Read Kok Borok JOB 24 Bible Online

JOB 24 - Kok Borok bible

JOB 24

¹“Kwplaisa tamo wngwi jora chongwi ton ya wng, tei bono monnairok le tamni a salno nuk lang ya wng?

²Borok hamyarok hani ari marino noro, bórok buini merarokno tei sulano segwi na-o.

³Bórok ma-pha kwrwirokni korai chirkarokno búkhlai-o; tei randijwkrokni lakai su bái ya sak bórokni musuk chwlarokno narwgwi tono.

⁴Bórok kwrwirokno lama-o dagarwi klango; ha sakani bigrarok huijagwi ma tongo.

⁵Bolongni korai chirkarok hai khe bórok hasinglwngo chámung naituk lai-o, bórok bwsarokni bagwi haphar bukcha-o chámung rutuk lai-o.

⁶Bórok sakni haphar ya-o chámung thumo tei borok hamyarokni karjak angur bwlwngo angur bwthái ma khago.

⁷Bórok rí kwrwi khe hopung ma thu-o, kwchangma-o mungsa chumna kwrwi khe ma tongo.

⁸Hachugo uatwi klaima bagwi bórok kisi wngo, holongdabo se uatwi katina bagwi swrabwi ma tongo.

⁹Bupha kwrwisarokno bórok bumani khájani sekpro-o, tei bigrarokni absarokno gosimung mari snamo.

¹⁰Bórok bórokno sago rí kwrwi khe rohoro; ok khuijak khlaiwi mai motha ruju lai-o.

¹¹Bórok olib thok phere lai-o tei angur phereui bwtwi kari-o tamo khe ma nung yaui kangwi ma tongo.

¹²Kamiyungni thwi twtwi bororok kengai lai-o tei kwsa manjakrok chuba di hwnwi chirik lai-o; hai phano Kaitor bórokni surimano khunju kan ya.

¹³“Pohorno kebengnai bororokbo tongo, bórok a lamanobo si ya tei a lamarogobo tong ya.

¹⁴Borok butharnai, aichuk kra-o bachaui bigrarokno butharnani thángo tei horo khe sikhok hai wngo.

¹⁵Baliknairokni mokol aiprom promno naisingwi sa-o, ‘Khoroksa phano ano nuk ya’ tei bo mwkhang hui-o.

¹⁶Bórok mwnago nokrok khur lai-o, salo khe nok bisingo habwi tong lai-o; bórok pohorno si ya.

¹⁷Tamni hwn ba hor mwnak se bórokni bagwi aidrop hai; mwnakni kirimasingcha se bórokni kichingsong.

¹⁸“Bórok twi bai kochok rwui tlang jago; tei bórokni ha khe swraimung nangjak; tei bini angur bwlwngo khoroksa phano tháng ya.

¹⁹Tungwi ransaui kothorni twino ran rwui pái-o; abo tẃi kheno sumsok gwnang bororok mangkhoro ma thángo.

²⁰Bumani okbo bono pok jago; kenjuarok bórokno thokjago; bórok tei muitu khlaijak ya; abo tẃi kheno borok hamyarok buphang bái tẃi khe báiwi pái-o.

²¹“Bórok banjirokno dera rw-o, tei randijwkrokni mungsa kaham khlai ya.

²²Tamo khe Kaitor phankrakrokno bini phan bai ayuk lok rw-o; bórok bachaui phai phano bórokni langmani khatungmung kwrwi.

²³Bo bórokno kirina kwrwi khe kati rwui tono, tei chubaui tongo; Kaitor bórokno nai khlai máng tongo.

²⁴Bórok srapsani bagwi torsa rwjago, tei kwmaui pái-o; bórok tei kubunrok hai khe mwranwi thángo; bórok maitang rajak tẃi khe rajagwi pái-o.

²⁵Tumung omo kubui ya khe, sabo ano tatal hwnnai, tei ani kók nang ya hwnwi sabo sanai?”