Read Kok Borok JOB 20 Bible Online

JOB 20 - Kok Borok bible

JOB 20

¹Hakhe Namatsa Jophar sa kha:

²“Ang samano khna di! Ang ma uansukma bai o kókrokno sana ma nai-o, tamni hwn ba omo ano sanani muchung rw súk kha.

³Nwng ano lachi rwma kókno ang khna kha, tei ani simani bai nono tamo sa phinai ang saui mano.

⁴Nwng saui man ya de yaphangni simi bororokno ha saka-o tonjak phuruni simi,

⁵borok hamyarok dwgwi kung chugui ma tong ya, tei Kaitorno kiriyarokni tongthokma bo srapsani ya diba?

⁶Bórok nokha khu-ui rochong phano tei bórokni khorok chumui-o khu-ui phano,

⁷bini sakni bikhi kwma tẃi khe bo kwmanai; bono nuknairok ‘Bórok biyang tháng kha’ hwnwi sa lainai.

⁸Bórok imang hai kwmaui thángnai; horo imang-mukthang hai nukma kwma tẃi khe kwmanai.

⁹Bórokno nuknairok bono tei nuk phi glak, bini tongthaini bono tei nuk glak.

¹⁰Bórokni bwsarok bigrarokni khairokmung nainai, tei bórokni yakrok bini rang-rí kiphilwi rwnai.

¹¹Bórokni bwsak siklani phan bai kupulung tongmani, tamo khe bo bai baksano abo hadlwi-o ma goiroknai.

¹²“Samung hamyano bórok tẃijak phano eba bwslai-o hui phano

¹³abono bórok yakarna nai phano búkhúgo narwgwi tonnai,

¹⁴bórokni a chámung bini ogo thángwi kwkha se wngo; abo tei kubun bisrok khá tẃi’-no khá-o.

¹⁵Bórok rang-rírokno monok phano abono ma kwba phinai; Kaitor bini ok bisingni abórokno kariui rw phiro.

¹⁶Bórok chibukni bisno kusupnai; chibuk bórokno butharnai.

¹⁷Bórok piya bwtwi tei doi yorjak twimarokno nai glak.

¹⁸Bórok bini kolomtwini bwtháino kiphil rwnai, tei bo abono monok glak; bo ajiui manmano bo se ma chá glak.

¹⁹Tamni hwn ba bórok kwrwirokno kádul kha tei nor kha, bórok sak baithang tangma nok yanobo bórok segwi na kha.

²⁰“Bórokni ok khuimarok pái phlai ya; bórokni khámaima mungsano phano narwk ya.

²¹Bórok chá bái khe mungsa tong rwk ya; aboni bagwi bórok hamchaui man glak.

²²Bórok kupulung khe chúkjak wngwi tong phuru bórokni thani birman phaisanai; aswkni birmanrok bórokni saka-o klainai.

²³Bórokno ok supungna bagwi Kaitor bini thamchino rohornai tei abo bórokni saka-o chámungni uatwi hai khe lu khlaijaknai.

²⁴Sorni aitalrokni yakni bo khárnai; pitolni chakhla bono paui lái thángnai.

²⁵Abo bórokni bwsak paui ongkhorwi thángnai, tei abo bórokni thẃi-o sal kogwi tongnai; hakhe bórokni bwkha-o kirima phainai.

²⁶Bórok rang-rí khatimarok bebak kwmaui páinai; khoroksa swk mwchẃngma hór ya abo hai hór se bono kham rwi páinai; bini nogo tong rwkmarok khamwi pái báinai.

²⁷Nokharok bini sumsokno phehelwi phunuknai, tei o ha bono kebengwi bachanai.

²⁸Bórokni nokni rang-rí bebakno tlangwi páijak báinai, Kaitorni jolima salo abórok bebakno kochogwi thángnai.

²⁹Omono borok hamyarok Kaitorni aroni mannai, Kaitorno abo bórokni bagwi chongo.”