Read Kok Borok JOB 21 Bible Online

JOB 21 - Kok Borok bible

JOB 21

¹Hakhe Job hai hwnwi sa kha,

²“Ani kókrokno kaichomwi khna di tei omono nini bwkha kwchang rwnai wng thung.

³Khna gra di ang kók sanai, ang sama ulo thesra kari si di.

⁴Ang ba tamo bororokno da hamya sa? Ang tamni hama bara wng ya wngnai?

⁵Ano naisik di tei kiriui mwlang cha di, hakhe nini yak bai búkhúk muthup di.

⁶Ang abono uansuk khe ani bwkha thwi-o, tei bwsak kwlwiwi jangrijago.

⁷Borok hamyarok tamo thangwi tong, tamni langma logwi tongwi phan kwrak khe bacha?

⁸Bórokni bwsarok tei busukrok bórokni mokol bwskango hamcha-o.

⁹Bórokni núkhungrok kirina nang ya tei bórok Kaitor bai bo majra rwjak ya.

¹⁰Bórokni musuk chwlarok banja tei musuk bwrwirok bwsa chokhrai ya.

¹¹Bórok bwsarokno mera bwsarok hai kherbai rw rwui rohoro tei bórok mwsa laiwi thwng lai-o.

¹²Bórok kham bwsa tei chongpreng tam laiwi mwsa-o, tei sumui subwi tongthok lai-o.

¹³Bórok hamchaui sal rohor lai-o, tei kwchang kwchang khe thwi thángo.

¹⁴Bórok Kaitorno ‘Chwngno yakar di! Chwng nini lamano sina nai ya.

¹⁵Phan gwnang Kaitorno chwng tamni monnai? Eba khe bono suriui tamo mannai?’

¹⁶Bórok hamchamani abo bórok sak baithang manma ya da? Borok hamyarokni chapmarok ani bai phér laijak.

¹⁷“Uái bwswk borok hamyarokni chati butharjak? Uái bwswk digi-sigi manjak? Kaitor uái bwswk jolijagwi birman nang rw?

¹⁸Uái bwswk bórok chwkap hai nokbaro kobon, gundak hai nokbar kotor bai kobon rwjak?

¹⁹Nwng sa-o, ‘Kaitor bórokni sumsokni manthaino bórokni bwsarokni bagwi khatiui ton kha.’ Bórok aboni manthai kiphilwi man thung, hakhe bórok abono saui mannai.

²⁰Bórok mokol baithang bórokni komormano nuk thung, bórok Kaitorni jolimano ma nung thung.

²¹Bórokni salbo tankhraijak, bórok yakarwi tháng khe tamni bórokni nokno naikol sinai?

²²Kuchugo tongnairokno bono buj thumma nugwi khoroksa swk Kaitorno phrwngnai hai da?

²³Khoroksa khoroksa hamchaui chasaui tei kirima kwrwi khe tongwi thwi-o,

²⁴bini sakbo kuphung bekrengrokbo kwrak kaham.

²⁵Baksa khe ba bwkha ham súk ya khe kahamno si lang yaui thwi-o.

²⁶Bórok thwiwi baksa kheno ha-o phobjago tei a kenjuano kenjua bai se chájago.

²⁷“Nai di nwng ano cha ya khlaina uansukma tei chapmano ang saui mano.

²⁸‘Borok kotorni nok le buro? Borok hamyarokni nok buro?’ hwnwi nwng sẃngo.

²⁹Lamarok tẃi himnairokno nwng sẃng ya da, tei nwng bórokni kókrok khna ya da?

³⁰Borok hamyarok digi-sigi phai phuru karwi da klangjakno, joliui majra rwma salo yó da yókno?

³¹Sabo bórokno hwnnai, tei sabo bini samungrokni yagul sunai?

³²Bo simalwngo balwi tlangjak bái khe bini mangkhor mwrwkjago.

³³Haphar kwchang dodono bórok hamjago; bini mang kwthwino ha-o phob phuru khe jotono bórom khlai lai-o tei bo ha bai bóljagwi pái-o.

³⁴Hakhe nwng kók nang yarok bai bahai khe ani bwkhano kwchang rwnai? Nini mungsa sana kwrwi kha nini kókrok tatal máng se.”