Read Kok Borok JOB 3 Bible Online

JOB 3 - Kok Borok bible

JOB 3

¹Aboni ulo khe Job khúk kiyogwi bini achaima salno swrai kha.

²Bo hai hwnwi sa kha:

³“Ani achaima sal komor thung tei ‘Chwrai khoroksa ogo chujak kha,’ hwnma a salbo komor thung.

⁴A sal mwnak wng si thung! Kaitor a salno tei muitu ta khu phi si thung eba pohor bai khe tei ta chẃngsa rw si thung.

⁵A salno mokjak tei mwnak khlai di, aro chumui kobol si thung; tei salno mwnak kobol rwui kirimasingcha khlai thung.

⁶A horno belai mwnak bai kwmaui rwui pái thung! Abo a bisini salrok bai baksa ta tongthok thung, tei kubun talrok bai ta lekhajak thung.

⁷A hor haino bukcha wng thung, a hor tongthokmung khorang kwrwi wng thung.

⁸Lebiathonno[5] kók khna rwui mannairok twijlangno swrainairok a salno swrai thung.

⁹Bini aitorma mwnakjak wng thung; bo pohor nuknano khatung phano ta ma nuk thung; bo phung ai jorano ta ma nuk thung,

¹⁰tamni hwn ba abo ani amani okno chu ya khlai li ya tei ani mokol bwskangni sátokmungnobo hui li ya.”

¹¹“Achai phuruno, oksingni achai phai phuruno ang ba tamo thwi ya wng lang?”

¹²Ama ba tamo ano khuri-o ma bera lang? tamo ano ba abuk ma chá rw lang?

¹³Ang aphuru thwi khe tabuk ba kwchang kwchang se wng kha mun; thwi pái khe tabuk lenglaui se ma tong kha mun,

¹⁴Noyung kwchamrokno tisa phinai habugrarok bai baksa tong kha mun,

¹⁵hakhe rangchak rukphai bai nok supungnai habugrani bwsarok hai khe thu-ui tong kha mun.

¹⁶Eba khe ang ba tamo achai yaui chokhrainai hai sal-tal nuk lang yaui pái tháng ya wng lang?

¹⁷Borok hamyarok mangkhoro se samung hamya tangma mwthago tei tangwi lengjakrokbo yak thago.

¹⁸Aro se alongo chopjakrokbo tong kwchang ma tongo; tei aro daginairokni khorang kwpraprokbo khnanani ma yógo.

¹⁹Kotor tei kusu bebakno tongo, selengrokbo aro bubagrani yakni yókjak.

²⁰“Tong khochoro ma tongnaino ba tamo pohor ma rw? Bwkha báisukjakrokno ba tamo kwthang ma narwk?

²¹Bórok thwina muchungwi suda tamo ma thwi ya, bórok huijak rangkhorrokni slái mangkhorno se hamjak kugo;

²²bórok thwiwi mangkhoro ma phobjakna se tongthokjak kuk si-o.

²³Kaitor, bisingo chobwi ba tamni lama nuk yarokno le pohor ba ma rw lang?

²⁴Lengprama se ani chámung hai wng si-o, ani swlwgwi kapmani twi hai se yor si-o.

²⁵Ang kirimarok se ani sago klai si-o, tei ani kirimungrok se ani sago klai phai si-o.

²⁶Ani bwkha-o khakchangma tei tongthokma kwrwi, kwrwi ani lenglamung; tamo khe birman se phai si-o.”