¹⁷Ani hik bo ani hamano mwnamjak kha, ani sakni takhukrokbo ani samo phai li ya gwja.

¹⁸Chwrairok suda se ano nor si-o; ang bacha khe bórok ano hamya sa lai-o.

¹⁹Ani kháni kichingsong ano khibi bái kha, tei ang hamjakma bororokbo ano kebengwi se bacha si-o.

²⁰Ani bahan hoi súgwi bukur bai bekreng se swrap si-o, ani langma le cho tw tẃi wngwi tong kha.

²¹O ani kichingsong, ano khairok ja di, ano khairok ja di, tamni hwn ba Kaitor ani saka yak rw kha!

²²Kaitor sátok tẃi norokba ano tamni sátok lai? Aswk bai asi yókjak lai ya kho diba?

²³“Ani kókrok swiwi narwkjakma te! Abórokno bijabo swiwi narwkjakma te!

²⁴Sorni swikong bai khursonwi tei sisa bai holongdabo tei komor phlai ya khe tonna bagwi swiwi narwgwi tonna muchungo!

²⁵Tamni hwn ba ani phiyóknaisa le kwthang, tei páithago khe bo se ha saka-o bachanai;

²⁶bemuk manjagwi ani bukur chájak pái phano, bahan simi khe ang Kaitorno nainai.

²⁷Ang bono baithang nuknai; ani baithangni mokol bai khe bono nuk anw. Abo hai khe nuknani ang bwswk se khatung!

²⁸Tumung nwng, “Bahai khe chwng bono sátok lainai! Tei aboni yarwng le bini thani’-no hwnwi sa khe;

²⁹sengno kiri di, tamni hwn ba jolimung seng bai swprakjakna nangmano se tubunai, hakhe nwng bujsói tongo hwnwi saui man anw.”