Read Kok Borok JOB 27 Bible Online

JOB 27 - Kok Borok bible

JOB 27

¹Job bini sajaknai kókno hai hwnwi sa phi kha:

²“Ani manthaino seknai, ani bwkhano swbainai Kaitor kwthangni mungwi ang o swmai tango;

³ang rangma tong sak tei Kaitorni phola ani thani tong sak,

⁴ani búkhúk bai tatal sa glak, tei ang kók bandi sa glak.

⁵Ang norokno borok sói hwnwi ta ma sa thung; ang thwi ya sak ang sói tongmungno yakar glak.

⁶Ang tongmung sóino tẃiwi tongnai, yakar glak; ang kwthang tong sak ani buchimung ano lachimung rw glak.

⁷“Ani arirok tei ano kebengnairok hamya hai wng thung.

⁸Kaitor se swkagwi pái khe Kaitorno tẃi yarokni tamo khatungmung tong, Kaitor se bini langmano tlangwi pái khe tamo tongnai?

⁹Bini jwngjalrok phai phuru kapmano Kaitor khw de khna no?

¹⁰Kwplaisano tẃiwi bo bwkha da srangno? Bo Kaitorno ring máng de tongno?

¹¹Ang nono Kaitorni phanno tẃiwi phrwng anw; Kwplaisani chapmano ang huiwi tong glak.

¹²Norok jotono mokol baithangno omono nuk kha; hakhe norok tamo bebak chúk ya wng kha?

¹³“Borok hamya Kaitorni thani omo haino mannai, sátoknairok omo haino Kaitorni aroni mannai:

¹⁴Bórok bwsa Kwbángma manwi er phano, abo bebak chobani bagwi máng se; bórokni bwsarok ok pungwi ma chá glak.

¹⁵Kwthang tong rwknairok bok nangwi ma thwi báinai, tei bórokni randijwkrok kap lai glak.

¹⁶Bórok rukphairokno hadlwi hai rochongsa rw phano, tei rírok rwja sarwi rúng phano

¹⁷bórok abono rúngsa phano borok sóirok se abono ma kannai, tei borok sutrangrok bórokni rukphairokno banta khlainai.

¹⁸Bórok tokrok bothop thum tẃi khe nok tango, angur bari mwrwknai nok srapsani bagwi nok tang tẃi khe tang lai-o.

¹⁹Bórok rang-rí gwnang khe thu-o, tamo khe bórok abo hai tei ma wng glak; bórok bórokni mokol phiyok khe abo tei nuk phi glak.

²⁰Twi kotor phai tẃi khe bini thani kirimung phainai; horo bangkundri abórokno kobon rwi tlangnai.

²¹Salkabaini nokbar sipsa khe abo kobonwi thángnai; abo kobonwi tlangjago.

²²Khairokma kwrwi khe abo bórokno swpraknai; bórok aroni yókna bagwi káphra lai-o.

²³Bo bórokno mwnwiwi yapha khorobo tei bórok tongma-o tongwi thesra kari lai-o.