Read Kok Borok JOB 31 Bible Online

JOB 31 - Kok Borok bible

JOB 31

¹“Ang ani mokol bai swmai tang kha; hakhe ang bahai khe bwrwi siklano naisiknai?

²Chuknohani Kaitorni thani ani manthai tamo wngnai? Ani bosongrok Kwplaisani aroni tamo man rwknai?

³Borok hamyani thani digi-sigirok tei sumsok khlainairokni thani komormung phai glak da?

⁴Bo ani himma lamarokno si ya diba tei ani yaprirokno lekha ya diba?

⁵“Tumung ang ereng bai himwi tong khe tei ani yapri bandina bagwi thángsa khe

⁶ano rwtamung sói bai rwtaui nai thung tei ang bwswk sói abo Kaitor si thung!

⁷Tumung ani yapri lamani phér khe, tei ani bwkha mokol bai nugwi chong tẃi chong khe tei tumung mungsa swk kosom ani yakrogo nangwi tong khe;

⁸hakhe ang kaimano tei khoroksa chá thung, ang káiwi tor rwmarok phuichajak bái thung.

⁹“Tumung ani bwkha bwrwi khoroksa swk bai sotonjak khe tei ang nok arini duglamo bono belokna bagwi naising khe;

¹⁰hakhe ani hik tei khoroksani nogo mai-mui ma sóng thung tei kubun chwla bai ma thu thung.

¹¹Tamni hwn ba abo le belai lachimasingcha samung klai-o; abo hai le buj thumjagwi majra berjakna nango;

¹²abo morkeni hakhor jora sógwinai hór hai wngnai tei abo ani tong kwrwi tẃi’-no kham rwui páinai.

¹³“Tumung ang ani seleng eba selengjwkrok ano sanani phai phuru bórokni samano khna ya wng khe tei bórokno sak nang ya wng kha;

¹⁴hakhe Kaitor bachasa khe ang tamo khlainai? Bo ano sẃngphnek khe, ang tamo sanai?

¹⁵Ano snamnaisa Kaitor bo ani selengroknobo snamnaisa ya da? Bo ogo chujakma hai kheno angbo ogo chujak ya diba?

¹⁶“Ang bigrarokni nangmano rw yaui tong khe, eba randijwkrokno bwkha swbai khe,

¹⁷eba ang ani chámungno saichung cháui, ma-pha kwrwirok abono chá rw ya khe,

¹⁸tamo khe chwrai phuruni simino ang bupha kwrwirokno bórokni bupha hai khe naiwi phai kha tei amani ogo tong phuruni simino ang randijwkrokno naikol kha

¹⁹khoroksa swkno tumung ang rí kwrwi khe komorwi tongma nuk khe tei bigrano sago rí kwrwi nuk khe,

²⁰bo ano bwkha bai bólai ya khe, tei bini sak ani mera buikhumu bai takjak rí bono túng-túng khlai rw ya khe;

²¹buj thum lainai bodolo ani kók tẃi tongnairok tongo hwnwi tumung ang ma-pha kwrwirokno ang yak ma tisama tong khe,

²²hakhe ani kangkhungni yaktwk chokhrai thung tei ani yaktwkni jura kepleui tháng thung.

²³Ang Kaitor bai digi-sigi khlaijaknano kiriui tongo tei ang bini suar bwskango bachaui tongwi man ya.

²⁴“Tumungno ang rangchak-ríchago ani bwkha beraui tong khe eba rangchak kahamo bwkha bera khe;

²⁵tumung ani rang-rí kwbángma tongo hwnwi tei ani yapha-o kwbángma tongma bai tongthok khe;

²⁶tumung sal chẃngsaui phai phuru eba tal pirsaui phai phuru naiwi nai khe,

²⁷ani bwkha-o abono khámaiwi ani yaphano motom su khe;

²⁸abo buj thumnairok bai buj thumwi majra rwjak kha mun, tamni hwn ba ang Kaitorno se hamya sama klai kha mun.

²⁹“Tumung ano naislernairok tekto man phuru ang tongthok khe bórokni hamya wng phuru khápang srang khe

³⁰ang, bórok swraimung nangwi thwi thung hwnwi saui ani búkhúk bai ang sumsok khlai glak

³¹tumung ani nokni bororok ‘Sabo bini bahan bai ok supung ya tong?’ hwnwi sa khe,

³²sini ya bororok lama-o ma thu ya; ang lama tẃi láinairokno ani nogo kasa rw kha.

³³tumung ang ani sumsokno bororokni[10] mokolo huiwi ton khe, bwkha-o cha yarokno huiwi ton khe,

³⁴ang lukuno kirimani bagwi tei núkhungrokno sak nang ya wngmani abo ano sikiri kha, hakhe ang siring siring tong khe tei duglamrokni phataro tháng li ya,

³⁵khoroksa swk phano ani kók khnanai tongma te! (Iko ani mungswi! Phan gwnangsa ani kók khna thung!) ano majra bernairokni bere khoroksa swk swi thung!

³⁶Kubui’-no ang abono phairukungo bogwi nanai; ang motok hai khe khaui nanai;

³⁷Bono ang yakam bwswk yaprirok sé kha abono si rwnai; habugrani bwsla hai khe ang bini thani thángnai.

³⁸“Ani chara ha ano kebengsaui chirik khe ha chuaijak brangrok khorang baksa khe kapsa khe;

³⁹ang bini mairokno rang rw yaui cháma tong khe tei bini nokphangno ma buthar khe;

⁴⁰hakhe mairok wng yaui aro busurok se achai thung, tei barli wng yaui aro jabraphangrok se achai thung.” Job kók samarok thák kha.