Read Kok Borok JOB 29 Bible Online

JOB 29 - Kok Borok bible

JOB 29

¹Hakhe Job bini kók hai hwnwi saui tong phi kha;

²“Ano Kaitor naikolwi tongmani ani a lái thángjak salrokno se khátang si-o;

³aphuru ani saka-o bini chati chẃngwi tongo; tei mwnago khe ang bini pohor bai him kha;

⁴ang sikla sók sukma jora-o ani nogo Kaitor bai ani kiching halok tongmani;

⁵kwplaisa ang bai tong phuru, ani bwsarok ang bai tong phuru;

⁶ani yakamrokno dut bothona bai sújago tei holongthai ani bagwi thokni twisa boui rw-o.

⁷Ang kamiyungni duglam tẃi ongkhorwi thángwi lampra-o achugwi phuru,

⁸siklarok ano nuk khe huijak lai-o, tei chakrarok khe bacha lai-o;

⁹tẃiphangrok kók sa laima thák lai-o tei yak bai khukrok muthup lai-o;

¹⁰borok kotorrok khorang serek-serek ma wngo, tei bórokni bwslairok raksajagwi thángo.

¹¹Bórok ani kók khna khe ano hambai rw lai-o, tei ano nuk khe ani kókno ham thung hwnwi sa lai-o;

¹²tamni hwn ba ang bigrarokno bórok klai phuru chuba kha, chubajak ya ma-pha kwrwirokno chuba kha.

¹³Komorwi tongnairokni hamari ani saka-o klai kha, tei ang randijwkrokno bwkha srang rwui rwchap rw kha.

¹⁴Ang sóino chumo tei o sóino ano kobolwi tongo, ang bujsóino rí hai khe sago chumo tei khorogo soro.

¹⁵Ang mokol nuk yarokni mokol tei himwi man yarokni yakung hai tongmani.

¹⁶Ang bigrarokni bupha tongmani tei ang sini yarokno chubakrak tongmani.

¹⁷Ang borok hamyarokni bua swbai-o, tei bini búkhúkni mui romjakno phiyógwi rw-o.

¹⁸Aphuru ang uansugwi sa kha, ‘Ang ani bothobo’-no thwinai tei ani ayuk hasing haino bángnai;

¹⁹ani yarwng twi phaising suhor thángjak, tei hopung ani bedekrogo pantwi tongo;

²⁰ani chẃngsachani kók ani bwkha-o srai-srai muitu mano, ani yakni badukhung kwtal hai wngo.’

²¹“Bórok ani kókno khunju kan lai-o, tei kókbiti khnana hwnwi naising tong lai-o.

²²Ang sa khe bórok tei kók sa phi ya, tei ani kók bórokni thani thop thop khe pantwi klai tẃi klai-o.

²³Uatwi naising twi bórok ano naising lai-o; bórok búkhúk phiyogwi sachlangni uatwi naising tẃi naising lai-o.

²⁴Bórok bwkha thwijak phuru ang bórokno mwnwi sru-sru khe naisik kha; ani mwkhang kwchẃng nugwi bórok bwkha thangchajago.

²⁵Ang bórokni lamano chongo tei bórokni tẃiphang hai khe achugo, sengkrak bodolo habugra tong twi khe tongo, bwkha báijakrokno bwkha kwchang rwnai hai wngwi tongo.