Read Kok Borok JOB 28 Bible Online

JOB 28 - Kok Borok bible

JOB 28

¹“Rukphaikhor le kubui’-no tongo, tei rangchakrokni bo sakijaknai tongo.

²Sor khe ha bisingni tisajago tei holongni khe tama tikhlaijago.

³Rutuknai bororok mwnago pohor mwchẃngo tei hakchal kuk harogo abono rutuk lai-o.

⁴Borok tong ya jidolorogo bórok khurwi nai-o; lama tẃi himnairok bórokno pogwi thángo, bórok bororok bai chalwi thángo tei dwkhwi bai khe chong laiwi hakhoro ongkhoro.

⁵Ha saka-o se chámungrok achai-o tamo khe a ha bisingo khe hór se wngwi tongo.

⁶Hani holongo saphira holong tongo tei a hadlwi-o khe rangchak tongo.

⁷“O lamano toling masabo sini ya, tei sikruk masabo abono nuk ya.

⁸Thamchi kutung yabrwi masabo aro yapri rw ya, singhobo abono lái ya kho.

⁹“Bororok holongthai kwrak saka khur lai-o tei yaphang kwrwngwi hatháirokno philo.

¹⁰Bórok holong tẃi gurung khuro, tei bórok manwi kaham kahamrokno nugo.

¹¹Bórok twimarokni yaphangno rutugwi kari-o tei manwi huijakrokno rutugwi kari-o.

¹²“Tamo khe simungno le buro mannai? Simung ba buro tongwi tong?

¹³“Borok a lamano si ya, tei abo kwthang tongnairokni ha-o kwrwi.

¹⁴Kuthuk twiyung sa-o, ‘Abo ani oro ya’ tei twijlangbo sa-o, ‘Abo ani thani ya’

¹⁵Abo rangchak bai paiwi man ya tei rukphai baibo abono su-ui man ya.

¹⁶Abo rangchak kaham kuk bai eba morok oniks eba saphir bai suna kwrwi.

¹⁷Rangchak bai ainarokbo abo bai baksa wng ya, tei abono rangchak kahamni manwi bai sláiwi man ya.

¹⁸Holong kaham eba moni kahamrokni kókbo sana nang ya; simung le muktarokni slái morok se.

¹⁹Ithiopiani topas holong baibo abono slái man ya. Abo rangchak kaham kukni slái’-bo morogo.

²⁰“Hakhe buroni simung phai sla? Tei simungni tongthai ba buro?

²¹Abo joto kwthang tongnairokni mokolo huijak, tei nokhani tokrokni mokolobo abo huijak.

²²Kwthwi bai komor rwnai sa-o, ‘Chwng aboni kók nathong kókno chini khunju bai khna kha.’

²³“Kaitor le aboni lamano si-o, tei abo buro tong bo si-o.

²⁴Bo ha páithak jora naiwi tongo, tei nokharokni saklomo tongma bebakno nugo.

²⁵Bo nokbarno sipsa rw-o tei bwswk uatwi klai rwnai chongo.

²⁶Bo bahai khe uatwi klai rwnai aboni lama khlai kha tei nokha philigwi phirang koknani lamabo snam kha.

²⁷Hakhe bo omorokno khlaiwi pái khe simungno nuk kha tei abono su kha. Bo abono songcha-o tei mareui amjogwi nai-o.

²⁸“Tei bo borokno sa-o, ‘Ao, Kaitorno kirima se simung, tei hamyano khibiui khármani khe saui manmung.’ ”