Read Kok Borok JOB 30 Bible Online

JOB 30 - Kok Borok bible

JOB 30

¹“Tamo khe tabuk ani slái chwrairok se ano thesra kari lai si-o, bórokni buphasong se ani mera mwrwknai sẃirok bai baksa se tongna chúk ya.

²Ang bórokni yakni phan bai tamo mannai? Bórokni phan se páiwi tháng kha,

³Bórok ma chá ya wngwi haphar bukcha-o ayang uyang ma himgurung kha tei ram kha;

⁴bórok bolongni sam phang bwláirok sotroui chá lai-o, tei balangchi yarwngrok phuichaui chá lai-o.

⁵Bórok luku bisingni rwkhlaijak kha; sikhokni uklogo chirik tẃi khe bórok bini uklogo chirik lai-o.

⁶Kirimasingcha halabo khe bórok tong lai-o, bórok hakhoro ma tong lai-o, tei holongdap khur laiwi ma tong lai-o.

⁷Busulwngo bórok hulok lai-o; tei sichu yaphango thansa khe kuthum lai-o.

⁸Bórok ailangrok, uansukna rwng ya gwja, bórok hani búkhlaiwi rohorjak.

⁹“Tabuk khe bórok se ano rwchabwi thesra kari lai si-o; ang ba bórokni khukni kothoma se wng si-o.

¹⁰Bórok ano khibi kha, ang bai chal bái kha; ani mwkhango khuktwi musunabo mungsa wngjak li ya.

¹¹Tamni hwn ba Kaitor ani badukhung budukno khengwi rwui ano bom rw kha, hakhe bórok ano kebengsa kha.

¹²Ani yagra bwkhak borok hamyarok bacha laijak, bórok ang yapri sémano khiklaina nai lai-o tei ano sokomorna lamarok snam lai-o.

¹³Bórok ani lamano kasu kha, ano sokomorna bagwi chaitok lai-o; khoroksa phano bórokno kasu-ui mannai kwrwi.

¹⁴Bebak babai tẃi bórok phaisa-o; ang klaiwi tong phuru bórok ani phaising do laiwi phai lai-o.

¹⁵Ani thani kirimungrok phai kha; ani bórom nokbar bai kobon tẃi khe thángwi pái kha, tei chumui hai khe ani hamchama bo kwmaui tháng kha.

¹⁶“Tabuk ani bwkha bái laha, tong kesepni salrok ano rwktharwi tong kha.

¹⁷Horo ani bekrengrok sa-o, dunokma ham phlai yani bagwi ani lenglamung kwrwi.

¹⁸Bo jolijagwi ani ríno sekpro kha; ani kamchwlwi bokotok sotonwi sep kha.

¹⁹Bo ano harpego khiklai kha, ang hadlwi tei thapla hai se wng si-o.

²⁰ang nono ringma se nwng yachak li ya; ang suri phuru’-obo nwng ano naisik li ya.

²¹Nwng ano khairok li ya; nini yakni phan bai ano sátok kha.

²²Nwng ano nokbaro tisa kha, bini saka-o kasa rw kha, nokbar kotor sokromjago ano pupak kha.

²³Ang si-o, nwng ano butharnai, tei bebak thangwi tongnairokni bagwibo tongthai chong kha.

²⁴“Digi-sigi-o klaijak chubamung sanmano le khoroksa phano kebengwi bacha glak.

²⁵Bororok digi-sigi klai tong phuru ang bórokni bagwi kap ya da? Ani bwkha bigrarokni bagwi kham ya diba?

²⁶Ang kahamno naiwi tong phuru se hamya phai si-o; pohorno naising tong phuru se mwnakma phai si-o.

²⁷Ani bwkha hamya wngwi ámang-chímang wng kha; digi-sigini salrok se ani thani phai si-o.

²⁸Ang sal mwnakjak tẃi bwkha dukhu khe himo; ang luku bodolo bachaui chubachu sanwi koiwi sa-o.

²⁹Ang pheuangrokni takhuk, tei tokmangingangrok se ani palrok.

³⁰Ani bukur somchaui lór bái kha, tei ani bekrengrok tungphlaui khampro kha.

³¹Ani chongprengni khorang kapmung wngwi pái kha, ani sumui kabwi swlwknairok bai baksa se supjak si-o.