Read Kok Borok JOB 2 Bible Online

JOB 2 - Kok Borok bible

JOB 2

¹Chuknoha-o tongnairok salsa haino hai Subraiyung bai malaina bagwi phai phi u kha tei Soitanbo bórok bai baksa aro phai kha.

²Subraiyung soitanno hai hwnwi sẃng kha, “Nwng buroni phai?” Soitan Subraiyungno hai hwnwi sa kha, “Ang ha saka-o ahaino aro-uro thángwi tongo tei ha kitingwi’-no ang beraiwi tongo.”

³Subraiyung Soitanno hai hwnwi sẃng kha, “Nwng ani seleng Jobno nuda nuk kha? O ha saka-o khoroksa phano bo hai borok sói tei borok kaham kwrwi. Bo ano suriui tongo tei mungsa phano samung hamya khlai ya. Bo mungsa phano cha ya khlaima kwrwi twtwi nwng nai tẃi khe ang nono bini hamya khlaina rw kha, tamo khe bo kaham khe bachaui tong kha.”

⁴Soitan Subraiyungno hai hwnwi sa kha, “Bukurni bagwi khe bukur! Khoroksa borok kwthang tongna bagwi bini bebakno yakarwi rwnai.

⁵Tabuk tumung nwng nini yak phologwi bini bekreng bai bahanno dera rw khe bo nono bwskangono swrainai!”

⁶Hakhe Subraiyung Soitanno hai hwnwi sa kha, “Do akon, bo tabuk nini yapha’-ono; tamo khe nwng bono ta simi ta buthar di.”

⁷Hakhe Soitan Subraiyungni aroni thángwi Jobno bwsak kupulung khe bisí kotor kotor manjak rw kha tei abo yakungni simi bokhorok jora kupulung wng kha.

⁸Job thapla-o achugwi kha tei hani twkchara khochaui bini a bisíno puk kha.

⁹Aphuru khe bihik bono hai hwnwi hwn kha, “Nwng tabukbo swkangni haino kwrak khe tong kho hai da? Kaitorno swraiwi thwi si di.”

¹⁰Tamo khe bo bihikno hai hwnwi hwn kha “Nwng butua bwrwirok kók sa tẃi khe se saui tongo. Chwng ba tamo Kaitorni aroni kahamno simi de yachaknai, hamyano kheba yachak yaui da tongnai?” Omo hairogobo Job bini búkhúk bai sumsok khlai li ya.

¹¹Jobni bikichingsong khorokthamrok bini a hamya manjakmano khna kheno bini thani phai lai kha, Eliphas khe Temanni, Suhitni Bildadni tei Jophar khe Namani. Bórok thansa khe Jobno bwkha kwchang rwnani bagwi phai lai-o.

¹²Hakchalo tong twtwi bórok bono sini hór lai li ya, bórok khorang sotonwi chirigwi kap lai kha; bórok rírok chir laiwi tei khorogo hadlwi sar lai kha.

¹³Bórok bo bai baksa salsni horsni achuk lai kha, khoroksa phano kók sa lai li ya, tamni hwn khe bo belai tekto manwi tongmano bórok nuk kha.