Read Kok Borok JOB 22 Bible Online

JOB 22 - Kok Borok bible

JOB 22

¹Temanni Eliphas hai hwnwi sa kha:

²“Thwiblang borok Kaitorni samungo chúknai da? Siyan gwnang kuk borok bo bini samungo chú da chúkno?

³Nwng borok sói wng khe Kwplaisani tamo bwkha srangna tongnai? Eba nwng lama kahamo him khe bini ba tamo manna tong?

⁴Nwng bono kiri-o hwnwi da bo nono khorai tei nwng bai baksa bujo hap?

⁵Nini samung hamyarok báng ya da? Nini sumsokrokni páimung kwrwi.

⁶Nwng nang ya phano nini takhukno kók ma rwnai hwnwi sa-o, tei bórokni sakni ríno srwng srwng khe khugwi na-o.

⁷Nwng twi kangjakno twi khan ya, tei ok khuijakno chámung rw ya.

⁸Phan gwnangrok tongthai ha mano tei aro bórom manwi tongo.

⁹Nwng randijwkrokno yak bukcha khe rohoro, tei ma-pha kwrwirokni phanno swbai-o.

¹⁰Aboni bagwi khẃirok nono kitingjak tei achomsa nini saka-o kirimasingcha phaiwi digi-sigi-o khiklainai,

¹¹eba nono nuk rw ya khlaina bagwi mwnakma twi lom tẃi khe gerepsaui kobol phainai.

¹²“Kaitor ba nokharokni saka kuchugo tong ya de? athukirirokno naiwi nai di abórok bwswk se kuchugo!

¹³Aboni bagwino nwng, ‘Kaitor tamo si ba? Bo mwnakma bising tẃibo chongwi da manno?’ hwnwi sa-o.

¹⁴Chumui rwjama bono kobolma bagwi bo nuk ya, tei bo nokha saka-o himgurungo.

¹⁵Nwng borok hamyarok himmani a lama hamya, lama kwcham tẃi himwi tongnai de?

¹⁶Jora wng ya sini’-no bórok chokhrai rwjago; bórokni yaphang kochok rwui tlangjago.

¹⁷Bórok Kaitorno hwno, ‘Chini oroni tháng di,’ tei ‘Kwplaisa chini tamo khlai mannai?’

¹⁸Hai phano bo manwi kahamrok bai bórokni nok supungo, phiya ba borok hamyarokni chapmungrok le ang bai kwchal se.

¹⁹Borok kahamrok abo nugwi tongthogo tei borok sutrangrok khe mwnwi lai-o.

²⁰‘Kubuino chini arirok sokomorjak bai kha tei tong rwkmarok khe hór bai kham bái kha.’

²¹“Kaitorni kók khna di, tei kwthaui tong di; hakhe nini thani kaham phainai.

²²Bini khukni phrwngmano yachak di tei bini kókrokno bwkha-o chu di.

²³Tumung nwng kwplaisani thani kiphilwi nini nokni nini cha yarok khibiui phai khe nwng mwthangjak phinai,

²⁴tumung nwng rangchakno hadlwi hai khe nuk khe tei rangchak kahamno twisani holongsiki naituk twi naituk khe;

²⁵hakhe tumung kwplaisano nini rangchak eba rukphai kaham wng khe,

²⁶hakhe nwng kwplaisa bai tongthok rwjaknai tei Kaitorni thani mwkhang tisa di,

²⁷Nwng bono suri khe, bo nini surimano khnanai tei nwng nini chakmarokno rwnai.

²⁸Nwng nini sakni bagwi bwkha chongnai tei abo nini bagwi kwrak khe songchajaknai tei nini lamarogo pohor chẃngsanai.

²⁹Bui lachi rw khe nwng abono kung chugo hwnwi sa-o; tamni hwn ba bo koinenerokno mwthango.

³⁰Bo cha ya khlainai boroknobo phiyógo; bórok srai-srai wngma bagwi bórok phiyókjaknai.”